Европа Биримдиги жаңы санкциялар топтомунда Орусия аркылуу жүк ташууга тыюу салуунун мөөнөтүн узартты. Бул тууралуу Bloomberg жаңы санкциялык сунуштар менен тааныш болгон жашыруун булактарга таянуу менен билдирди.
Маалыматка ылайык, Орусия аркылуу үчүнчү өлкөлөргө жүк ташууга толук тыюу салынбайт, бир катар технологияларга жана жабдуулардын түрлөрүнө чектөөлөр киргизилиши күтүлүүдө.
Bloomberg агенттигинин маалыматына караганда, Польша, Эстония жана Литва Евробиримдиктен Орусиянын аскердик өнөр жай комплексинде, авиациялык жана космостук тармактарында колдонула турган жүктөрдү Орусия аркылуу ташууга толук тыюу салууну суранууда. Бул жүктөрдүн тизмеси ачык айтыла элек.
Буга чейин Орусияга чектеш Европа мамлекеттеринин Борбор Азия өлкөлөрү менен соода жүгүртүүсү кыйла өскөнү журналисттик иликтөөлөрдө аныкталган. Эксперттердин айтымында, Орусия тыюу салынган товарларды үчүнчү өлкөлөр аркылуу алып, Батыштын санкцияларынан буйтап өтүп жатат.
Испаниянын түндүгүндөгү Сантандер портунан Украинага алты Leopard 2A4 танкы жана 20 M114 бронетранспортер 21-апрелде жөнөтүлдү.
Reuters агенттиги Leopard танктары жана чопкутталган техника Нидерланддын Bore Wave кемесине жүктөлүп жаткан сүрөттөрдү жарыялады.
Маалыматка караганда, кеме Польшага аскердик техниканы жеткирип, ал жерден Украинага өткөрүлөт.
Коргоо министри Маргарита Роблес ушул айдын башында Испания Украинага жалпысынан он даана Leopard 2A4 танкын жөнөтөрүн айткан.
Украиналык адистер Испаниянын түндүк-чыгышындагы Сарагоса шаарындагы аскердик базада техниканы башкарууну үйрөнүштү.
НАТОнун башка өлкөлөрү, анын ичинде Германия, Польша жана Португалия Украинага жалпысынан 48 Leopard 2 танкын жөнөтүүнү убада кылган.
Германия бийлиги орусиялык дипломаттарды жапырт мамлекеттен чыгарууда. Deutsche Welle каналы бул “орусиялык тыңчылардын санын азайтуу” максатында жасалганын Германиянын Тышкы иштер министрлигине таянып кабарлады. Reuters агенттиги ишемби күнү Орусиянын өкмөттүк учагынын Берлинге келиши ушул маселеге байланыштуу экенин жазды.
Орусиянын Тышкы иштер министрлиги да 20дан ашуун немис дипломатын өлкөдөн чыгарып жатканын 22-апрелде маалымдап, бул немис тарап мурдараак кабыл алган ушундай эле чечимге жооп экенин билдирди.
Март айында Focus басылмасы Германия 30дан ашык орус дипломатын өлкөдөн чыгарууну карап жатканын жазган. Анда немис коопсуздук органдары орусиялыктар дипломатиялык кол тийбестик укугунан пайдаланып, "саботаж иштерин даярдап, жалган маалымат таратуу үчүн кишилерди жалдоодо" деген тыянакка келишкен.
Бир жыл мурун да Германия орусиялык 40 дипломатты персона нон грата деп жарыялаганда Орусия дагы 40 немис дипломатына карата ушундай чечим кабыл алган.
Былтыр орус күчтөрү Украинага басып киргенден кийин Москванын Европадагы айрым элчиликтеринде чалгын кызматынын өкүлдөрү иштеп жүргөнү аныкталган. Бир жарым жылдай убакыттан бери АКШ жана Европа мамлекеттери 200дөн ашуун орус дипломаттарын мекенине кайтарды. Алардын жүрүм-туруму “коопсуздук чараларына каршы келгени” белгиленген. Орусия да ушундай жооп кайтарган.
Орусиянын президенти Владимир Путиндин басма сөз катчысы Дмитрий Песковдун уулу Николай Песков “Вагнер” жеке аскердик компаниясынын катарында Украинадагы согушка катышып, Орусиянын “Эрдик” медалын алганын билдирди. Бул тууралуу ал “Комсомольская правда” басылмасына айтты.
Анын сөзүнө караганда, ал “Ураган” ракета системасынын экипажында кызмат өтөгөн. Буга чейин “Вагнердин” жетекчиси Евгений Пригожиндин басма сөз кызматы Дмитрий Песковдун уулуна аскерде кызмат өтөө сунушу берилбегенин кабарлаган. Пригожин Николай Песков согушка жасалма документ менен катышканын айтууда.
Владимир Путин 2022-жылдын 21-сентябрында аскерге мобилизация жарыялагандан кийин “Популярная политика” порталы Николай Песков менен байланышкан. Песков анда аскерге чакыруу кагазын алганын, бирок аскер комиссариатына барбай турганын билдирген.
Ал “Комсомольская правда” басылмасына берген соңку интервьюсунда ошол учурда эле согушка барууга камынып жатканын айтып берген.