Казакстандын «Халык банкы» Орусиянын «Мир» төлөм системасынын карталарын кабыл алууну токтотконун 21-сентябрда "Известия" басылмасы жазды. Маалыматта мындай чечим Кошмо Штаттардын Каржы министрлигинин орусиялык төлөм системасынын Орусиядан башка аймактарда колдонулушун колдогондорго карата санкция жарыялоого даярдык тууралуу эскертүүсүнөн кийин жарыяланып жатканы белгиленди.
«Халык банктын» кардарларга колдоо көрсөтүү борбору орусиялык карталар терминал аркылуу да, банкомат аркылуу да тейленбей калганын билдирди.
Орусиянын Мамлекеттик думасы кабыл алган мыйзамдарга байланыштуу Кыргызстандын Москвадагы элчилиги ал жактагы кыргыз жарандарына кайрылуу таратты.
Элчилик Орусияда жашап, иштеп жүргөн кыргызстандыктар чет мамлекеттердин аймагындагы согуштук аракеттерге жана куралдуу кагылышууларга катышса, кылмыш-жаза жоопкерчилигине тартыла турганын эскертти. Кыргызстандын Кылмыш-жаза кодексинин 256-беренесине ылайык согуштук аракеттерге катышкандардын мүлкү конфискацияланып, он жылга чейин камала турганын эске салды.
Орус аскерлери Украинада басып алган Запорожье атомдук электр станциясын (АЭС) 21-сентябрга караган түнү да аткылап, электр энергиясын үзгүлтүккө учуратканын станциянын ишине жооптуу украиналык мекеме билдирди.
«Энергоатом» ишканасынын маалыматында иштеп жаткан жалгыз реактор – №6 энергоблоктун жабдыгы жабыркаганы, ал Европадагы бул сыяктуу ири объектилердин бири экени айтылды.
Орусияда жарым-жартылай мобилизация жарыялангандан кийин Москва биржасынын индекси 2100 пункттан ылдый төмөндөдү. Биржа 24-февралдан бери алгачкы жолу ушундай деңгээлде соода жүргүзүүдө. РТС индекси 15-августтан бери биринчи жолу 1100 пункттан ылдыйлады.
Доллар менен евронун рублге карата курсу жогорулоодо.