Линктер

ЧУКУЛ КАБАР!
19-Апрель, 2021 дүйшөмбү, Бишкек убактысы 16:20

Садыр Жапаров: Камбар-Ата-1 ГЭСин үч жылда куруп бүтөбүз


Садыр Жапаров. 15-март, 2021-жыл.

Президент Садыр Жапаров Өзбекстанга болгон мамлекеттик сапарында Кыргызстанда Камбар-Ата-1 ГЭСин коңшу өлкө менен чогуу куруу тууралуу келишим түзүлгөнүн айтты.

Бул тууралуу өлкө башчы 15-мартта «Азаттык» радиосуна курган маегинде билдирди.

Буга чейин белгилүү болгондой Өзбекстан менен энергетика жана өнөр жай министрлигинин багытында Кыргызстанда Камбар-Ата-1 ГЭС инвестициялык долбоорун биргелешип даярдоо жөнүндө макулдашууга жана электр энергиясын өз ара жеткирүү жөнүндө протоколго кол коюлган.

«Камбар-Ата-1 ГЭСин Өзбекстан менен бирге куруу жөнүндө келишим түздүк. Азыр иш башталды. Кудай буюрса, Камбар-Ата-1 ГЭСин үч жылдын ичинде куруп бүтүү боюнча максат койдук. Толук кандуу ишке ашат. 30 жылдан бери кура албай келатабыз. Кудай буюрса үч жылда куруп бүтөбүз деп турабыз», - деди Садыр Жапаров.

Кубаттуулугу 1 860 мегаватт боло турган бул станцияны куруунун долбоору 1980-жылдардын аягында пландалган.

Акыркы жолу 2012-жылы Кыргызстан менен Орусиянын өкмөттөрү Камбар-Ата-1 жана Жогорку Нарын ГЭС каскадын куруу боюнча макулдашууга кол койгон. Ага ылайык, Орусиянын «РусГидро» компаниясы бул эки энергетикалык объектини курмак. Бирок иш үзгүлтүккө учурагандыктан, 2016-жылы Кыргызстандын демилгеси менен макулдашуу денонсацияланган.

Расмий Ташкент Камбар-Ата-1 ГЭСинин курулушуна каршы чыгып келген жана бул эки өлкөнүн алака-катышындагы түйүндүү маселеге айланган. 2017-жылы Өзбекстандын президенти Шавкат Мирзиёев Кыргызстанга мамлекеттик сапар менен келгенде коңшулар ГЭСти чогуу-чаран куруу тууралуу макулдашкан. (BTo)

Пикирлерди көрүңүз (22)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG