25-апрелде Орусиянын ракеталык чабуулунан Украинанын Купянск шаарындагы аймак таануу музейинин имараты талкаланып, бир киши каза болду. Дагы он киши жараат алганын Харьков облустук аскер башкармалыгынын жетекчиси Олег Синегубов билдирди. Каза болгон адам - музейдин кызматкери.
Снегубов сокку С-300 ракетасынан урулган болушу ыктымалдыгын билдирди.
Украинанын президенти Владимир Зеленский маркумдун үй-бүлөсүнө көңүл айтып, согуш кылмыштарын жасагандар ырайымсыз жазаланарын айтты.
Орусия Купянскидеги чабуул тууралуу комментарий бере элек.
Украинанын чыгышындагы Бахмут, Марьинка жана башка калааларда салгылашуу уланууда.
Кошмо Штаттары, Жапония, Британия жана Европа Биримдигине мүчө айрым мамлекеттер Бириккен Улуттар Уюмунун (БУУ) Коопсуздук Кеңешин реформалоого чакырды. Мындай кайрылуу дүйшөмбүдө, 24-апрелде Орусиянын тышкы иштер министри Сергей Лавров Нью-Йоркто аталган кеңешке төрагалык кылган жыйында айтылган.
Лавров анда"дүйнө кансыз согуш маалындагыдай эле кооптуу чекке жетип калды" деп билдирди. Ошондой эле, БУУда Батыш өлкөлөрүнүн өкүлдөрү өтө көп экенин, башка аймактардан аз болгонун айтып, бул "эл аралык мамиледиги көп тараптуулук принцибине доо кетирет" деген оюн айтты. Министр Орусиянын Украинага кол салышындагы жоопкерчиликти дагы Киев менен Вашингтонго жана алардын өнөктөштөрүнө жүктөдү.
АКШнын өкүлү Линда Томас-Гринфилд Орусия согуш баштап, дан келишимдерин токтотуу менен БУУнун уставындагы принциптерди одоно бузуп жатат деп белгиледи. Андан сырткары Орусияда камакка алынган америкалык жарандар тууралуу маселе козгоп, аларды чукул арада бошотуу керектигин айтты. Томас-Гринфилд БУУну реформалоого чакырды. Анын бул сөзүн Британия, Жапония жана Евробиримдиктин айрым мүчөлөрү колдоду.
Орусия БУУнун Коопсуздук Кеңешине ушул айда - апрелде төрагалык кылууда. Аталган кеңешке мүчө 15 өлкө бул милдетти ар бир айда кезектешип аткарат. Москва акыркы ирет Коосуздук кеңешине 2022-жылдын февраль айында төрагалык кылган.
Москва шаардык соту теракт жасады деп айыпталган Дарья Трепованы камактан күрөөгө бошотуу өтүнүчүн четке какты. Ал Санкт-Петербургдагы кафелердин биринде болгон жардырууга жана блогер Владлен Татарскийдин (Максим Фомин) өлүмүнө байланыштуу камалган.
"Мен болгон ишке өкүнөм. Күн сайын жаракат алгандардын ден соолугу үчүн тиленип турам", - деген Трепова жабык жараянда.
Сотто Трепованын адвокаты камакка алуу чечимин жокко чыгарууну суранды. Бирок бул өтүнүч четке кагылды.
Тергөөнүн маалыматына ылайык, Санкт-Петербургда кафедеги жардырууну 26 жаштагы Дарья Трепова жасаган. Алар кафеде Владлен Татарский сүйлөп жатканда жардыргыч зат орнотулган статуэтка салынган кутуну Дарья Трепова алып келген деп эсептейт.
Медиа каражаттары Дарья Трепованын жолдошу Дмитрий Рылов да издөөгө алынганын кабарлашкан. Бирок ал Санкт-Петербургда кафедеги жолугушууга катышкан эмес. Ал жардырууну уюштурууга катышкан деп шек саналууда.
2-апрелдеги жардыруудан каза болгон Владлен Татарский буга чейин Донбасста орусиячыл күчтөрдүн катарында согушуп, ал жактан репортаж даярдап келген. Украин маалымат каражаттары аны кремлчил пропагандачы деп аташат.
Орусия бул ишти Украинанын атайын кызматы пландаганын, ага Алексей Навальныйдын фонду менен кызматташкан агенттер катышканын билдирген. Украина мындай айыптоону четке кагып, Санкт-Петербургдагы жардырууну “Орусиядагы ички жаңжалдын бир бөлүгү” деп сыпаттаган.
Украинанын аскерлери Бахмуттагы стратегиялык позицияларын сактап турат. Бул тууралуу Украинанын чыгыштагы аскер күчтөрүнүн командири Александр Сырский Telegram каналына жазды.
"Бул жердегилер - баатырлар. Орустар оор жоготууларга учурап жатат. Биз алардын жеке курамына сокку уруп, чабуулдук потенциалын жок кылып жатабыз", - деп жазган Сырский.
Донецк облусунун башчысы Павел Кириленко соңку бир сутканын ичинде орус күчтөрүнүн чабуулунан улам Бахмутта эки жай тургун мерт болуп, дагы экөө жаракат алганын кабарлады.
23-апрелде Орусиянын Коргоо министрлиги Бахмут шаарынын батыш бөлүгүндөгү эки районду басып алганын билдирген. Ал эми “Вагнер” жалданма жоочулардын жетекчиси Евгений Пригожин шаарды дээрлик толугу менен көзөмөлгө аларын утур-утур айтып келет. Бирок жогорудагы маалыматтарды көз карандысыз булактардан бышыктоо мүмкүн эмес.
Орус күчтөрү Херсон облусуна чабуулун күчөтүп, бир сутканын ичинде украин жоокерлери турган аймактарды аткылаган. Алар украин аскерлери Днепрдин сол жээгиндеги позицияларды ээлегени айтылгандан кийин активдешкен.
Мындай маалыматты Америкалык согушту изилдөө институту жарыялаган. Украинанын Куралдуу күчтөрүнүн басма сөз борбору бул маалыматты төгүндөгөн да, тастыктаган да эмес.