9-ноябрга караган түнү Ленинград облусуна украиналык 113 учкучсуз учак чабуул койгонун аймак башчысы Александр Дрозденко билдирди. Анын айтымында, "Кириши шаарынын өнөр жай аймагына сокку урулган", дрондун сыныктары батирлердин бирине тийген.
ASTRA басылмасынын маалыматына караганда, учкучсуз учактардын чабуулунан кийин "Киришинефтеоргсинтез" заводунда өрт башталган. Бул – Орусиядагы кайра иштетүү көлөмү боюнча экинчи орундагы мунайды кайра иштетүүчү завод. Ишканага жасалган чабуул тууралуу украиналык телеграм-каналдар да жазышууда.
"Киришинефтеоргсинтез" заводу "Сургутнефтегаз" ачык акционердик коомдун тобуна кирет. Ишкана бензин, дизел, авиациялык керосин, мазут, күкүрт кислотасын, битум, парафин жана көмүр суутектерин чыгарат. Завод буга чейин да бир нече жолу дрон чабуулуна кабылган.
2026-жылдын сентябрь айында бул заводго чабуулдан кийин Санкт-Петербургда күйүүчү май таңкыстыгы башталган.
Орусиянын Коргоо министрлиги түн ичинде абадан коргонуу системасы украиналык 430 дронду атып түшүргөнүн маалымдады. Бул сандарды көз карандысыз булактардан тактоого мүмкүн эмес.
Орус армиясы Днепропетров облусунун инфратүзүмүнө жапырт сокку урду. Украинанын ири энергетикалык компаниясы - ДТЭК билдиргендей, түнкү чабуулдару чурунда манилүү энергетикалык объектилер зыян тартты.
«Павлоград, Самар, Каменск, Днепр райондорунда жана Днепр шаарында 600 миңден ашуун киши жарыксыз калды», - деп билдирди аталган компания.
Облустун башчысы Александр Ганжа «ооруканалар жана жарык үзгүлтүксүз иштеши керек болгон мекемелер генераторго туташканын» билдирди.
Полтавада орус армиясынын кесепетинен төрт киши жараат алды. Өзгөчө кырдаалдар министрлиги бир нече жерде, менчик ишканалардын аймагында өрт чыкканын кабарлады.
Хмельницк шаарында дрон чабуулунан жеке турак жай зыян тартты. Алдын ала маалыматтарга караганда, бир киши жабыркады.
Украинанын Абадан коргонуу күчтөрү Орусия 164 учкучсуз учак, үч ракета менен чобуул болгонун, алардын 137си атып түшүрүлгөнүн билдирди.
Орусия соңку чабуулдарга байланыштуу комментарий бере элек.
Орусия 5-ноябрга караган түнү Украинанын бир нече облусуна ракета жана дрондор менен чабуул жасады. Энергетикалык жана жарандык инфраструктура объектилери жабыркап, жети киши жаракат алды.
Одесса облусунда энергетикалык жана жарандык инфраструктура бутага алынган. Облустук аскердик администрациянын башчысы Олег Кипердин маалыматына караганда, жеткирүү кызматынын кампасы жарым-жартылай талкаланып, медициналык буюмдарды чыгарган жеке ишкананын администрациялык имараты жана коллеж менен жатакана зыян тарткан. Жабыркагандар жок.
Харьков облусунда почта терминалын аткылап, кийин окуя болгон жерге барган куткаруучуларга кайрадан сокку урган. Украинанын Өзгөчө кырдаалдар боюнча мамлекеттик кызматынын маалыматына ылайык, куткаруучулар баш калкалоочу жайда болгондуктан жабыркаган эмес. Безлюдовка жамаатында дрон жеке ишкананын кампасына тийип, өрт чыккан.
Днепропетровск облусунда түн ичинде алты районго жалпысынан 20 сокку урулган. Облустун борборунда үч киши жаракат алып, инфраструктура, турак жайлар жана гараждар зыян тарткан. Марганец шаарындагы артиллериялык соккудан дагы төрт киши жабыркап, үйлөр менен унаалар талкаланган.
Киев облусунда логистикалык инфраструктура бутага алынып, Буча районунда өрт чыккан. 1978-жылы туулган бир эркек жараат алган.
Украинанын Аскердик аба күчтөрүнүн маалыматына караганда, Орусия башкарылуучу Х-35 ракетасынан экини жана 128 дрон учурган. Алардын арасында Shahed үлгүсүндөгү сокку уруучу учкучсуз аппараттар, «Гербера» жана «Пародия» тибиндеги дрондор болгон. Украин тарап 105 дрон атып түшүрүлгөнүн же радиоэлектрондук каражаттар менен басылганын билдирди. Ошол эле учурда 18 жерде сокку катталып, тогуз жерде дрондордун сыныктары түшкөнү маалымдалды.
Украинанын Запорожье облусундагы Камышеваха кыштагына 2-ноябрдагы орус авиациясынын соккуларынан каза болгондордун саны 40ка жетти. Бул тууралуу Украинанын президенти Владимир Зеленский билдирди.
Анын айтымында, дагы 30га жакын адам дайынсыз болууда. Окуя болгон жерде издөө-куткаруу иштери уланууда.
Зеленскийдин маалыматына караганда, гуманитардык жардам таратуучу пункт жайгашкан мектептин имаратына тогуз авиабомба ташталган. Бир нече жолу сокку урулуп, кийинки чабуулдарда окуя болгон жерге келген полиция кызматкерлери менен куткаруучулар да курман болгон.
Запорожье облустук аскердик администрациясынын башчысынын милдетин аткаруучу Иван Семикиндин айтымында, ФАБ-3000 үч тонналык авиабомба, анын курамында дээрлик бир жарым тонна жардыруучу зат бар. Мындай курал адатта бекем бетон чептерди жана бункерлерди талкалоо үчүн колдонулат.
"ФАБ-3000 бомбасы таамай тийгенден кийин жер алдындагы борбордун бетон конструкциясы кулап түшкөн. Ошол маалда ичинде кадимки адамдар болгон. Алар жардам алуу үчүн келишкен. Бул аскердик объект да, аскердик позиция да эмес болчу", - деген Семикин.
Орусиянын аскерлери Камышевахадагы соккулар боюнча азырынча комментарий бере элек.
Ошол эле учурда согушту колдогон Telegram каналдарда ФАБ-3000 бомбасы менен Камышевахадагы украин аскерлеринин "таяныч пунктуна" сокку урулган учур тартылганы айтылган видео тарады. Бирок бул объект украин аскерлери тарабынан колдонулганын тастыктаган далилдер жок.
Би-би-си билдиргендей, Камышеваха украин күчтөрүнүн тылына жакын жайгашкан. Орусия калктуу конушка буга чейин да бир нече жолу чабуул койгон.