Эл аралык валюта фондунун директорлор кеңеши жума күнү, 31-мартта Украинага төрт жолку транш менен 15,6 миллиард доллар берүүнү колдоду. Reuters агенттиги бул каражат жалпы суммасы 115 миллиард долларды түзгөн эл аралык жардамдын бир бөлүгү экенин билдирди.
Аталган фонддун биринчи траншы, тактап айтканда 2,7 миллиард доллары жакынкы убакта берилет жана каражат Украинанын чукул керектөөлөрүнө жумшалат.
Бул Эл аралык влюта корунун согушуп жаткан өлкөгө көрсөткөн биринчи жардамы болуп калды.
Украинанын финансы министри Сергей Марченко уюмга ыраазычылык билдирди жана бөлүнгөн каражат өлкө эконмикасын, каржы системасын бекемдөөгө салым кошорун айтты.
"Биз фонддун директорлор кеңешине бул чечими үчүн ыраазычылык билдиребиз. Учурда Украина Эл аралык валюта фонду жана өнөктөш өлкөлөр менен кызматташуунун жаңы этабында турат",-деди Марченко.
Орус армиясынын Украинанын Донецк облусуна караштуу Авдеевка шаарын аткылоосунан беш айлык наристе менен анын чоң энеси набыт кетти. Бул тууралуу аталган облустун аскердик администрациясынын башчысы Павел Кириленко Телеграм-каналына жазды. Анын ырасташынча, бул үй-бүлө коопсуз жайга убактылуу көчүп кетүүгө такыр көнбөй койгон.
Наристе менен анын 69 жаштагы чоң апасынын мерт болгону тууралуу маалыматты Башкы прокуратура дагы ырастады жана бул окуяга байланыштуу иликтөө башталганын билдирди.
Буга чейин Украинанын Башкы штабы Белогоровка, Бахмут, Авдеевка жана Марьинка согуштук аракеттердин очогу бойдон калып жатканын маалымдаган.
Жон Кирби америкалыктарды Орусиядан чыгып кетүүгө чакырды
Кошмо Штаттарынын Улуттук коопсуздук кеңешинин өкүлү Жон Кирби америкалыктарды коопсуздук үчүн Орусиядан кетүүгө чакырды. Анын сөзүн CNN телеканалы таратты.
"Азыр америкалыктар Орусияда жүрчү маал эмес. Эгер сиз иш менен же эс алып жүргөн болсоңуз, сапарыңыздын кандай гана максаты болсо дагы Орусиядан азыр кетишиңиз керек. Орусия сиз үчүн жакшы жай эмес. Орусия азыр америкалык жарандар үчүн душман чөйрө. Эгер сиз ал жакта жүрсөңүз чукул кетишиңиз керек”, - деген Кирби.
Ал ошондой эле президенттин администрациясы Орусияда камакка алынган журналист Эван Гершкович менен жолугушууга аракет көрүп жатканын белгиледи.
Мунун алдында АКШнын мамлекеттик катчысы Энтони Блинкен дагы америкалык жарандарды Орусиядан чыгып кетүүгө, бул өлкөгө барбай турууга үндөгөн.
Украин аскерлери Киев облусундагы Буча шаарын орус күчтөрүнөн бошотконуна бир жыл толду.
"Бучаны бошоткондо азезил башка жакта эмес, жерде экенин көрдүк. Дүйнө басып алынган аймактардагы коркунучтуу кылмышка күбө болду. Биз бул согуштун курмандыктарын эч качан унутпайбыз жана орусиялык киши өлтүргүчтөрдү жоопко тартууну талап кылабыз", - деди Украинанын президенти Владимир Зеленский бул күнгө байланыштуу кайрылуусунда.
Зеленский Словакия, Хорватия, Словения жана Молдованын лидерлери менен бирге орус оккупациясында курман болгондорду эскерүү үчүн жума күнү Бучага барды.
Словакиянын премьер-министри Эдуард Гегер, Словениянын премьер-министри Роберт Голоб, Хорватиянын премьер-министри Андрей Пленкович жана Молдованын президенти Майя Санду менен Бучада курман болгондордун элесине урмат көрсөтүштү.
Украинанын Башкы прокуратурасынын маалыматында, орус армиясы Бучадагы жана Буча районундагы баскынчылык учурунда 9 миңдей аскер кылмышын жасаган. 1400 жай тургун каза болгон. Москва Бучадагы үрөй учурган көрүнүштөр үчүн Киевди күнөөлөгөн.