Череватый: Украин аскерлери Бахмутту коргоону улантууда

Украинанын куралдуу күчтөрүнүн чыгыш тобунун өкүлү Сергей Череватый Бахмут шаарын коргоо үчүн кармаш уланып жатканын билдирди. Ал бул тууралуу Украинанын аскерлеринин шаардан чыгып кетүү ниети тууралуу билдирүүлөргө комментарий берип жатып айтты.

“Украинанын куралдуу күчтөрү, чек арачылар, Улуттук гвардиянын бөлүктөрү Бахмутта коргонууну кармап турушат. Курал, азык-түлүк, дары-дармектерди жеткирүүгө, ал жерден жарадарларды алып чыгууга мүмкүнчүлүк бар”.

Сергей Череватый Орусиянын аскерлери Кременная багытында да чабуулун улантып жатканын кошумчалады.

АКШнын Согушту изилдөө институту (ISW) орус аскерлери Бахмут шаарынын айрым райондорун алууга артыкчылыктуу позицияларды ээлегени менен украин армиясын чегинүүгө мажбур кыла албаганын билдирген.

Украин тарап шаардагы кырдаал оорлошуп баратканын моюнуна алууда. Ага чейин дээрлик толук талкаланган Бахмуттун вице-мэри көчө кармаштары жүрүп жатканын, Орусия шаарды көзөмөлгө албаганын билдирген.

Бахмутта ушул тапта төрт миңдей жайкын тургун кала берүүдө, алар жер төлөөлөрдө жашынып жатат жана көп учурда суусуз, жарыксыз күн көрүп көрүүдө.

Орусия санкцияларды кыйгап европалык микрочип алып жаткан болушу мүмкүн

Бул тууралуу Еврошаркеттин жогорку дипломатына шилтеме берип Bloomberg агенттиги кабарлады. Анын айтымында, соода санкцияларга кошулбаган Түркия, Казакстан жана Бириккен Араб Эмираттары өндүү үчүнчү өлкөлөрдүн ортомчулугу менен ишке ашууда.

Дипломат Брюссел жана Чоң Жетинин жазалоочу чараларына карабай Орусиянын импорту согушка чейинки көлөмгө жетип калганын белгиледи. Импорт азиялык мамлекеттер, анын ичинде Кытайдан да өскөн.

Соода көрсөткүчтөрүнө байкоо салган Женевада жайгашкан эл аралык агенттиктин маалыматына ылайык, былтыр Казакстан Орусияга 3,7 миллион долларга мирокчиптер менен жарым өткөргүчтөрдү саткан. Андан мурдагы жылы 12 миң доллар болчу.

Еврошаркет, АКШ, Британия жана Жапониядан Орусияга жылына 163 миллион долларга электрондук компоненттер тикелей сатылып келген. Өткөн жылы 60 миллионго түшкөн.

Ошол эле аралыкта Орусия Казакстандан, Түркиядан, Сербиядан жана БАЭден электрониканы сатып алууну көбөйткөн. Ал продукцияны дээрлик чыгарбаган бул өлкөлөрдүн Орусияга санкция салган мамлекеттерден импорту кескин өскөн.

Европадагы кайра куруу жана өнүгүү банкынын талдоосуна караганда, Кыргызстан, Армения жана Түркиянын Батыш өлкөлөрүнөн импорту да көбөйгөн. Банктын статистикасына ылайык, Еврошаркеттин, АКШ жана Британиянын Орусияга экспорту былтыркы жылдын май айынан июлга чейин эки эсеге кыскарган. Муну менен бирге Европа менен АКШдан Армения менен Кыргызстанга импорттун өсүшү 80% ашкан.

Бул өлкөлөр ошол эле мөөнөттө Орусияга экспортту да эки эсеге көбөйткөн. Банк бул тенденцияны соодадагы жаңы багыттар менен байланыштырат. Маалыматка караганда, Евробиримдиктен Борбор Азияга машине, электроника, айыл чарба техникасынын экспорту негизинен Казакстандын эсебинен көбөйдү.

"Вагнер" спорттук клубдарда жаңы пункттарды ачты

Орусиянын "Вагнер" аскердик менчик компаниясы 2-4-март күндөрү спорттук клубдардын негизинде согушка жалдаган бери дегенде үч пункт ачты. Бул тууралуу АКШнын Согушту изилдөө институтунун (ISW) маалыматында айтылат. Эксперттер согушкерлерди абактардан жалдоо чектелгенин айтып, муну менен вагнерчилер өз катарларын толуктоону көздөп жаткандай деп белгилешет.

Маалыматка караганда, жаңы пункттар Самарадагы "Динамо", Ростов-на-Донудагы "Антарес" клубдарында жана Тюмендеги Бокс федерациясынын имаратында жайгашкан.

"Вагнер" компаниясы Москвадагы сегиз спорттук клубда андай борборлор ачылганын билдиргенин "Медуза" басылмасы жазган. 2-мартта менчик компанияны түзгөн Кремлге жакын бизнесмен Евгений Пригожин жаңы согушкерлерди жалдоо максатында алар спорт клубдары менен кызматташа баштаганын айткан.

Ушул аптада Санкт-Петербургда "Вагнеренок" деген жаштардын патриоттук клубу иштей баштаганы кабарланган.

Расмий эмес кошуундун жалданма согушкерлери Украинадагы урушка активдүү катышууда. Алардын катарына Орусиянын түрмөлөрүндө отурган борбор азиялык айрым жарандар азгырылган учурлар да бар.

Вагнерчилер украин жергесиндеги көптөгөн согуш кылмыштары үчүн айыпталууда.

Соңку маалыматтарга караганда, украин аскерлерлери Бахмут шаарын коргоону улантууда. Бирок Куралдуу күчтөрдүн Башкы штабынын жекшембиде чыккан бюллетенинде шаардын тагдыры жөнүндө айтылган жок. Ал арада Киев Орусияны согуш кылмыштары үчүн жоопко тартуу аракетин көрүп келатат.

Бахмут шаарынын айланасындагы кырдаал

Украин куралдуу күчтөрүнүн Башкы штабы 5-мартта билдиргендей, акыркы 24 саатта каршы тарап негизги күч-аракеттерин Купянск, Лиман, Бахмут, Авдеевка жана Шахтерск багыттарына жумшады. Маалыматка караганда, ал жактарда украин жоокерлери 130 чабуулдун мизин кайтарышты, кармаштарда 930 орусиялык аскер окко учту. Украин командачылыгы орус армиясы жайгашкан жерлерге 18 сокку урулганын, орусиялык учкучсуз төрт учак атып түшүрүлгөнүн кошумчалады.

“Азаттык” ал сандарды көз карандысыз булактардан дароо бышыктай албайт. Согуш шартында адатта тараптар өз жоготууларын ачыкка чыгарбайт.

Башкы штабдын күндөлүк бюллетенинде Бахмут шаарынын тагдыры эмне болгону айтылган жок. Буга чейин ал жер дээрлик курчоодо калганы маалымдалган.

Украин армиясынын өкүлдөрү шаардагы кырдаал оорлошуп баратканын моюнуна алып келатат.

Украинанын Чыгыш күчтөрү тобунун басма сөз катчысы Сергей Череватый 4-мартта CNN телеканалына аскерлер Бахмутту дагы эле көзөмөлдөп жатканын айтты. "Азаттыктын" украин кызматынын маалыматына караганда, Череватый "украин аскерлери жапырт чыгарылган жок" деп билдирди.

Ага чейин дээрлик толук талкаланган Бахмуттун вице-мэри көчө кармаштары жүрүп жатканын, Орусия шаарды көзөмөлгө албаганын билдирген. Бахмутта 4 миңдей жайкын тургун кала берүүдө, алар жер төлөлөрдө жашынып, айрымдары аман калган үйлөрдө көп учурда суусуз, электржарыгысыз күн көрүп келатат.

ISW: Орус аскерлери жакын арада Бахмутту ала албайт

АКШнын Согушту изилдөө институту (ISW) ишембинин кечинде чыгарган маалыматка ылайык, орус аскерлери Бахмуттун айрым райондорун алууга артыкчылыктуу позицияларды ээлегени менен украин армиясын чегинүүгө мажбурлай алган жок. Эксперттер жакын арада алар Бахмутту курчоого ала албайт деп эсептешет.

Институттун талдоочулары украин күчтөрү аскерлерин Бахмуттун оор кармаштар жүрүп жаткан аймактарынан чыгарып кетүү үчүн шарттарды түзүп жатышы мүмкүн, бирок украин командачылыгы учурда чегинүү чечимин кабыл алды деп айтууга далил жок экенин жазышты.

Орусиялык булактар согушка «Вагнер» тобунун даярдагынан өткөн бөлүктөрү салынып жатканын маалымдашты.

Орусия тарап Бахмут жана анын айланасындагы ырдаал тууралуу маалымат тараткан жок.

Орусиянын коргоо министри Сергей Шойгу согуш жүрүп жаткан аймакка барып, Түштүк-Донецк багытындагы "Чыгыш" деп аталган аскер бөлүктөн кабар алганы ишембиде маалымдалган.

Жекшембиде эртең менен орус аскерлери Купянск шаарына сокку урганын, бир киши набыт болгонун, төрөт үйүнө жана окуу жайына зыян келтирилгенин Харьков облусунун башчысы Олег Синегубов Телеграм-каналына жазды. Анын айтымында, бир күн мурда түн ичинде болгон аткылоолордон шаарда бери дегенде 5 турак жай, чарбалык курулуштар талкаланды.

Көптөгөн далилдерге карабай, Москва согуш башталгандан бери жарандык жайларга сокку урбаганын айтып келет.

Орусияны согуш кылмыштары үчүн жоопко тартуу аракети

4-мартта Европа парламентинин төрайымы Роберта Мецола согуш кылмыштары боюнча эл аралык конференция өтүп жаткан Львов шаарында келип кетти. Төрайым Украинадагы согуш кылмыштарына күнөөлүү адамдар жоопко тартылууга тийиш деп билдирди.

Киев өнөктөштөрү менен Орусияны жана жетекчилигин соттоо үчүн эл аралык трибунал түзүүнү көздөйт.

Украинанын биринчи айымы Олена Зеленская Башкы прокуратура орус аскерлери украин жергесинде жасаган 171 сексуалдык кылмышты териштирип жатканын конференцияда билдирди.

"Башкы прокуратура украиналыктар кабылган сексуалдык зомбулук боюнча 171 фактыны иликтеп жатат жана бул көрсөткүч аялдарга гана тиешелүү эмес, жабыркагандардын арасында 39 эркек жана 13 жашы жете элек бала бар. Арасында бир эркек бала да бар. Биз бул окуяларды ошол адамдар баштарынан кечиргенди айтып берүүгө күч тапкандыктан гана билебиз. Өзгөчө окупацияланган аймактарда дагы канчасы унчукпай кыйналып жүргөнүн билбейбиз".

Анкара дан келишимин узартууну көздөйт

Ал арада жекшембиде Түркиянын тышкы иштер министри Мевлүт Чавушоглу Анкара Орусия Украинага басып киргенден кийин блокадага алынган порттордон арпа-буудайды экспорттоого жол ачкан демилгени узартуу үчүн аракет көрүп жатканын билдирди.

Өткөн июлда Улуттар Уюму жана Түркиянын ортомчулугу менен түзулгөн демилге ишке ашырылып, украин портторунан дан чыгарыла баштаган. Ноябрда узартылган келишим 18-мартта соңуна чыгат. Орусия өзүнүн айыл чарба азыктарын өндүрүүчүлөрүнүн кызыкчылыктары эске алынганда гана келишимди узартарын айтууда.