Дүйшөмбүдө БУУнун Башкы ассамблеясы Орусия Украинага репарация төлөшү керек деген резолюцияны кабыл алды. Бул тууралуу Reuters агенттиги кабарлады. Аткарылышы милдеттүү эмес документти 193 мүчөнүн 94ү колдоду. Каршы добуш берген 14 өлкөнүн арасында Беларус, Куба, Иран, Зимбабве бар.
73 мамлекет, анын ичинде Кыргызстандын өкүлү калыс позицияны карманды.
АКШ президенти Жо Байден 14-ноябрда Украинанын Херсон шаарын кайтарып алганын “маанилүү жеңиш” катары баалады. Байден бул тууралуу Кытайдын төрагасы Си Цзинпин менен Индонезиянын Бали аралында өткөн "Чоң жыйырманын" саммитинин алкагындагы маалымат жыйынында билдирди.
Ал Украинадагы окуянын өнүгүшүнө комментарий берип, "украин элинин кайраттуулугун, чечкиндүүлүгүн жана дараметин кубаттай турганын" айтты.
АКШнын президенти Жо Байден жана Кытайдын лидери Си Цзинпин Индонезиянын Бали аралындагы жолугушууда бир нече маселени, анын ичинде Орусиянын Украинадагы согушун талкуулап, жаңжалда өзөктүк куралды колдонууга каршы экенин айтышты. Бул тууралуу маалыматты Ак үй таратты.
Ага ылайык, Орусиянын кол салуусуна тиешелүү теманы Байден козгоду.
"Президент Байден жана төрага Си өзөктүк согуш тутанбашы керектигин, Украинада андай куралды колдонууга же пайдаланылат деген коркутууларга каршы экенин белгилешти", - деп айтылат билдирүүдө.
Украинаны алдыдагы айларда кыйын кезең күтүп жатат, Орусиянын аскердик дараметин эстен чыгарбоо зарыл. Мындай пикирин 14-ноябрда НАТОнун баш катчысы Йенс Столтенберг билдирди.
Ал Херсон шаарын кайтарып алган украин жоокерлеринин “эбегейсиз эрдигин” кубаттады жана Киевге жардам берүүнү улантууга чакырды:
“Алдыдагы айлар кыйын болмокчу. Путин Украинаны кышында жарыксыз, жылуулуксуз калтырууну көздөйт. Биз жолубуздан тайбоого тийишпиз”, - деп айтты Столтенберг Гаагада Нидерланддын премьер-министри менен кездешүүдө.