Түндүк Кореянын Тышкы иштер министрлиги Украинага каршы колдонушу үчүн Орусияга артиллериялык снаряддарды бергенин четке какты. Бул тууралуу Reuters агенттиги жазды.
Өткөн аптада Ак үйдүн өкүлү Жон Кирби бул курал жеткирүүлөр боюнча АКШда маалымат бар экенин билдирген. Кирбинин айтышынча, Вашингтон кырдаалга көз салып турат, бирок ал курал-жарактар Украинадагы согуштун нугу өзгөртип ийе турганчалык чоң көлөмдө болбогону үчүн ал жүктөрдү кайсы бир жолдор менен чектөөнү көздөбөйт.
Түндүк Кореянын бийлиги АКШны өлкөнүн “эл аралык имиджине доо кетирүүгө” аракет кылды деп айыптап, Орусияга эч кандай курал-жарак бербегенин, андай ою да болбогонун билдирди.
Украинанын өкмөтү бизнесмендер Игорь Коломойский, Вячеслав Богуслаев, Константин Жеваго жана Константин Григоришинге байланыштуу стратегиялык ишканаларды мамлекетке өткөрдү. Бул тууралуу Украинанын Улуттук коопсуздук кеңешинин катчысы Алексей Данилов кабарлады.
Мында учактар жана тик учактар үчүн моторлорду чыгарган "Мотор Сич" заводу жана "Укрнафта" мунай өндүрүүчү компаниялары жөнүндө кеп болуп жатат.
Польшанын бийлиги Орусиянын Калининград облусу жана Беларус менен чектешкен жерине АКШнын Куралдуу күчтөрүнүн аскерлери жана тик учактары үчүн база куруу чечимин кабыл алды. Бул тууралуу Польшанын WNP.pl басылмасы кабарлады.
Өлкөнүн вице-премьери жана коргоо министри Мариуш Блащак атайын брифингде кабарлагандай, мында Apache тик учактары менен жабдылган америкалык күжүрмөн авиациялык бригада жайгашат.
Украин президенти Владимир Зеленский бүткүл украиналыктарды Орусиянын жаңы чабуулдарына даяр болууга чакырды. Бул тууралуу ал соңку видео кайрылуусунда айтып, Украина энергетикалык инфратүзүмдөргө урулган соккуларга жооп берерин кошумчалады.