НАТОго мүчө өлкөлөр Украинага экономикалык жана аскердик жардамын көбөйтөт. Бул тууралуу аскердик бирикменин баш катчысы Йенс Столтенберг түндүкатлантикалык уюмга кирген мамлекеттердин тышкы иштер министрлеринин Бухаресттеги жолугушуусунда билдирди.
Столтенберг НАТОнун мүчөлөрү Киевге керектүү курал-жарактарды, ага тетиктерди жана ок-дарыларды да жеткирүүсүн күчөтөрүн белгиледи. Баш катчы ошондой эле Украинага күйүүчү май, дары-дармек жана кышта керектелүүчү жабдыктарды да берерин тактады.
АКШнын Мамлекеттик департаменти Финляндияга ракеталарды жана авиациялык бомбаларды сатууну, ошондой эле 323,3 миллион долларлык окутуу боюнча кызмат көрсөтүү чечимин жактырды.
Сметага ылайык, Финляндия АКШдан 40 тактикалык ракеталарды жана аны башкаруучу 4 блок, 48 авиациялык бомбаларды, түрдүү машыктыруучу жабдууларды жана башка нерселерди сатып алат. Чечимди эми Конгресс жактырышы керек.
Орусия өзөктүк куралдарды текшерүү боюнча АКШ менен сүйлөшүүлөрдү “бир тараптуу түрдө артка” жылдырды. Бул тууралуу АКШнын Мамлекеттик департаментинин өкүлүнө таянуу менен Reuters агенттиги жазып чыкты.
Эки тараптуу консультативдик комиссиянын жолугушуусу Египеттин борбору Каирде 29-ноябрда болмок.
Украинанын президенти Владимир Зеленский Орусиянын жакын арада жасачу чабуулдарына болжол жасап, алар энергетикалык объектилерине дагы сокку урарын эскертти. Бул тууралуу ал соңку видео кайрылуусунда билдирди.
“Биз террорчулар дагы жаңы соккуларга даярданып жатканын түшүнүп турабыз. Биз муну жакшы билебиз. Тилекке каршы, алар ракеталары түгөнгөнгө чейин тынчышпайт. Бирок биз бири-бирибизге, өзгөчө кары-картаңдарда, балалуу үй-бүлөлөргө, үй-жайсыз калгандарга кам көрөбүз жана жардамдашабыз. Биз ошол нерсебиз менен террорго каршы турабыз”.