Подоляк: Орусияда украин дрону жок эле бир нерсе болуп жатат
Украинанын президентинин кеңсе башчысынын кеңешчиси Михаил Подоляк Твиттерге "украин дрондору Кремлге чабуул койду" деген маалыматты мындайча комментарийледи:
"Кремлдин үстүндөгү дрондор... Мунун баары белгилүү болчу. Орусия ири масштабдагы теракт даярдап жатат. Ошон үчүн Крымдагы сыягы ири диверсиялык топту кармап атат. Андан кийин "Кремлдин үстүндөгү дрондор" тууралуу көрсөттү. Биринчиден, Украина коргонуу үчүн согушуп жатат жана Орусиянын аймагындагы объекттерге сокку урган жок. Анын эмне кереги бар? Бир дагы аскердик көйгөйдү чечпейт. Экинчиден, биз Орусиянын ар кайсы аймагында авария жана кырсыктар көбөйгөнүнө көз салып турабыз. Учкучсуз учактардын энергетика объекттеринде же Кремлдин аймагында пайда болушу партизандык кыймылдар жаралганынан кабар бериши мүмкүн. Белгилүү болгондой учкучсуз дрондорду каалаган дүкөндөн сатып алса болот. Путиндин кланынын өлкөдөгү көзөмөлдү жоготкону айкын. Экинчи жагынан Орусия буга чейин эфирди толук көзөмөлдөп турганын айтты. Орусияда украин дрондору жок эле бир нерсе болуп жатканы анык".
Киевде жана Украинанын бир катар аймактарында 3-майда саат 16:30дар чамасында абадан эскертүү жарыяланды.
Коркунуч тууралуу эскертүү борбордук аймактан тышкары, Днепропетровск, Харьков, Чернигов, Кировоград, Полтава, Сумы, Черкассы жана Запорожье облустарында угулганын "Азаттыктын" украин кызматы жазды.
Абадан эскертүү улам башка аймактарга жайылып, бийлик жарандардан баш калкалоочу жерлерге бекинүүнү суранууда.
Таңга маал украин президентинин кеңсеси "Орусия ачыктан-ачык масштабдуу террордук акт даярдап жатканын" эскерткен.
3-майга караган түнү Киев шаары учкучсуз учуучу аппараттардын чабуулуна кабылган. Шаарда жана ага жакын жайгашкан облустарда абадан коркунуч жаралганы тууралуу эскертүү берилген.
Украинанын Херсон шаарын жана облустагы калктуу конуштарды 3-майда орус күчтөрү аткылаганда 20дай адам набыт болду. Бул тууралуу Украинанын Башкы прокуратурасы билдирди.
Расмий маалыматта айтылгандай, орус аскерлери шаршембиде саат 16:30дарда облус борборундагы жарандык инфраструктураларга сокку урганда 12 киши өлүп, 20дан ашууну жараат алган. Күндүз Степановка жана Музыковка кыштактарын ортосунда энергетиктердин бригадасы бутага алынганда үч адистин өмүрү кыйылган. Анын алдында Дарьевка кыштагына чабуул жасалып, бир адам курман болгон.
Мурдараак Херсондо иштеп жаткан жападан-жалгыз "Эпицентр" гипермаркетине урулган соккуда үч киши - кардарлар жана дүкөн кызматкерлери мүрт кеткени кабарланган.
Киевде жана Украинанын бир катар аймактарында 3-майда кечке жуук абадан эскертүү жарыяланды. Бийлик жарандардан баш калкалоочу жерлерге бекинүүнү суранууда.
Таңга маал украин президентинин кеңсеси "Орусия ачыктан-ачык масштабдуу террордук акт даярдап жатканын" эскерткен.
3-майга караган түнү Кремлге украиналык дрондор чабуул коюп, алардын мизи кайтарылганын Орусиянын президенти Владимир Путиндин басма сөз кызматы билдирди. Киев муну четке какты.
Украинанын президентинин кеңсеси Кремлге дрондор менен жасалган чабуулуна Киевдин тиешеси жоктугун билдирди.
"Бизде Кремлге болгон түнкү чабуул тууралуу маалымат жок. Президент Зеленский бир канча жолу айткандай, Украина бардык күч жана каражатын башка аймакка чабуул коюуга эмес, өз аймагын бошотууга жумшап жатат", - деди мамлекет башчынын басма сөз катчысы Сергей Никифоров.
3-майга караган түнү "эки украиналык дрон Орусиянын президенти Владимир Путиндин резиденциясына сокку урууга аракет кылганын" Кремлдин басма сөз кызматы шаршембиде кабарлаган.
Орус медиасы дрондор Кремлди көздөй багытталганын, аскердик жана чалгын кызматтары алардын мизин кайтарганын жазган.
Кремл бул чабуулду "пландалган террордук акт" жана "Жеңиш майрамынын алдында президентке кол салуу аракети" деп атады.
"Орус тарап каалаган жерде жана качан жооп чараларды көрүү укугун өзүнө калтырат", — деп айтылат билдирүүдө.
Москванын мэри Сергей Собянин Орусиянын баш калаасында дрон учурууга тыюу салынганын жарыялады. Бирок бул чектөөнүн бул мамлекеттик органдар колдонгон учкучсуз учактарга тиешеси жок.
"Кремлди бутага алды" деген дрондор кандай көлөмдө жана кандай үлгүдө экенин, алар кайдан учурулганын жана Москванын борборуна кандайча багытталганын орус бийлиги азырынча түшүндүрө элек.