Кыргыз-тажик чек арасындагы жаңжалда курман болгон кыргызстандыктардын саны 34кө жетти. Тажик тарап ушуга чейин каза болгондордун санын ырасмий айта элек. Журналисттер 15 тажикстандык набыт болгонун жазышууда. Бүгүн Кыргызстан менен Тажикстандын президенттери телефон аркылуу чек арадагы кырдаалды талкуулашты. Андан көп өтпөй эки өлкөнүн коопсуздук кызматтарынын башчылары Ташиев менен Ятимов Баткенде жолугуп, ок атышууну толук токтотуу боюнча протоколго кол коюшту. Лейлек районуна гуманитардык жардам жеткирүү кыйындап, күйүүчү майга, кээ бир күнүмдүк товарларга таңкыстык жаралды.