Чехиянын тышкы иштер министри Ян Липавский Днепрге урулган соккуну Орусиянын "жапайычылыгынын далили" деп айтты
"Днепрдеги бейтапкананын өрткө чулганышы Орусия адамгерчиликтин эң жөнөкөй принциптерин урматтабай турганын көрсөттү. Бул жапайычылык Украинаны сактап жана ага колдоону күчөтүү керектигине далил", - деп жазды Липавский Твиттерге.
26-майда Орусия учурган ракета психикалык ооруларга чалдыккан адамдар үчүн ачылган үч кабат клиникага түшкөн. Соккудан эки адам каза таап, 31 адам жараат алган. Ракета тийген имараттын жанындагы ветеринардык клиника да күйүп кеткен.
27-майда шаарда аза күтүү күнү жарыяланды.
Орусиянын тышкы иштер министринин орун басары Михаил Галузин Украина менен согушту токтотуунун кеминде алты шартын атады. Ал ТАСС маалымат агенттигине курган маегинде шарттардын бири Киевдин “согуштук аракеттерди токтотушу " болорун билдирди.
Галузиндин сөзүнө караганда, Украина каршылык көрсөтүүдөн баш тарткандан сырткары Батыштан курал-жарак албашы керек. Ошондой эле НАТОго, Европа Биримдигине мүчө болуу оюнунан кайтышы зарыл. Киев “жаңы аймактык өзгөрүүлөрдү” таанып, “орус тилин мамлекеттик тилге айлантып”, адам укугун, анын ичинде дин тутуу укугун сакташы шарт.
Галузиндин билдирүүсүнө Киев азырынча комментарий бере элек. Буга чейин Украинанын президенти Владимир Зеленский согушту токтотуунун бир гана шарты бар экенин, ал орус армиясынын Украинадан чыгышы болорун бир канча жолу билдирген.
Украинанын Коргоо министрлигине караштуу Чалгын башкы башкармалыгы орус аскерлери Запорожье атомдук станциясында (АЭС) ири чагым даярдап жатканын эскертти. Башкармалык 26-майда билдирүү таратып, чагымдын максаты Киев пландап жаткан контрчабуулду үзгүлтүккө учуратуу экенин айтты.
Украин чалгынчыларынын божомолуна караганда, орус аскерлери АЭСтин аймагына сокку уруп, мындан улам радиоактивдүү заттар менен уулануу мүмкүндүгү жаралганы жарыяланышы ыктымал.
“Бул акциянын максаты – эл аралык коомчулукту окуянын ийне-жибине чейин иликтенишин талап кылууга түртүү, анын жүрүшүндө согуштук аракеттердин баарын токтотуу болуп саналат. Орусия муну менен өзүнө керектүү тыныгуу алып, ал маалды армиясынын ордун которуштурууга пайдаланууга үмүт артып жатат”, - деп жазылган маалыматта.
Бирок украин чалгынчылары чагым тууралуу эч кандай далилдерди келтирген эмес.
Кремл бул билдирүүгө байланыштуу азырынча комментарий бере элек.
Өткөн аптада күбөлөр Орусия Украинанын контрчабуулун утурлай аталган АЭСтеги коргонуу позицияларын чыңдап жатканын билдиришкен.
Европадагы эң ири атомдук станцияны Орусия кол салуунун алгачкы күндөрүндө ээлеп алган. Ал жакта украиналык кызматкерлер иштеп жатканы менен АЭСти орусиялык “Росатом” корпорациясы көзөмөлдөйт. Ишканада Атомдук энергия боюнча эл аралык агенттиктин кызматкерлери да жүрөт.
Днепропетровск облусунун аскердик админстрациясынын башчысы Сергей Лысак орус армиясынын Днепр шаарына жасаган ракеталык чабуулунан кыйраган медициналык жайдын урандысы 90% тазаланганын билдирди.
Ал бул тууралуу Телеграм-каналына жазып, үч адамдын дайыны чыкпай жатканын, куткаруу-издөө иштери уланганын жазды. Анда куткаруучулар адамдын сөөгүнүн айрым бөлүктөрү тапканын, жеринде эксперт-криминалисттер иштеп жүргөнүн кабарлады.
Мунун алдында жергиликтүү бийлик Днепрге жасалган ракеталык чабуулдан бери дегенде эки адам мерт болуп, 32 киши жараат алганын, алардын ичинен бешөөнүн абалы оор экенин маалымдаган.
Башкы прокуратуранын маалыматына караганда, 26-майда атылган ракета медициналык мекеме менен ветеринардык клиниканын имаратына тийген. Катуу соккудан өрт чыгып, жер тамдар, көп батирлүү үйлөр, автоунаалар зыян тарткан.