Казакстан Орусияга өткөрүлгөн электроника товарларына бажы көзөмөлүн күчөттү. Казакстан аркылуу Өзбекстандан дагы товарлар алынчу.
Бул эки мамлекет тең Samsung, LG, Bosch, Electrolux сыяктуу компаниялардын ири импортоочусу болуп эсептелинип келген.
Соодагерлер электрониканы Кыргызстан, Кытай жана Бириккен Араб Эмираттарынан ташый баштагандыктан, Орусияда баа 10-12% кымбаттады.
Казакстан Орусияга салынган санкцияларды айланып өтүүгө өз аймагын колдонууга жол бербестигин апрель айынын башында тышкы иштер министринин орун басары Роман Василенко билдирген. Анын айтымында, 1-апрелден баштап Орусияга импорттолгон товарларды көзөмөлдөгөн система иштеп баштады.
Расмий маалыматка ылайык, Орусия менен Казакстандын ортосундагы товар жүгүртүүнүн көлөмү 2022-жылы эки миллиард долларга жогорулап, 26 миллиард долларды түзгөн.
Буга чейин Евробиримдик Орусияга каршы санкциялардын 11-айлампасында Москвага чектөөлөрдү бузуп өтүүгө көмөк көрсөтүп жаткан үчүнчү мамлекеттерге да чара көрүшү мүмкүндүгү, алардын арасында Казакстан да бар экени кабарланган.
Украинанын чыгышында AFP маалымат агенттигинин видеожурналисти Арман Сольден мерт болду. Бул тууралуу агенттик Твиттердеги баракчасы аркылуу билдирди.
Анда "Арман Сольдендин өлүмү тууралуу кабарга кабыргабыз кайышып турат",- деп жазылган.
AFP Сольден Донецк облусундагы Часов Яр шаарындагы ракеталык чабуулдун айынан мерт болгонун тактады. Аны менен кошо жүргөн төрт кабарчы жабыркаган эмес.
Боснияда туулган Сольден 32 жашта болгон жана эмгек жолун AFP агенттигинин Римдеги бюросунда баштаган. Ал 2015-жылы Лондонго көчүп келген.
Былтыр сентябрда Сольден AFP агенттигинин Киевдеги бюросунда видеокоординатор болуп дайындалган. Ал Твиттердеги баракчасына акыркы билдирүүнү 8-майда калтырган жана анда жараат алган украин жоокерлери жана Бахмуттага талаа госпиталынын иши тууралуу жазган.
Өткөн айдын аягында Херсондо италиялык La Repubblica басылмасынын кабарчысы Коррада Зуниного согушту чагылдырууга жардам берип жүргөн украиналык журналист Богдан Битик мерт болгон. Зунино ийнинен жараат алган. Аталган басылма журналисттерди Антонов көпүрөсүнүн анча алыс эмес жерде көзгө атарлар бутага алганын билдирген.
Журналисттердин эл аралык федерациясынын эсебинде, Орусия Украинага согуш ачкандан бери дегенде 13 журналист мерт болду, дагы 18и жараат алды. Набыт болгондор арасында "Азаттыктын" украин кызматынын Киевдеги кабарчысы Вера Гирич дагы бар.
Кошмо Штаттарынын Коргоо министрлиги Украинада Орусиянын үндөн бир канча эсе ылдам учкан "Кинжал" ракетасы Patriot системасынын жардамы менен атып түшүрүлгөнүн ырастады. Бул тууралуу Пентагондун басма сөз өкүлү Пэт Райдер билдирди.
Мунун алдында Украинанын Аскер-аба күчтөрүнүн кол башчысы Николай Олещук 3-майдан 4нө караган түнү Patriot менен үндөн бир канча эсе ылдам учкан "Кинжал" ракетасы Киевге жасалган чабуул маалында жок кылынганын бышыктаган.
Ага чейин Defense Express басылмасы "Кинжал" атып түшүрүлгөнүн жазып чыккан. Журналисттер Киевдеги стадиондордун бириндеги ракетанын сыныктарынын сүрөтүн жарыялаган. Анда басылма бул маалыматты ишенимдүү булактардан алганын билдирген.
Орус армиясы "Кинжал" ракетасы кадимки үндөн беш эсе ылдам уча аларын, абадан коргонуу системаларына кармалбастан 2 миң чакырым алыстыктагы бутага сокку ура аларын билдирип келет.
Европа Комиссиясы Орусияга Украинага каршы согуш ачканына байланыштуу санкциялардын 11-топтомунун долбоорун кабыл алды. Бул тууралуу уюмдун төрайымы Урсула фон дер Ляйен Киевде украин президенти Владимир Зеленский менен жолугушуудан кийин маалымат жыйында билдирди.
Анын ырасташынча, санкциялардын кезектеги пакети үч элементтен турат. Биринчисинде, тыюу салынган товар, буюм-тайымдардын тизмесин кеңейтүү каралган. Экинчисинде, үчүнчү өлкөлөрдүн санкцияларды кыйгап өтүшүн тыйган жаңы ыкмалар болот, ал эми үчүнчүсүндө, Орусиядагы жана үчүнчү өлкөлөрдөгү санкцияларды буйтап өткөн "көмүскө" уюмдарга чектөөлөр салынат.
Урсула фон дер Ляйен Еврошаркетке мүчө өлкөлөр менен үчүнчү мамлекеттердин ортосунда "адаттан тыш соода жүгүртүү" көбөйгөнүн, анын аягы Орусияга барып такаларын белгиледи жана буга байланыштуу чара көрүлүшү мүмкүндүгүн эскертти.
"Эгер биз европалык товарлар үчүнчү өлкөгө жөнөтүлүп, андан соң Орусияга жеткен болсо Еврокомиссия мүчө мамлекеттерге бул товарларды экспорттоого тыюу салууну сунушташы мүмкүн", -деп эскертти.
Мунун алдында Politico басылмасы санкцияларга карабай техникалардын Орусияга ташылып жатышын токтотуу үчүн Евробиримдик Казакстан, Өзбекстан, Кытай жана Түркияга чара көрүшү мүмкүн экенин жазган. Уюм мындай чараны санкциялардын 11-топтомуна киргизиши ыктымал экени көрсөтүлгөн. Буга чейин чектөөлөр Орусиянын өзүнө гана киргизилип келген.
Батыш мамлекеттери тыюу салынган техника Борбор Азия өлкөлөрү аркылуу Орусияга кирип жатат деп күмөн санайт.