Бен Уоллес: Киев Storm Shadow ракеталарын колдонду
Британиянын коргоо министри Бен Уоллес Украина алыска атыла турган Storm Shadow канаттуу ракеталарын колдоно баштаганын билдирди. Лондон Киевге берген бул ракеталар 250-290 чакырымдык аралыкта сокку урууга жөндөмдүү. Ага чейин Украинага алыска уча алган GMLRS ракеталарын берилген. Ал саатына 80 чакырымга чейин учат.
Уоллес Норвегиянын коргоо министри Бьорн Арильд менен сүйлөшкөндөн кийин берген пресс-жыйында "Менин маалыматымда Украинага жөнөтүлгөнү айтылгандан кийин Storm Shadow ракетасы колдонулду" деп билдирди. Уоллес бирок кандайдыр бир маалымат берүүдөн баш тартты.
Норвегиянын коргоо министри Украинага Arthur радарынан үчтү, алыска атыла турган жапырт ок чыгаруучу ракета системасынан (РСЗО) сегизди бере турганын билдирди. "Украинанын эли туруктуулукту көрсөтө алды. Алардын кармашы - биздин демократия, эркиндик, коопсуздук үчүн кармаш", - деп билдирди Бьорн Арильд Грам.
19-майда Жапониянын Хиросима шаарында “Чоң жети” блогуна кирген өлкөлөрдүн жетекчилеринин саммити башталат.
Reuters агенттиги үч күнгө созулган жыйынга Британиянын, Германиянын, Италиянын, Канаданын, Франциянын, Жапониянын жана АКШнын лидерлери катышарын жазды.
Маалыматка ылайык, “Чоң жети” тобунун саммитинде Москва менен Бээжинге байланыштуу маселе да каралат жана ага эки өлкөнүн өкүлдөрү конок катары да чакырылган. Күн тартибинде Украинадагы согушту талкуулоо маселеси да бар.
Associated Press агенттиги саммиттин катышуучулары Москвага каршы жаңы санкцияларды талкуулашат деп күтүлүп жатканын билдирди.
Жыйын алдында АКШнын расмий өкүлү (аты аталган жок) Орусиянын согушта колдонуп жаткан материалдарга жетүүсүн кыйындатуу, санкцияларды айланып өтүү жолдорун жабуу жана Орусиянын энергетикасына көз карандылыкты азайтуу аракеттери талкууланарын айтты.
АКШ санкциялар пакетин жарыялап, кара тизмеге дагы 300гө жакын адамды, компанияларды, кеме жана учактарды киргизет деп күтүлүүдө.
Украинанын тышкы иштер министри Дмитрий Кулеба Киевде Кытайдын орус-украин согушун жөнгө салуу маселелери боюнча атайын өкүлү Ли Хуэй менен жолугушту. Бул тууралуу украин тышкы саясий мекемеси билдирди.
Маалыматка караганда, Кулеба Украинанын суверендүүлүгүнө жана аймактык бүтүндүгүнө негизделген тынчтык орнотуу принциптерин айтып берди.
"Украина өз аймактарын жоготуу же жаңжалды ошол бойдон калтыруу тууралуу сунуштарды кабыл албайт", - деп белгиледи министр.
Кулеба муну менен катар Бээжиндин Владимир Зеленскийдин тынчтык формуласына катышуусу маанилүү экенин айтты. Президент өлкөнүн 1991-жылкы чек араларына кайтуусун, Киевге репарациялардын төлөнүшүн жана согушту ачкан адамдарды трибуналга тартууну талап кылууда. Кытай жыл башында сунуш кылган тынчтык демилгесинде ок атышууну токтотуу тууралуу кеп болуп, жогорудагы шарттар камтылган эмес.
Кытай 15-майдан тарта Украина, Орусия жана айрым Европа өлкөлөрүнө атайын чабарманын жиберери маалымдалган. Ли Хуэй 2009-2019-жылдары Кытайдын Москвадагы элчиси болгон. Дипломат жабык режимдеги сапарынын алкагында калган өлкөлөрдү да кыдырып чыгат.
Кытайдын Тышкы иштер министрлиги жарыялаган 12 пункттан турган сунушта Киев менен Москва ортосундагы диалогду жандандыруу, талкууга отуруу керектигин белгилеген.
Украина, Еврошаркет жана АКШ ал докуменетти реалдуу план катары эмес, Бээжиндин позициясы тууралуу билдирүү катары кабыл алышарын айтышкан.
18-майга караган түнү орусиялык армия Киевди канаттуу ракеталар менен аткылады. Украинанын баш калаасын ракета менен атуу согушкан тараптардын талаш-тартышын жаратты: Орусия Украина АКШдан алган "Патриот" системасын талкалаганын, Киев өз кезегинде орусиялык үндөн тез учкан "Кинжал" ракетасын атып түшүргөнүн билдирүүдө. Эки тарап тең бири-биринин бул билдирүүлөрүн четке каккан.
Өткөн түнү орусиялык аскерлер Одессаны да аткылады. Бул тууралуу Одесса облустук аскер администрациясынын башчысы Сергей Братчук билдирди. Атып түшүрүлгөн ракетанын сыныгы тийген бир адам каза болду.