Линктер

ЧУКУЛ КАБАР!
21-Сентябрь, 2021 шейшемби, Бишкек убактысы 04:29

ИИМ кылмыштуу топторду бийликке жолотпоо тууралуу мыйзам долбооруна негиздеме берди


Ички иштер министрлиги жалпы үч: «Уюшкан кылмыштуулукка каршы аракеттенүү жөнүндө», «Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө», «Жергиликтүү кеңештердин депутаттарын шайлоо жөнүндө» мыйзамдарына өзгөртүү киргизүү боюнча мыйзам долбоорун коомдук талкууга коюп, документ өкмөттүн сайтына жарыяланган.

ИИМ кылмыштуулукка каршы күрөштүн жаңы механизмдери каралган документти негиздеп, буга учурдагы экономикалык, саясий туруксуздуктун шартында уюшкан кылмыштуулуктун таасири артып баратканын белгилеген. Ошондой эле алар социалдык мүмкүнчүлүктөрдү колдонуп, кылмыштуу акчаларды адалдап, коомдук-саясий партияларга жана башка түрдүү уюмдарга кирүүгө, шайлоо алдындагы үгүт иштерин каржылоого умтулуп жатканы тууралуу жазылган.

Документте ошондой эле: “Мунун аркасы менен алар өз өкүлдөрүн бийлик түзүмдөрүнө жана саясий уюмдарга түздөн-түз алып келет. Кыргыз мамлекеттүүлүгүнүн өнүгүү этабында уюшкан кылмыштуулук көйгөйү өтө курч, эртерээк чечүүнү талап кылган маселе. Бул социалдык-криминалдык көрүнүштүн актуалдуулугу уюшкан кылмыштуулук өтө кооптуу көрүнүш экендиги менен шартталат. Уюшкан кылмыштуулуктун өсүү масштабы мамлекеттин жана коомдун коопсуздугуна коркунуч туудурат, анткени ишенимдүү ченемдик укуктук базанын жоктугун пайдаланып, бийликтин жогорку эшелонуна кирүү менен алар өз позицияларын бекемдейт”, - деп жазылган.

Мыйзамдын долбооруна ылайык, соттолгон, анын ичинде уюшкан топтордун жана кылмыштуу уюмдардын курамында кылмыш жасагандыгы же алардын кызыкчылыгы үчүн кылмышка барганы үчүн соттолгону жоюлган, ошондой эле уюшкан топтордун жана кылмыштуу уюмдардын лидери, мүчөсү катары боборлоштурулган каттоодо турган адамдар Кыргызстандын президенттигине, Жогорку Кеңештин жана жергиликтүү кеңештердин депутаттыгына шайлануу укугунан ажыратылат.

Мурдараак ИИМ 2020-жылы киши өлтүрүү, денеге оор залал келтирүү, адам уурдоо, опуза, талап-тоноо, каракчылык сыяктуу оор кылмыштар менен 127 уюшкан кылмыштуу топко (УКТ) таандык адамдар кармалганын кабарлаган.

Мындан бир нече жыл мурда ИИМ уюшкан кылмыштуу топтун мүчөсү катары каттоодо турган адамдардын толук тизмесин жарыялаган. Ошол учурда ал тизмедеги 20дан ашуун киши бир катар жергиликтүү кеңештерде жана шаардык кеңештерде депутат экени ачыкка чыккан. Алардын айрымдары депутаттыктан ары айыл өкмөт башчылыгына да шайланышкан.(MiK/ZKo)

Пикирлерди көрүңүз (1)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG