Денис Шмыгаль: Контрачабуул жакын арада башталат
"Эч нерсе биздин контрчабуул жасоо планыбызга таасир этпейт. Биздин максат - жеңиш, биздин максат украиналык аймакты 1991-жылда белгиленген чек арага чейин бошотуу. Биз контрчабуул жакын арада болоруна ишенебиз. АКШ бизди колдоп жатат", - деди Украинанын премьер-министри.
Буга чейин Шмыгаль украин контрчалгыны жайга чейин жылышы мүмкүн экенин айткан.
Ал арада Орусия дагы Украинанын контрчабуулуна даярдык көрүп жатканы кабарланууда. Maxar компаниясы спутниктен тарткан Крымдын сүрөттөрүнөн Орусиянын чептери жана окоптору көрүнүп турат. Эксперттер жарым аралдан орус күчтөрүн сүрүп чыгаруу украин аскерлери үчүн кыйынга турарын эскертүүдө. Киев бийлиги Москва 2014-жылы аннексиялап алган Крымды кайтарып алууну көздөп жатат.
Крым: Орусиянын согушка даярдыгы
Украинанын Донецк облусундагы Славянск шаарын орусиялык аскерлердин аткылоосунан сегиз жай тургун каза таап, 21 киши жараат алганын облустук аскердик администрациясынын башчысы Павел Кириленко 14-апрелде билдирди.
"Өлгөндөрдүн арасында эки жаштагы бала бар. Тилекке каршы урандылардын алдынан алып чыккан соң, наристени сактап кала албадык", - деп жазды Кириленко Фейсбуктагы баракчасына.
Украинанын Донецк облусундагы Славянск шаарын орусиялык аскерлердин аткылоосунан сегиз жай тургун каза таап, 21 киши жараат алганын облустук аскердик администрациясынын башчысы Павел Кириленко 14-апрелде билдирди.
"Өлгөндөрдүн арасында эки жаштагы бала бар. Тилекке каршы урандылардын алдынан алып чыккан соң, наристени сактап кала албадык", - деп жазды Кириленко Фейсбуктагы баракчасына.
Орусиянын Москва облусунун Звенигород шаарындагы мечитте 14-апрелдеги жума намаздан кийин Украинадагы согушка үндөгөн баракчалар таратылды. Бул тууралуу кыргызстандык мигрант “Азаттыкка” билдирип, бир нече сүрөт жиберген. Анын айтымында, жума намаздан кийин мечиттен чыгып бараткан ар бир адамга баракчалар таратылган. Бирок мигранттардын көбү дароо эле ыргытып жиберишкен.
Анын биринчи бетинде орус президенти Владимир Путин менен Сауд Арабиянын ханзаадасы Мухаммед ибн Салмандын сүрөтү түшүрүлүп, Орусия ислам өлкөлөрүнө жардам берүүгө аракет кылып келгени жазылат. Ага улай эле “балким мусулман элдери Орусияга жардам бере турган учур келгендир” деген сүйлөм кетет.
Буга чейин Орусиядагы мигранттарды Украинадагы согушка чакыруу активдешкени кабарланган.
Борбор Азия өлкөлөрүнүн, анын ичинде Кыргызстандын бийлиги чет жактагы согуш аракеттерине катышкандардын жоопкерчилиги карала турганын эскертип келет.
Орус аскерлери Украинанын Херсонду оккупациялоо учурунда шаарда жана анын айланасында жашагандарды мыйзамсыз кармап, кыйноого алышкан. Бул тууралуу Human Rights Watch эл аралык укук коргоо уюму жарыялаган баяндамада айтылат.
Укук коргоочулардын корутундулары кыйноого кабылгандардын жана алардын жакындарынын сөздөрүнө негизделген. Алардын айтымында, орус аскерлери адегенде орой тинтүү жүргүзүшкөн, андан кийин тургундардын баштарына баштык кийгизип алып кетишкен. Андан ары камакта сактай турган жерлерге алып кетишкен. Херсондо 20 жер камак катары колдонулган.
Камактагылар жыгач жана резина таяктар менен сабалган, өлүм менен коркутулган, медициналык жардам көрсөтүлгөн эмес.
Орусиялык сакчылар камактагыларга Орусияны даңазалаган ураандарды айтууга, Орусиянын гимнин ырдоого мажбурлаган.
Украин аскерлерди Херсон облусунун бир бөлүгүнөн орус күчтөрүн былтыр ноябрда сүрүп чыккан.
Орусия былтыр 24-февралда Украинага кол салгандан бери жайкын тургундарды бутага алганын четке кагып келет.