Украин аскерлери Бахмутта жаңы позицияны ээлешти
Жекшембиде украин аскерлери Бахмуттун түндүк жана түштүк тарабындагы аймактарды бошотту. Бул тууралуу Украинанын коргоо министринин орун басары Анна Маляр Телеграм-каналына жазды.
"Биздин бөлүктөр бүгүнкү күндө душмандын ондогон позициясын ээледи. Иванов районундагы токойдун аймагын тазалашты. Каршылаш тараптан туткунга түшкөндөр бар", - деп жазды Маляр. Ал шаардын аймагында кармаш уланып жатканын кошумчалады. Анын айтымында орусиялык күчтөрдүн шаарды курчоо аракети ишке ашпайт.
Буга чейин Украинанын президентинин кеңсесинин башчысынын кеңешчиси Михаил Подоляк немистердин Bild журналына Бахмутту бошотуу Украинага контрчабуулга өтүүгө жол ачарын билдирген.
Украинанын президенти Владимир Зеленский Германиядагы сапарынын алкагында президент Франк-Вольтер Штайнмайер менен жолугушту.
"Заманбап Украинанын эң оор учурларында Германия эркиндикти жана демократиялык баалуулуктарды коргоо үчүн украин элинин тарабында турган, чыныгы дос жана ишенимдүү өнөктөш экенин далилдеди. Биз бирге жеңебиз жана Европага тынчтыкты кайтарабыз", - деп жазды Зеленский президенттик резиденциядагы кадырлуу коноктордун китебине.
Мындан кийин ал канцлер Олаф Шольц менен жолугушту. Германиянын борборунда Зеленскийдин сапарына байланыштуу коопсуздук чаралары күчөтүлүп, транспорт кыймылдарына чектөө киргизилди.
Украин лидери Берлинге жекшембиге караган түнү Италиядан учуп келди. Анын учагын Германиянын аскердик авиациясы коштоп жүрдү.
Мунун алдында Германия Киевге Орусия басып киргенден бери рекорддук аскердик жардам пакетин жарыялаган. 2,7 млрд. долларлык аскердик жардам украин лидеринин Берлинге ыктымал сапарынын алдында берилүүдө.
Зеленский менен Шольц Берлинден кийин Аахен шаарына сапар алышары күтүлүүдө. Ал жакта украин лидерине Европа Биримдигине кошкон салымы үчүн Улуу Карл атындагы сыйлык тапшырылат.
Украинанын президенти Владимир Зеленский 13-майда Италияга барып, бул өлкөнүн президенти Сержио Маттарелла жана премьер-министр Жоржия Мелони менен сүйлөшүү жүргүзгөнүн өзүнүн Телеграм-каналына жазган.
"Украинаны колдоодогу ырааттуу позициясы үчүн ыраазычылык билдирем. Биз мамлекетибизге Орусиянын агрессиясына каршы турууга мүмкүнчүлүк берген маанилүү аскердик жардамды баалайбыз. Италия бул согушта чындык тарапта болгон жана болуп жатат", - деген ал билдирүүсүндө.
Италиянын премьер-министри Жоржия Мелони басма сөз жыйынында согушта Украина жеңишке жетишерине ишеним артып, Орусия Украинанын аймагынан чыгып кетиши керектигин кошумчалады.
"РБК-Украина" сүйлөшүүлөрдө "Украинанын аба мейкиндигин коргоо боюнча маанилүү чечимдер" тууралуу кеп болгонун Зеленскийдин айткандарына шилтеме кылып жазды. Сүйлөшүүлөр тууралуу башка маалымат берилген жок.
Зеленскийдин айтымында, Мелони менен сүйлөшүүдө "тынчтык формуласын" ишке ашыруу талкууланган.
"Биз талкуулаган үчүнчү маселе - Европадагы кызматташтык. Италия Орусиядан энергетикалык жактан көз карандысыздыгын бекемдөө менен маанилүү нерсе жасады. Санкциялар мунун элементтеринин бири", - деди Зеленский.
Ушул эле күнү кечинде Зеленский Рим папасы Франциск менен жолугушкан.
Украинанын Херсон облусунун Миролюбовка айылындагы айыл чарба ишканаларынын биринде снаряд жарылып, беш киши каза болду. Алардын бардыгы жайкын тургундар. Эң жашы 27, улуусу 68 жашта болгон.
Украин президентинин кеңсесинин башчысы Андрей Ермак Орусиянын бомбалоосунан кийин жарылбай калган снаряд ишке киргенин билдирди.
Херсон облусунун прокуратурасы согуш мыйзамдарын жана салттарын бузуу фактысы боюнча кылмыш ишин козгоду.
"РБК-Украина" билдиргендей, орус армиясы соңку суткада Херсон облусуна 400 снаряд таштаган, жыйынтыгында алты киши жабыркады.
Ишемби күнү Орусиянын аба күчтөрү Бериславга эки авиабомба таштаган. Аткылоодон улам шаар жарыксыз калды.
Бахмуттагы кырдаал
Украинанын министринин орун басары Анна Маляр Телеграмда украин бөлүктөрү алдыга жылып жатканын билдирди.
"Душман жок кылынып, кайра орду толукталып жатат. Кармаштардан улам жоготуулардын так санын айтуу оор. Кырдаал оор. Биздин коргоочуларыбыз шаарды каршылашка бербей турат", - деди Маляр.