Кыргызстандын эгемендигинин 30 жылдыгын белгилөөгө байланыштуу түзүлгөн уюштуруу комитети кеңешмеге чогулуп, мааракелик иш-чаранын планын талкуулады. Бул тууралуу министрлер кабинетинин басма сөз кызматы кабарлады.
Ага ылайык, маареке тууралуу планда Бишкек шаарында жана аймактарда элдик курултай баштаган жүздөн ашык иш-чараны өткөрүү каралган.
“Талкуунун жүрүшүндө бир катар сунуштар жана сын-пикирлер айтылды. Президентинин кайрылуусуна ылайык, планга кыргыз элинин Бүткүл дүйнөлүк Курултайын өткөрүүнү киргизүү сунушталды”, - деп айтылат маалыматта.
Министрлер кабинетинин төрагасы Улукбек Марипов бардык иш-чаралар республикадагы эпидемиологиялык кырдаалды эске алуу менен, санитардык ченемдерге жана талап-чектөөлөргө ылайык жүргүзүлүшү керек экенин эскертти.
2021-жылдын 31-августунда Кыргызстандын өз алдынча болгонуна туура 30 жыл толот. Мурдагы СССРдин курамындагы өлкөнүн эгемен тарыхында бир топ президент алмашып, бир нече жолу Баш мыйзам өзгөртүлгөн. (TSh)
Facebook шеринеси