Өткөн түнү орусиялык чабуулдардын натыйжасында Украинанын Донецк облусунда бир адам каза таап, дагы экөө жарадар болду. Бул тууралуу облустук аскер администрациясынын башчысы Павло Кириленко бейшембиде Телеграм каналга жазды.
Анын айтымында, соккуларда Константиновка айылынын тургуну курман болду.
Херсон облусунун аскер админстрациясынын башчысы бул аймактагы чабуулдарда алты жайкын тургун жараат алганын маалымдады.
Расмий маалыматта айтылгандай, акыркы бир суткада 300гө жакын снаряд атылган. Херсон шаары беш жолу аткылоого кабылган.
"Түштүк" ыкчам командачылыгынын басма сөз катчысы Наталья Хуменюк Орусия жаңы чабуулдар үчүн учкучсуз учактарды камдап жатканын, бирок ал дрондордо украин аскерлери тааный ала турган белгилер бар экенин билдирди.
Шаршембиде Одесса облусуна Иранда жасалган "Шахед" дрондору менен чабул жасаганда айрым имараттар зыян тарткан.
АКШнын Коргоо министрлиги Украинага 325 миллион долларлык аскердик жардамдын жаңы пакети берилерин билдирди. Анын алкагында HIMARS ракеталык системаларына ок-дары, танктарга каршы системалар, миналар, артиллериялык снаряддар, жогорку тактыктагы авиациялык ок-дарылар, порттордун коопсуздугун камсыздоого керектүү жабдуулар, тетиктер жана талаа-түзгө керектүү буюмдар бар.
"Кошмо Штаттары өнөктөштөрү жана союздаштары менен коопсуздук жаатында жана согуш талаасында Украинанын болгон керектөөсүн канааттандыруу үчүн бирге иштөөнү уланта берет", - деп жазылган маалыматта.
Ушул айдын башында Вашингтон Украинага 2,6 миллиард долларга бааланган жардам берилерин билдирген. Анда HIMARS жана Patriot системаларынын ок-дарыларылары, артиллериялык снаряддар, 400 гранатамед, жүк ташыган машиналар, чиркемелер жана башкалар болгон.
Украинанын бийлиги өткөн жылдын аягынан тартып контрчабуулга даярдык көрүлүп жатканын айтып келет. Киев мындан улам Батыштан заманбап курал-жарак сураган. Акыркы айлары бир катар өлкөлөр Украинага жаңы үлгүдөгү танктарды, аскердик машиналарды берген. Ошондой эле согуш башталгандан бери биринчи жолу МиГ-29 үлгүсүндөгү кыргын салуучу учактарды алган.
Орусия Украинага 2022-жылы 24-февралда кол салган.
БУУнун Адам укуктары боюнча жогорку комиссариаты (OHCRH) Орусия Украинага каршы согуш ачкандан бери 8500 карапайым кишинин өлүмү ырасталганын билдирди жана реалдуу сан мындан көп болушу мүмкүн экенин билдирди.
Орусия согуш ачкандан бери өлкө болжол менен 700 млрд. доллар чыгым тартканын өлкөнүн Башкы прокуратурасы билдирген. Миңдеген адамдар набыт болуп, он миңдеген адамдар баш калкасыз калды.
Украина 19-апрелде алгачкы Patriot абадан коргонуу системаларын алганын билдирди.
Коргоо министри Алексей Резников "Бүгүн биздин ажайып украин асманыбыз коопсузурак болуп калды, анткени Украинага Patriot абадан коргонуу системалары келди" деп Твиттердеги баракчасына жазды.
Министр абадан коргонуу күчтөрү Patriot системаларын башкарууну өздөштүрүүгө тез машыктырылганын жазып, системаны жеткирүү тууралуу "убадасын аткарган" АКШ, Германия жана Нидерландга ыраазычылык билдирди.
Patriot дүйнөдөгү эң алдыңкы системалардын бири жана учактарды, баллистикалык жана канаттуу ракеталарды жерден атууга кудуреттүү.
Украинанын Кара деңиз портторунан эгинди коопсуз экспорттоо үчүн БУУнун ортомчулугу менен түзүлгөн келишимге ылайык, кемелерди текшерүү кайра жанданууда. Украинанын вице-премьер-министри Александр Кубраков шаршемби күнү “Орусиянын келишимди бузуу аракетине карабастан, кемелерди текшерүү кайра башталууда” деп социалдык тармактарга жазды.
Маалыматка караганда, 18-апрелде Стамбулдун жээгинде дан жүктөлгөн 35тен ашык кеме кезек күтүп турган.
Орусиянын РИА Новости агенттиги БУУнун Координация борборуна таянып, эки күндүк сүйлөшүүдөн кийин текшерүү уланганын кабарлады.
Былтыр июлда дүйнөлүк азык-түлүк кризисин алдын алуу максатында макулдашылган Кара деңиз дан демилгесинин статусун талкуулоо үчүн Кубраков Түркияда жүрөт. Москва келишимди 18-майга чейин гана узартууга макул болгон. Киев жана Улуттар Уюму келишим андан кийин дагы 60 күн иштерин айтып, анын үзгүлтүккө учурабашын камсыздоо жолдорун издеп жатат.
Киев орусиялык инспекторлор Украинадан дан ташыган кемелерди өткөрбөй койгонун билдирди. Айыл чарба министри Николай Солский шаршемби күнү Москва Украина үчүн кыйынчылыкты күчөтүп жатканын айтты.
Ушу тапта Чыгыш Европанын үч өлкөсү украин буудай-арпасын жана азык-түлүктөрүн импорттоого убактылуу тыюу салган.
"Албетте, орустар бул жагдайды колдонбой кое алган жок", - деди Солский журналисттерге.
РИА Новости шаршемби күнү Орусиянын Тышкы иштер министрлигине шилтеме менен Украина менен Улуттар Уюму кемелерди текшерүүдө кыйынчылыктарды жаратып жатканын билдирди.
Ала арада Киев менен Варшава 22-апрелден тартып Польшанын аймагы аркылуу дан ташууну кайра жандантууну макулдашты.
Согушка байланыштуу Украинанын товарлары 2024-жылдын жайына чейин бажы төлөмдөрүнөн бошотулгандыктан, ал жактан чыккан айыл чарба продукциясы арзан болууда. Натыйжада жергиликтүү дыйкандардын продукциясы мурдагыдай өтпөй калган.