Украинанын президенти Владимир Зеленский 5-апрелде Варшавага расмий сапар менен баруну пландап жатканын Польшанын президенти Анжей Дуданын кеңсеси билдирди.
Зеленский поляктар жана ал жакта жашаган украиндер менен Падышалык сарайда жолугушат.
Азырынча Киев бул тууралуу маалымат бере элек.
Орусия Украинага басып киргенден бери Польша Украинага ырааттуу каржылык, коргонуу жана гуманитардык колдоо көрсөтүп келүүдө. Польша - эң көп украин качкындарына баш калка берген өлкөлөрдүн бири.
Согуш башталганы Зеленский АКШга, Британияга, Францияга жана Бельгияга барып келди.
Орусиянын мамлекеттик жалпыга маалымдоо каражаттары аскердик кабарчы делген Владлен Татарскийди (өз аты Максим Фомин) жардырууга шек саналгандардын тек-жайы аныкталганын, Тергөө комитети “Адам өлтүрүү” беренеси менен кылмыш ишин козгогонун билдирди.
Маалыматка ылайык, Санкт-Петербургда кафедеги жардырууну 26 жаштагы Дарья Трепова жасаган. Тергөө Владлен Татарский сүйлөп жаткан кафеге жардыргыч зат орнотулган статуэтка салынган кутуну Дарья Трепова алып келген деп эсептейт.
Медиа каражаттары Дарья Трепованын жолдошу Дмитрий Рылов да издөөгө алынганын кабарлашты. Бирок ал Санкт-Петербургда кафедеги жолугушууга катышкан эмес. Ал жардырууну уюштурууга катышкан деп шек саналууда.
Маалым болгондой, Трепов менен Рылов былтыр февралда Санкт-Петербургдагы согушка каршы митингде кармалып кайра коё берилген.
Жекшемби күнү Санкт-Петербургдун борборундагы кафеде жардыруу болгон. ТАСС агенттиги “Стрит-бар” деген кафеде жардыргыч зат менен дүрмөттөлгөн жабдык иштетилгенде бир киши каза таап, 16сы жабыркаганын жазган.
Жардыруудан аскердик кабарчы аталган Владлен Татарский (өз аты Максим Фомин) мерт кеткен. Кафеде анын чыгармачыл кечеcи өтүп жатканы айтылды.
Татарский буга чейин Донбасста орусиячыл күчтөрдүн катарында согушуп, ал жактан репортаж даярдап келген. Украин маалымат каражаттары аны кремлчил пропагандачы деп аташат.
Санкт-Петербургдун борборундагы кафеде жекшембиде жардыруу болгонун орусиялык маалымат каражаттары жазды.
ТАСС агенттиги шаардын чукул кызматтарына шилтеме менен маалымдагандай, "Стрит-бар" деген кафеде жардыргыч зат менен дүрмөттөлгөн жабдык иштетилгенде бир киши каза тапты, 16сы жабыркады.
“Фонтанка” сайты өз булактарына таянып, жардыруудан аскердик кабарчы Владлен Татарский (өз аты Максим Фомин) мерт кеткенин билдирди. Кийин бул маалыматты шаардык милициянын басма сөз кызматы бышыктады.
ТАСС билдиргендей, тартип коргоо органдары Татарский бутага алынганын белгиледи. Кафеде анын чыгармачыл кечеcи өтүп жаткан. Колго жасалган жардыруучу жабдык ага тартууланган айкелченин ичине катылган.
Татарский буга чейин Донбасста орусиячыл күчтөрдүн катарында согушуп, ал жактан репортаж даярдап келген. Украин маалымат каражаттары аны кремлчил пропагандачы деп аташат.
Орусиялык медиа кечеге 100 чакты киши катышып жатканы маалымдалды.
Социалдык тармактардын колдонуучулары дем алыштарда "Стрит-барга" "Кибер Z фронт" деген талкуу клубу чогулуп турарын жазышты.
Ал эми “Фонтанка SPB Online” Телеграм-каналы билдиргендей, ал кафе мурда бизнесмен Евгений Пригожинге таандык болчу.
Пригожин “Вагнер” менчик аскердик компаниясынын негиздөөчүсү.
Донецк облусундагы Константиновка шаарында ракета соккусунан алты киши набыт болгонун украин президентинин администрация башчысы Андрей Ермак билдирди.
«16 көп кабаттуу турак жай, 8 жер там, бала бакча, салык инспекциясынын имараты, газ тутүктөрү, 3 машина зыян тартты», - деп жазды Телеграм-каналына Ермак. Анын айтымында, орус армиясы шаарга С-300 зениттик-ракета системасынан жана «Ураган» системасынан сокку урган.
Украин куралдуу күчтөрүнүн Башкы штабы 2-апрелдеги бюллетенинде орус армиясы мурдагыдай эле Лиман, Бахмут, Авдеевка жана Марьинка багыттарында чабуул коюп келатканын билдирди. Штабдын маалыматына караганда, аскерлер акыркы 24 саатта ал жактарда 70 чабуулдун мизин кайтарышты.
Каршы тарап Бахмутту алуу аркеттерин улантып, шаардын борбордук бөлүгүндө кармаштар жүрүп жатканы кабарланды.
Орусиянын Коргоо министрлиги жекшемби күнү Донецк, Луганск жана Запорожье облустарындагы согуштук аракеттер тууралуу маалымдап, Константиновкага чабуулду комментарийлеген жок. Москва жарандык жайларды бутага албаганын айтып келет.
Херсон облусунда орус аскерлеринин соккуларынан бир карапайым киши мерт кеткенин, экөө жарадар болгонун аймактын администрациясы билдирди. Маалыматка ылайык, алты жолу калк жашаган кварталдар аткыланды.