Швеция, Норвегия, Финляндия жана Дания бириккен аскердик-аба күчтөрүн түзүү макулдашуусуна кол койду. Түндүк Европа өлкөлөрү 250 кыргын салуучу учактарды, абадан коргонуу жана чалгын системаларын чогуу иштете турган болушту.
Даниянын Аскердик-аба күчтөрүнүн командири, генерал-майор Ян Дам Reuters агенттигине билдиргендей, мындай чечим Орусиянын Украинадагы согушунун фонунда кабыл алынды.
Түндүк өлкөлөр Орусия тараптан болчу ыктымал коркунучка чогуу каршы турушат.
Макулдашууга Германиянын Рамштайн аскердик базасында кол коюлду. Ага НАТОнун Аскердик-аба күчтөрүнүн командири, генерал Жеймс Хекер да катышты.
Түндүк Европа өлкөлөрү саясий, экономикалык жана маданий байланышта болгону менен аскердик мамиледе ар кайсы статуста болгон. Дания 1949-жылдан бери НАТОдо мүчө, ал уюмдун негиздөөчүлөрүнүн бири.
Финляндия менен Швеция буга чейин нейтралитет макамында келишкен. Орусия Украинага кеңири масштабда кол салган соң аталган өлкөлөр НАТОго кошулууга арыз беришкен. Норвегия НАТОго мүчө, бирок калган үч өлкө кирген Евробиримдикке кошулган эмес.
Владимир Зеленский: Биз Украина үчүн жүздөгөн жылдарга созулган, биздин элдин ар бир мууну үчүн кармаштын чечүүчү этабында турабыз
Президент бул тууралуу 24-мартта Улуттук гвардиянын Киев институтун аяктаган офицерлердин бүтүрүүчү аземинде айтты.
"Улуттук гвардия биздин мамлекеттин эң маанилүү чечүүчү элементи болуп калды. Украинаны душман колуна бербеген негизги күч. 24-февралда башталган согуштун биринчи мүнөтүнөн баштап эле украиналыктар Донбасста чыныгы украиналык күчтү көргөздү. Украинаны сактап каларыбызга, украин элине тынчтык жана эркиндикти камсыздап берерибизге күмөн санабайм. Бул жыйынтыкты тезинен көрсөтүшүбүз керек. Биздин жеңишти алдыга жылдыруу керек", - деген Зеленскийдин сөзүн "Интерфакс-Украина" мисал келтирди.
- 24-марттын түнү Орусияга Украинага ракета жана учкучсуз учактар менен ондогон сокку урду. Каза тапкандар бар.
- Украина Орусияга оор жараат алган туткундарды өткөрүп берди.
- Орусиянын коопсуздук кызматынын майору Украинага согушка баруудан качканы үчүн 6,5 жылга соттолду
- Украинада 2022-жылдын 24-мартынан бери каза болгон орусиялык 18 023 аскердин аты-жөнү белгилүү болду.
Украинанын Константиновка калаасына урулган соккуда набыт болгондор саны беш кишиге жетти. Мурдараак үч аял набыт болгону айтылган. Өзгөчө кырдаалдар кызматы дагы эки эркек каза тапканын маалымдады.
Башкы прокуратура Орусиянын күчтөрү С-300 зениттик-ракеталык комплексинен урулган соккуда өлгөндөр катуу кармаш жүрүп жаткан Бахмут шаарынан жер которуп келгендер экенин билдирген.
Донецк облусунда жайгашкан Константиновка шаарындагы көзөмөл-өткөрүү пунктуна 24-мартка караган түнү ракета атылган.
Орусия ушул түнү Украинанын Кривой Рог калаасына да дрондон сокку урду. Днепропетровск облусунун аскердик админстрациясынын башчысы Сергей Лысак жабыркагандар жоктугун билдирди.
Анын айтымында, орустар колдонгон ирандык "Шахед" учкучсуз учактарынын бирин украиналык аскерлер атып түшүрдү. Андан тышкары, шаар беш зениттик ракета менен аткыланды. Кол салуунун кесепети иликтенип жатат.