АКШ Украинага дагы 4 HIMARS жабдуусун берет
Бул тууралуу дүйшөмбүдө Reuters агенттиги өз булактарына таянып билдирди. Агенттик маалыматында HIMARS Украинага жардамдын кийинки баасы 625 долларлык пакетине кирген. Бул тууралуу шейшембиде кабарланды.
Орусиянын Конституциялык соту Украинанын Херсон, Запорожье, Донецк жана Луганск облустарын аннексиялоо боюнча президент Путин жана жикчил аймактардын башчылары кол койгон келишимди мыйзамдуу деп тапты.
30-сентябрда кол коюлган келишимдерге ылайык Орусиянын курамында жаңы төрт субъект пайда болот. Алар ДНР, ЛНР, Херсон облусу жана Запорожье облусу деп аталат.
Эми аннексияны Мамлекеттик Дума жана Федерация Кеңеши 3-4-октябрда атайын конституциялык мыйзам кабыл алып, биротоло мыйзамдаштырары күтүлүүдө.
Конституциялык соттун кайсы бир мүчөсү аннексияга каршы добуш берер-бербеси айтылган жок. 2014-жылы ушул эле орган ушундай схема менен Крым жана Севастополдун аннексиясын колдогон.
30-сентябрда Путин Украинанын Херсон, Запорожье, Донецк жана Луганск облустарын аннекиялап алганын жарыялаган. Аталган облустардын басымдуу аймактарын орус аскерлери басып алган. Андан мурда аталган аймактарда референдум өткөрүлгөн.
Киев жана эл аралык коомчулук Орусиянын Украинанын жаңы аймактарынын аннексиялап алганын тааныбай турганын билдирген. Мындан улам Москвага жаңы санкцияларды киргизүү маселеси каралууда.
Севастопол шаарындагы Орусиянын Бельбек аскердик аэродромунда ири өрт катталып, жарылуунун добушу угулду. Бул тууралуу жергиликтүү маалымат каражаттары жана Телеграмм-каналдар жазды.
Орусия аннексиялап алган Крым жарым аралындагы Севастопол калаасынын башчысы Михаил Развожаев учак аэродромго конуп жатып учуп-конуу тилкесинен чыгып кеткенин жана "ок-дарылар жарым-жартылай жарылганын" билдирди. Развожаев учкуч чыгып кетүүгө жетишкенин кошумчалады. Анын айтымында, өрт тез арада өчүрүлгөн, аэродромдун инфраструктурасы жабыркаган эмес.
9-августта Орусия аннексиялап алган Крымдын Сак районундагы Новофедоровка айылындагы аскердик аэродромдо бир катар жарылуу болгону белгилүү болгон. 16-августта ошол эле Крымда Жанкой аймагындагы ок-дары сакталган кампаларында жарылуулар болгон.
Орусиянын Коргоо министрлиги Новофедоровкадагы окуяны "бир нече авиациялык ок-дарылардын күйүп, жарылышы", ал эми Жанкой районундагы окуяны" диверсия" деп атады.
Украиналык аскерлер Донецк облусундагы Лиман шаарына киришти. Акыркы күндөрү шаар үчүн айыгышкан кармаштар жүргөн. Киев бул кабарды ырастады.
Орусиянын кремлчил Телеграм-каналдары орусиялык аскерлер шаардан чыгып кеткенин жазышууда деп билдирди "Свобода" радиосу. Орусиянын Коргоо министрлиги ишемби күнү түштөн кийин аскерлер "коркунучтан улам коопсуз жакка чыгарылганын" билдирди.
Чеченстандын башчысы Рамзан Кадыров Телеграм-каналында Борбордук аскердик аймакты башкарган генерал-полковник Александр Лапинди айыптап билдирүү жазды. Кадыров Кремлди чек арага жакын аймактарга аскердик абал жарыялап, "анча кубаттуу эмес өзөктүк куралды" колдонууга чакырган.
Ишемби күнү социалдык тармакта Лиманга кирген украиналык аскерлердин видеосу тарады.
Буга чейин украин аскерлери орус күчтөрүнүн колундагы Лиман шаарын толугу менен курчоого алган. Бул тууралуу "Настоящее Время" телеканалына Украинанын Куралдуу күчтөрүнүн атайын даярдыктагы 1-бригадасынын аскери Тарас Березовец билдирген.
Украинанын аскерлери 1-октябрга караган түнү Лиманга өтчү бардык жолдорду жапкан. Курчоого алынган шаарда 5,5 миң орус аскери бар экени кабарланган. Украин күчтөрү аларга багынып берүүнү сунуштаган.
- Лиман орус күчтөрүнүн колуна ушул жылдын май айында өткөн. Бул эң маанилүү темир жол түйүнү жайгашкан шаар. Мындан тышкары шаарды алуу украин күчтөрүнө Луганск облусуна түндүктөн жана батыштан чабуул коюуга жардам берет. Украиналык аскерлер Лиманга чабуулду шаардын түндүк-чыгышындагы Харьков облусундагы ийгиликтүү операциясынан кийин баштаган.
- Жума күнү Орусиянын президенти Владимир Путин украиналык төрт аймакты аннексиялап алганын жар салган.