Кыргызстанга коронавирус инфекциясына каршы Орусиянын “Спутник Лайт” вакцинасынын 200 миң дозасы алынып келди. Саламаттык сактоо министрлиги жүк 12-ноябрда “Манас” эл аралык аэропортунан кыргыз тарапка өткөрүлүп берилгенин кабарлады.
Буга чейин Орусиянын Кыргызстандагы элчилигинин басма сөз кызматы Орусия COVID-19 менен күрөшүүдө жардам көрсөтүү үчүн Кыргызстанга 1,2 миллион доллардан ашык каражат бөлгөнүн билдирген.
“Спутник Лайт” - коронавируска каршы Орусияда өндүрүлүп жаткан “Sputnik V” вакцинасынын жеңилдетилген түрү.
Кыргызстанда коронавирус пандемиясы башталган 2020-жылдын март айынан бери вирустан каза тапкандар 2704кө жетти. Вирус 182 341 кишиге жугуп, андан 176 824 адам айыкты.
Өлкөдө коронавируска каршы вакцина алгандардын саны 1 миллион 800 миң кишиден ашты. Алардын миллиондон ашыгы биринчи дозасын, 813 миңден көбү экинчи дозасын сайдырды.
Ушул тапта жашы 18ден өткөн жарандарга Sinopharm, Pfizer/BioNTech, Astra Zeneca, KazVac препараттары акысыз сайылууда. Саламаттык сактоо министрлиги “Sputnik-V” вакцинасы түгөнгөнүн билдирген. (BTo)
