Украинанын куралдуу күчтөрүнүн чыгыш тобунун спикери Сергей Череватый орусиялык күчтөрдүн Бахмутту алганы тууралуу кабарды четке какты
"Бул калп. Биздин бөлүктөр Бахмутта кармашты улантып жатат", - деди Череватый Рейтер агенттигине.
Буга чейин "Вагнер" жеке аскердик тобунун башчысы Евгений Пригожин жарым жылдан бери айыгышкан кармаш жүрүп жаткан шаарды биринчи жолу толук алышканын билдирген.
Украинанын коргоо министринин орун басары Анна Маляр өлкөнүн куралдуу күчтөрү Бахмуттагы Самолет районунда турганын, кырдаал оор экенин айтканын "Азаттыктын" украин кызматы жазды.
"Бахмутта кармаш жүрүп жатат. Кырдаал оор. Биздин аскерлер Самолет районунда туруштук берүүдө", - деди Маляр. Анын маалыматында украин аскерлери Бахмуттагы өнөр жай жана инфраструктура жайларын, жеке секторду коргоп турат.
Украин күчтөрүнүн чыгыш тобунун басма сөз кызматы ишембиде аскерлер "Бахмутту курчоо операциясын жүргүзүп жатканын" бирок өздөрүнүн көзөмөлүндө турган райондон чыгып кетиши мүмкүн экенин билдирди.
"Абдан кичинекей район калды. Аны атуу оңой жана анда көп адамды кармап туруу оор. Коопсуздук үчүн эртеби-кечпи ал жерден чыгарыбыз анык", - деди "Азаттыктын" украин кызматына курган маегинде украин күчтөрүнүн "Восток" биргелешкен башкармалыгынын спикеринин жардамчысы.
Орусиялык чиновниктер Батышты Украинага F-16 согуштук учактарын берүү чечими үчүн коркутууда
Орусиянын тышкы иштер министринин орун басары Александр Грушко Батыш өлкөлөрүн Украинага F-16 согуштук учактары берилсе, "кооптуу тобокелдиктер" болорун айтып коркутту.
"Эскалацияны күчөтүү аракети болууда. Биз Батыш өлкөлөрү эскалация сценарийин кармап турганын көрдүк. Бул алардын өздөрү үчүн өтө кооптуу тоболкелдик. Кандай болбосун бул биздин пландарыбызда эске алынган жана бизде максатка жетүү үчүн керектүү каражаттар бар", - деген Грушко.
CNN мурдараак АКШ администрациясы F-16ларды үчүнчү өлкөлөр аркылуу Украинага өткөрүп беришине каршы эместигин жазган. Киевге согуштук учактарды берүүдөн баш тарткандыктан, Ак үй европалык өнөктөштөрдүн гана эмес, АКШ Конгрессинин мүчөлөрүнүн да кысымына кабылган.
Украиналык учкучтар согуштук учакты башкаруу үчүн күзгө чейин окуп бүтүшөрү күтүлүүдө.
Орусия бир суткада Украинага 56 жолу сокку урду
Бул тууралуу Украинанын куралдуу күчтөрүнүн билдирүүсүндө, аткылоодон жай тургундар арасында каза тапкандар жана жарадар болгондор бар.
Украин аскерлеринин маалыматында эң катуу кармаш Бахмутта жана Марьинкада жүрүп жатат.
Украинанын Башкы штабы бир сутка ичинде украин авиациясы Орусиянын аскердик техникасы жана өздүк курамы турган жерлерге сегиз жолу сокку урганын билдирди.
Белгород облусунун бийлиги украин аскерлеринин Белгородго кирип келгенин төгүндөдү
Орусиялык "База", Mash жана Shot ж.б. Телеграм-каналдары ишембиде украиналык куралдуу топтор Белгород облусуна кирип келгенин билдирген. "База" 19-майдын кечинде Калашников автоматы, гранатомет, снайпердик винтовка жана пулемоттор менен куралданган адамдар орусиялык чек арачылар менен атышканын жазган.
Окуя чек арадан бир чакырым алыс Красный Хутор деген айылда болгон. Mash топто 15 адам болгонун алардын онго жакыны жараат алганын, Shot төрт киши жарадар болгонун кабарлаган.
Бирок Белгород облусунун ыкчам штабы диверсиялык топтордун Украинанын аймагына кирүүгө аракет кылганы чындыкка дал келбей турганын билдирди.
