Линктер

ЧУКУЛ КАБАР!
8-Май, 2021 ишемби, Бишкек убактысы 14:28

Орок айылдык кеңешиндеги аялдар квотасына нааразылык иликтенет


Иллюстрациялык сүрөт.

Чүйдүн Сокулук районундагы Орок (Төмөнкү Орок) айылында айрым эркек талапкерлер жергиликтүү кеңештердеги аялдардын 30% квотасына каршы чыккан окуя териштирилип жатат. Бул тууралуу аталган райондун акими Аманкан Кенжебаев “Азаттыкка” кабарлады.

“Ар айылга 30% аялдарга квота бөлүнүп берилген. Анан ал жерде эки эркек талапкер көбүрөөк добуш алыптыр. Алар "эмнеге бизден аз добуш алган аялдар өтүп кетип жатат" деп маселе кылыптыр. Мыйзам боюнча бөлүнгөн квота бар”, - деди Кенжебаев.

Орок айылында 10 миңдей киши жашайт. Айылдык кеңеште 21 мандат бар. Шайлоо мыйзамдарына ылайык, алардын жетөө аял болушу керек.

11-апрелде kloop.kg сайтынын байкоочулары Ороктогу шайлоо тилкесинде эркектер аялдардын квотасына нааразы болуп жаткан видеосун жарыялаган.

Айылдык кеңештерде аялдарга 30 пайыздык квота каралган мыйзам 2019-жылы кабыл алынган. Мындай эреже быйыл жергиликтүү шайлоолордо алгачкы ирет колдонулду. 11-апрелде өткөн жергиликтүү кеңештерге шайлоого 5388 аял талапкер катталган. Бул жалпы катталган талапкерлердин төрттөн бир бөлүгүн түзөт.

Буга чейин президент Садыр Жапаров мыйзам аркылуу аялдарга берилген квотаны кубаттай турганын билдирген жана жергиликтүү деңгээлде чечим чыгарууда гендердик теңчиликти камсыздоого мүмкүнчүлүк түзүлөрүн убада кылган.

Эки жыл мурун Ысык-Кѳл облусунун Саруу айылдык кеңешинде дагы эркек талапкерлердин аял атаандаштарына нааразы болгон окуя катталган жана бул коомчулукта кызуу талаш-талкуу жараткан.

Кыргызстанда ушул тапта аялдардын саны 3 миллион үч жүз миңден ашат. Аялдар шайлоочулардын жарымынан көбүн, тагыраагы 52% түзөт. (TSh)

Пикирлерди көрүңүз

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.

XS
SM
MD
LG