НАТОго мүчө мамлекеттердин коргоо жана тышкы иштер министрлери 1-июнда Ооганстандагы жыйырма жылга созулган согуштан кийинки аскерлерди чыгарып кетүү операциясын талкуулайт.
Алар ошондой эле 14-июнда Брюсселде Кошмо Штаттарынын президенти Жо Байден катышкан саммит тууралуу сүйлөшөт. Ал жыйында аскердик альянстын баш катчысы Йенс Столтенбергдин "НАТО-2030" деген планы талкууга коюлат. Бул план Орусиядан жана Кытайдан тараган коркунучтарга, террорчулукка, киберчабуулдарга, дезинформацияга жана климаттын өзгөрүшүнө каршы күрөшүүгө багытталган.
Орусиянын коргоо министри 31-майда Москва НАТОнун коркунучтарына туруштук берүү максатында батыш сектордо быйыл 20 жаңы аскердик бөлүк түзөрүн билдирген.
Байден быйыл 11-сентябрга чейин америкалык аскерлерди Ооганстандан чыгарып кетерин билдирген. Учурда жемкорлукка белчесинен баткан ооган коопсуздук күчтөрүн мындан аркы НАТОнун каржылашы, атайын аскерлердин чет жакта машыгуудан өтүшү тууралуу суроолор ачык бойдон калууда.
