Украинанын президенти Владимир Зеленский Кытайдын төрагасы Си Цзинпин менен телефондон сүйлөшкөнүн билдирди.
Ал "бул маңыздуу сүйлөшүү Украинанын Кытайга жаңы элчисин дайындоо менен катар эки тараптуу мамилелерди өнүктүрүүгө түрткү болоруна ишенерин" Твиттерге 26-апрелде жазды.
Зеленский менен Си Орусия Украинага толук масштабдуу басып киргенден бери биринчи жолу сүйлөштү.
Си Цзинпин мартта Москвага мамлекеттик сапар менен барган. Анын фонунда маалымат каражаттары Кытай төрагасынын украин лидери менен сүйлөшүү ниети бар экени тууралуу да жазышкан.
Владимир Зеленский Си Цзинпинди Украинага келип кетүүгө чакырганын март айында Associated Press агенттиги кабарлаган.
Февралда Бээжин 12 пункттан турган "тынчтык формуласын" сунуш кылгандан кийин Зеленский Кытайдын лидери менен бетме-бет сүйлөшүүгө кызыкдар экенин айткан.
Бээжин Украинадагы согушту колдогон эмес, бирок Москванын аракетин да сындабайт. Орусияга салынган эл аралык санкцияларга кошулган эмес.
Украинанын Куралдуу күчтөрүнүн Башкы штабы Орусия негизги күч-аракетин Бахмут, Марьинка жана Авдеевкада чабуулдарын күчөтүү үчүн топтоп жатканын билдирди.
26-апрелде эртең менен таратылган расмий кабарга ылайык, акыркы бир суткада Украинанын аймагына орус күчтөрү 49 жолу ракеталык, 13 аба соккусун урду. 39 чабуулдун мизи кайтарылды.
Украина орус аскерлеринин Богдановка, Хромово, Клещиевка, Марьинка жана Авдеевка багытындагы чабуулдары ийгиликсиз болгонун маалымдады.
Башкы штаб акыркы бир суткада Запорожье жана Херсон облустарындагы 40тан ашуун конуш аткыланганын билдирди. Кизомыс кыштагында эки үй, чиркөө талкаланды. Ондон ашуун турак жай зыян тартты.
Украин авиациясы орус аскерлери топтолгон жерлерге алты сокку урганы, Орусиянын Zala жана "Орлан-10" чалгындоочу учкучсуз учактары атып түшүрүлгөнү айтылат расмий маалыматта.
Орусия буга комментарий бере элек.
Согуштун шартында "Азаттык" радиосу салгылаш жүрүп жаткан аймактардагы маалыматтарды өз алдынча текшере албайт.
Орусиянын прокуратурасы жарандарды согушка мыйзамсыз мобилизациялоо боюнча 15 миң учурду каттаганын ТАСС агенттиги Орусиянын башкы прокурорунун биринчи орун басары Анатолий Разинкинге таянып жазды. Анын айтымында, учурда аскерге чакыруу боюнча бардык негизсиз иш-чаралар токтотулду.
Сибирь.Реалии басылмасы жазгандай, Коргоо министрлиги жарыялаган өткөн жылдын сентябрынан бери мобилизация болгондордун санына таянсак, дээрлик ар бир жыйырманчы аскер комиссариат тарабынан мыйзамсыз аракеттерге дуушар болгондугу аныкталган.
Өткөн жылы 21-сентябрда Владимир Путин Украинадагы согушту улантуу үчүн жарым-жартылай мобилизация жарыялаган. Расмий маалымат боюнча анда 300 миңден ашык адам согушка тартылган. Бул учурда өлкө аймагында бир катар мыйзам бузуулар, атап айтканда, көп балалуу аталар, ден соолугу начар адамдар, аскердик даярдыгы жоктор жана белгиленген жаш курактан улуулар да тартылган учурлар орун алган.
Былтыр жыл сонуңда көптөгөн нааразылыктардан кийин Мамлекеттик Думанын коргоо комитетинин төрагасы Андрей Картаполов мыйзамсыз мобилизацияланган 10 миң адам үйүнө кайтарылганын билдирген.
Украин күчтөрүнүн жетекчилеринин бири эмнеге Бахмутту кармап турганын айтты
Украинанын жердеги аскерлеринин башкармалыгы Александр Сырский "Интерфакс – Украина" агенттигине украин аскерлери эмнеге Донецк облусундагы Бахмут шаарын орусиялык чабуулга карабай коргоп турганын айтты.
Сырскийдин түшүндүрмөсүндө Бахмут стратегиялык жактан ыңгайлуу гана эмес коргонуу үчүн географиялык өзгөчөлүккө ээ. Шаар адырда жайгашкан жана анын айланасында дарыялар агып турат. Генерал Бахмутту коргоо менен украиналык аскерлер орусиялык күчтөрдү Лисичанск жана Донецк багыттарына киргизбей турганын билдирди.
Александр Сырский Бахмуттагы орусиялык күчтөр тактикасын өзгөрткөнүн айтты. Алар азыр анча чоң эмес топко бөлүнүп, оор техникасы жок жүрөт. Жоготуу болгон учурда дароо катарын толукташууда. Дрондор активдүү колдонулуп, украин аскерлеринин позициясы киргизилген Alpine Quest GPS тиркемелерин колдонушууда. Артиллериялык аткылоо тынбай болуп жатат.
Генерал орусиялык аскер жетекчилер азыр Бахмутта чабуул койчу отряддарды түзүп, аларды анча көп эмес миномет жана ок чыгаруучу куралдар менен камсыздап жатканын билдирди. Ошол эле маалда танктарды да колдонушууда.