Украинанын президенти Владимир Зеленский орусиялык таанымал 119 кишиге санкция салган жарлыкка кол койду.
Өлкөнүн коопсуздук кызматы даярдаган тизмеде режиссёр Никита Михалков, куудул Евгений Петросян, саясат таануучу Александр Дугин, мамлекеттик "Россия сегодня" маалымат агенттигинин жетекчилери Маргарита Симоньян жана Дмитрий Киселёв, алып баруучу Жанна Бадоева, актерлор Дмитрий Дюжев, Дмитрий Харатьян, Михаил Галустян, ырчы Лолита Милявская жана футболчу Анатолий Тимощук бар.
Кошмо Штаттар Украинага кезектеги аскердик жардам үчүн 3 миллиард доллар бөлдү. Бул тууралуу жума күнү кечинде АКШнын мамлекеттик катчысы Энтони Блинкен билдирди.
Каражаттын 682 миллион доллары украин аскерлерине берилген аскердик техниканын ордун толуктоо үчүн НАТОго мүчө өлкөлөргө тапшырылат.
Блинкендин кайрылуусунан кийин Пентагон аскердик жардамдын жаңы пакети тууралуу маалымат таратты. Ага ылайык, төмөнкүдөй аскердик жардам көрсөтүлөт:
- "Брэдли" аскердик техникасынан 50 даана,
- Танкка каршы 500 даана техника 250 миң огу менен,
- MRAP чопкутталган унаадан 55 даана,
- М113 чопкутталган транспортерден (БТР) 100 даана,
- "БУК" зениттик-ракеталык комплексинен атылчу Sea Sparrow "жер – аба" классындагы ракеталар
- "Хаммер" жолтандабас унаасынан 138 даана,
- HIMARS комплекси үчүн М142 ракеталары,
- Абадан коргонуу системалары, артиллериялык ракеталык комплекстер үчүн ар кандай ок-дарылар жана башка курал-жарактар.
Украинанын президенти Владимир Зеленский аскердик жардамдын жаңы "рекорддук пакети" үчүн АКШга жана президент Жо Байденге ыраазычылык билдирди.
"Бул чынында майданда украин армиясын бекемдейт. Украиналыктар үчүн Рождество алдындагы чоң белек болду", - деп Зеленский Твиттерге жазды.
Блинкен ушуну менен АКШнын Украинага жана ага көмөктөшкөн өлкөлөргө көрсөткөн аскердик жардамынын көлөмү 24,9 миллиард долларга жеткенин билдирди.
Кошмо Штаттардын Каржы министрлиги орус армиясына "Шахед" жанкечти дрондорун берүүгө байланышы бар алты ирандык жаранга санкция салды. Бул тууралуу министрликтин басма сөз кызматы билдиргенин "Радио Свобода" жазды.
Анда алты жаран буга чейин АКШнын санкцияларына кабылган Qods Aviation Industries (QAI) компаниясынын жетекчилери экени, бул ишкана согуштук дрондорду Украинада колдонуу үчүн Орусияга берүүгө катышканы айтылат.
Санкциялык тизмеге QAI компаниясынын директорлор кеңешинин төрагасы Сейед Хожатолла Горейши да кирген. АКШнын Каржы министрлиги анын Иранда аскердик изилдөөлөрдү жүргүзүү жана курал-жарак чыгаруу иштерине жооптуу болгонун, дрондорду берүү боюнча Орусия менен сүйлөшүүлөрдү жүргүзгөнүн билдирди.
Тизмеде компаниянын башкаруучу директору, орусиялык аскерлерге "жанкечти" дрондорду колдонууну окутууга жооптуу Хассем Дамавандян да бар. Андан сырткары Иран аэрокосмикалык өндүрүш уюмунун директору Надер Хун Сиаваша да санкцияга илинген.
Буга чейин Украинада ирандык "Шахид-131" жана "Шахид-136" деп аталган "жанкечти" дрондордун колдонулганы белгилүү болгон.
Франция Украинага AMX-10 RC маркасындагы дөңгөлөктүү танкттарды, Bastion үлгүсүндөгү чопкутталган жолтандабастарды берет. Бул тууралуу француз президенти Эммануэл Макрон Твиттердеги баракчасына жазды. Ал украин президенти Владимир Зеленский менен телефондон сүйлөшкөнүн билдирди.
"Жеңиш болмоюнча, Европага тынчтык орномоюнча биздин Украинаны колдообуз мокобойт. Мен муну президент Зеленскийге билдирдим: Франция жеңил танктарды берет жана абадан коргоо жаатында колдоосун улантат", - деп жазды Макрон.
Елисей сарайы бул Батыш мамлекеттеринде жасалган танктарды украин куралдуу күчтөрүнө берген алгачкы учур экенин белгиледи. Азырынча канча танк канча убакытка берилери ачык айтыла элек.
Зеленский Франциядан танк алынарын бышыктады жана тараптар мындан аркы аскердик кызматташууну макулдашканын билдирди.
AMX-10 RC танкын франциялык GIAT компаниясы чыгарган жана негизинен чалгындоо максатында колдонулат. Бул машиналарды француз куралдуу күчтөрү 1981-жылдан тартып колдонот. 2021-жылга карата мындай үлгүдөгү 240тан ашык танк бар экени айтылган.
Bastion чопкутталган жол тандабастарды Acmat компаниясы алгач Африкада иштеген француз атайын кызматтарынын өкүлдөрү үчүн чыгарган. Бул машинанын жаңы үлгүлөрүнө сегиз киши батат.