Кытайдын Синьцзян-уйгур автоном району Кыргызстанга коронавирус инфекциясына каршы күрөшүү үчүн коргонуу каражаттарынан турган гуманитардык жардамын жөнөттү. Саламаттык сактоо жана социалдык өнүктүрүү министрлигинин басма сөз кызматы, жүк 13-сентябрда "Манас" эл аралык аэропортуна келип түшкөнүн кабарлады.
Гуманитардык жүк 3 млн. даана бир жолу колдонулуучу бет кап, 100 миң даана N95 медициналык маска, 20 миң коргонуучу костюмдан турат. Аны министрдин орун басары Улук-Бек Бектурганов кабыл алды.
Саламаттык сактоо жана социалдык өнүктүрүү министрлиги 11-июлда Кытайдан Sinopharm вакцинасынын 1 миллион 250 миң дозасы алынып келгенин билдирген. Анын 150 миңин Бээжин жардам ирээтинде акысыз берген, калганын кыргыз өкмөтү сатып алган.
Кыргызстанда 2020-жылдын март айынан бери коронавирус менен расмий түрдө катталгандардын саны 177 миңден ашты, алардын эки жарым миңден көбү каза болду. Инфекцияга каршы 1,2 млн. ашуун киши эмделди. (КЕ)
Facebook шеринеси