Москва шаардык соту теракт жасады деп айыпталган Дарья Трепованы камактан күрөөгө бошотуу өтүнүчүн четке какты. Ал Санкт-Петербургдагы кафелердин биринде болгон жардырууга жана блогер Владлен Татарскийдин (Максим Фомин) өлүмүнө байланыштуу камалган.
"Мен болгон ишке өкүнөм. Күн сайын жаракат алгандардын ден соолугу үчүн тиленип турам", - деген Трепова жабык жараянда.
Сотто Трепованын адвокаты камакка алуу чечимин жокко чыгарууну суранды. Бирок бул өтүнүч четке кагылды.
Тергөөнүн маалыматына ылайык, Санкт-Петербургда кафедеги жардырууну 26 жаштагы Дарья Трепова жасаган. Алар кафеде Владлен Татарский сүйлөп жатканда жардыргыч зат орнотулган статуэтка салынган кутуну Дарья Трепова алып келген деп эсептейт.
Медиа каражаттары Дарья Трепованын жолдошу Дмитрий Рылов да издөөгө алынганын кабарлашкан. Бирок ал Санкт-Петербургда кафедеги жолугушууга катышкан эмес. Ал жардырууну уюштурууга катышкан деп шек саналууда.
2-апрелдеги жардыруудан каза болгон Владлен Татарский буга чейин Донбасста орусиячыл күчтөрдүн катарында согушуп, ал жактан репортаж даярдап келген. Украин маалымат каражаттары аны кремлчил пропагандачы деп аташат.
Орусия бул ишти Украинанын атайын кызматы пландаганын, ага Алексей Навальныйдын фонду менен кызматташкан агенттер катышканын билдирген. Украина мындай айыптоону четке кагып, Санкт-Петербургдагы жардырууну “Орусиядагы ички жаңжалдын бир бөлүгү” деп сыпаттаган.
Украинанын аскерлери Бахмуттагы стратегиялык позицияларын сактап турат. Бул тууралуу Украинанын чыгыштагы аскер күчтөрүнүн командири Александр Сырский Telegram каналына жазды.
"Бул жердегилер - баатырлар. Орустар оор жоготууларга учурап жатат. Биз алардын жеке курамына сокку уруп, чабуулдук потенциалын жок кылып жатабыз", - деп жазган Сырский.
Донецк облусунун башчысы Павел Кириленко соңку бир сутканын ичинде орус күчтөрүнүн чабуулунан улам Бахмутта эки жай тургун мерт болуп, дагы экөө жаракат алганын кабарлады.
23-апрелде Орусиянын Коргоо министрлиги Бахмут шаарынын батыш бөлүгүндөгү эки районду басып алганын билдирген. Ал эми “Вагнер” жалданма жоочулардын жетекчиси Евгений Пригожин шаарды дээрлик толугу менен көзөмөлгө аларын утур-утур айтып келет. Бирок жогорудагы маалыматтарды көз карандысыз булактардан бышыктоо мүмкүн эмес.
Орус күчтөрү Херсон облусуна чабуулун күчөтүп, бир сутканын ичинде украин жоокерлери турган аймактарды аткылаган. Алар украин аскерлери Днепрдин сол жээгиндеги позицияларды ээлегени айтылгандан кийин активдешкен.
Мындай маалыматты Америкалык согушту изилдөө институту жарыялаган. Украинанын Куралдуу күчтөрүнүн басма сөз борбору бул маалыматты төгүндөгөн да, тастыктаган да эмес.
Жекшембиде Америкалык согушту изилдөө институту (Institute for the Study of War) тараткан билдирүү эң көп талкууланган темалардын бири болду. Анда “орусиялык күчтөр Херсондон кеткенден кийин украин аскерлери окупацияланган аймактын сол жээгин ээлегени” айтылат.
Билдирүү ачык булактарда жүргөн видеодогу геомаалыматка негизделген. Анда “Украин куралдуу күчтөрүнүн убактылуу туруму” орусиялык аскерлер тарабынан аткылоого алынганы көрсөтүлгөн. Бул тасма Днепрдин Херсон тушундагы сол жээгинен тартылган.
Ошондой эле ушул эле аймактан украин аскерлери кайык менен Днепрден өтүп жаткан видео тарады.
Ал эми көз карандысыз аскер аналитиктери Херсонго жакын жердеги Днепрдин сол жээгин Украинанын куралдуу күчтөрү көзөмөлүнө алды деген кабар күмөн жаратарын айтууда. Кеп байланыш жолдору жок, саздак жерлер жөнүндө жүрүп жатканын, украин күчтөрү туруктуу таяныч пунктун түзүүгө техникалык жактан мүмкүн эмес дейт айрым аскер эксперттери. Муну бир жолку чалгындоо операциясы болушу мүмкүн деп жатышат. Орус армиясы Днепрдин сол жээгиндеги калктуу конуштарды таштап кеткени тууралуу маалымат көп айтылып келгени менен ал ырасталган эмес.
Орус армиясы Херсон облусунун көп бөлүгүн 2022-жылы февраль айынын соңунда басып алган. 30-сентябрда Херсон менен кошо Украинанын Луганск, Донецк, Запорожьени Кремль күч менен аннексиялап алганын жарыялаган. Бул кадамды эл аралык коомчулук бир ооздон айыптап, Түндүк Кореядан башка бир да мамлекет тааныган эмес.
Стратегиялык деп саналган Херсон шаарында согушка чейин 300 миңдей адам турчу. Алардын көбү Орусия басып киргенде чыгып кетүүгө үлгүргөн.
Европа Биримдиги жаңы санкциялар топтомунда Орусия аркылуу жүк ташууга тыюу салуунун мөөнөтүн узартты. Бул тууралуу Bloomberg жаңы санкциялык сунуштар менен тааныш болгон жашыруун булактарга таянуу менен билдирди.
Маалыматка ылайык, Орусия аркылуу үчүнчү өлкөлөргө жүк ташууга толук тыюу салынбайт, бир катар технологияларга жана жабдуулардын түрлөрүнө чектөөлөр киргизилиши күтүлүүдө.
Bloomberg агенттигинин маалыматына караганда, Польша, Эстония жана Литва Евробиримдиктен Орусиянын аскердик өнөр жай комплексинде, авиациялык жана космостук тармактарында колдонула турган жүктөрдү Орусия аркылуу ташууга толук тыюу салууну суранууда. Бул жүктөрдүн тизмеси ачык айтыла элек.
Буга чейин Орусияга чектеш Европа мамлекеттеринин Борбор Азия өлкөлөрү менен соода жүгүртүүсү кыйла өскөнү журналисттик иликтөөлөрдө аныкталган. Эксперттердин айтымында, Орусия тыюу салынган товарларды үчүнчү өлкөлөр аркылуу алып, Батыштын санкцияларынан буйтап өтүп жатат.