Пентагон: "Пэтриот" комплекси Украинада ишке берилди
Украинадагы америкалык абадан сокуу уруучу "Пэтриот" комплексине орусиялык ракета тийип, талкаланган. Оңдоп-түзүүдөн кийин кайрадан ишке киргизилгенин Пентагондун өкүлү Сабрина Сингх билдирди.
"Ал оңдолду жана ок чыгарууга жөндөмдүү" деп билдирди Сингх бейшембиде. Ал АКШнын адистери ремонт иштерине колдоо көргөзүүгө даяр экенин билдирди. Бирок комплекс канчалык жабыркаганы тууралуу толук маалымат берген жок. Ага чейин америкалык ЖМК орусиялык ракета тийгенден кийин комплекс талкаланганын, бирок жок кылынбаганын кабарлаган.
Орусиянын Коргоо министрлиги "Кинжал" ракетасы менен беш комплекс жана радар талкаланганын билдирген. Мекеме бирок далил келтирген эмес.
16-майдын түнү украин тарап Орусия Киевди ракета менен жапырт аткылаган. Украинанын абадан коргоо күчтөрү ракеталарды, анын ичинде алты гиперүндүү "Кинжал" ракетасын атып түшүргөн. Орусиялык комментаторлор "Кинжал" атылбаганын, бирок "Пэтриот" системасын талкалаганын билдирген. Видеодо абадан коргоо күчтөрү иштегенден кийин жерде жарылуу болгонун көрүүгө болот.
Украинанын куралдуу күчтөрү Бахмутту курчап жана Марьинка багытында чабуулга өтүүдө
Украинанын куралдуу күчтөрү өткөн суткаларда орусиялык армиянын 17 чабуулунун мизин кайтарды деп айтылат Башкы штабдын маалыматында.
Бен Уоллес: Киев Storm Shadow ракеталарын колдонду
Британиянын коргоо министри Бен Уоллес Украина алыска атыла турган Storm Shadow канаттуу ракеталарын колдоно баштаганын билдирди. Лондон Киевге берген бул ракеталар 250-290 чакырымдык аралыкта сокку урууга жөндөмдүү. Ага чейин Украинага алыска уча алган GMLRS ракеталарын берилген. Ал саатына 80 чакырымга чейин учат.
Уоллес Норвегиянын коргоо министри Бьорн Арильд менен сүйлөшкөндөн кийин берген пресс-жыйында "Менин маалыматымда Украинага жөнөтүлгөнү айтылгандан кийин Storm Shadow ракетасы колдонулду" деп билдирди. Уоллес бирок кандайдыр бир маалымат берүүдөн баш тартты.
Норвегиянын коргоо министри Украинага Arthur радарынан үчтү, алыска атыла турган жапырт ок чыгаруучу ракета системасынан (РСЗО) сегизди бере турганын билдирди. "Украинанын эли туруктуулукту көрсөтө алды. Алардын кармашы - биздин демократия, эркиндик, коопсуздук үчүн кармаш", - деп билдирди Бьорн Арильд Грам.
19-майда Жапониянын Хиросима шаарында “Чоң жети” блогуна кирген өлкөлөрдүн жетекчилеринин саммити башталат.
Reuters агенттиги үч күнгө созулган жыйынга Британиянын, Германиянын, Италиянын, Канаданын, Франциянын, Жапониянын жана АКШнын лидерлери катышарын жазды.
Маалыматка ылайык, “Чоң жети” тобунун саммитинде Москва менен Бээжинге байланыштуу маселе да каралат жана ага эки өлкөнүн өкүлдөрү конок катары да чакырылган. Күн тартибинде Украинадагы согушту талкуулоо маселеси да бар.
Associated Press агенттиги саммиттин катышуучулары Москвага каршы жаңы санкцияларды талкуулашат деп күтүлүп жатканын билдирди.
Жыйын алдында АКШнын расмий өкүлү (аты аталган жок) Орусиянын согушта колдонуп жаткан материалдарга жетүүсүн кыйындатуу, санкцияларды айланып өтүү жолдорун жабуу жана Орусиянын энергетикасына көз карандылыкты азайтуу аракеттери талкууланарын айтты.
АКШ санкциялар пакетин жарыялап, кара тизмеге дагы 300гө жакын адамды, компанияларды, кеме жана учактарды киргизет деп күтүлүүдө.