Украин президенти Зеленскийдин кеңсе башчысынын кеңешчиси Владимир Подоляк Батыш мамлекеттеринин Киевди Орусия менен сүйлөшүүгө көндүрүү аракетин таң калычтуу деп мүнөздөдү.
Ал украин күчтөрү фронтто алдыга жылып жаткан шартта Москва менен сүйлөшүү Киевдин капитуляциясына барабар болорун "Франц-пресс" жаңылыктар агенттигине айтты.
Расмий Москва жана Тегеран ирандык өндүрүштөгү учкучсуз аппараттарды Орусияда чыгарууну макулдашты. Бул тууралуу америкалык The Washington Post гезити Кошмо Штаттардын чалгын кызматындагы үч анонимдүү булакка таянып жазып чыкты.
Маалыматка ылайык, тиешелүү келишиме ноябрдын башында Тегеранда кол коюлган.
Британия Украинага 125 зениттик аткыч, ондогон радар жана дрондорго каршы электрондук жабдыктарды берет. Бул тууралуу британ премьер-министри Риши Сунактын Киевге алгачкы сапарынан соң жарыяланды. Маалыматка ылайык, британ тарап 50 миллион фунтка бааланган абадан коргонуу жабдыктарын да убада кылган.
Өткөн айда ишке кирген Риши Сунак Киевге 19-ноябрда барган. Ал украин президенти Владимир Зеленский менен жолугуп, учурдагы кырдаалды жана согуш аяктагандан кийинки «Украинаны калыбына келтирүү боюнча планды» талкуулаган.
Орусия Украинага кол салгандан бери 437 бала набыт болуп, 837и жаракат алганын Украинанын Башкы прокуратурасы кабарлады.
Маалыматка ылайык, балдардын басымдуу бөлүгү Донецк, Харьков жана Киев облустарында жабыркаган. Бомбалоо жана аткылоодон 2719 билим берүү мекемелери жабыркаган, анын ичинен 322си толук кыйраган.