«2020-жылдын мыкты журналисттик иликтөөсү» сынагына катышкан "ПолитКлиника" басылмасы бул конкурстун жана "Азаттык" радиосунун атайын сыйлыгына ээ болду.
Конкурстун жеңүүчүлөрүн жарыялоо аземи бүгүн, 12-февралда Бишкекте болду.
"ПолитКлиника" бул конкурста "Коронавирустан акча жасап: Жөнөкөй маска 25 сом, коргонуучу кийим 6000 сомдон алынган" деген темадагы иликтөөсү үчүн атайын сыйлыкка ээ болду.
Иликтөө 2020-жылы коронавирус оорусу күчөп турган 1-июлда жарыяланып, коомчулуктун кызуу талкуусуна алынган. Анда вирустан коргоочу беткап, жасалма дем алдыруучу (ИВЛ) аппараттардын кымбаттап кетишинин артындагы коррупциялык схемалар фактылар менен көрсөтүлгөн.
Бул сыйлык 3-ирет тапшырылып жатат. 2020-жылы сынакка жалпы 40 эмгек келип түшкөн.
Уланбек Эгизбаев көзү тирүү болгондо быйыл 12-февралда 31 жашка чыкмак.
«Азаттык» радиосунун таланттуу иликтөөчү кабарчысы Уланбек Эгизбаев 2018-жылы 22-июлда 28 жашында мезгилсиз дүйнөдөн кайткан. (BCh)
