Украинанын президентинин кеңсеси Москванын согушту токтотуу боюнча койгон шартына реакция кылды
Орусиянын Тышкы иштер министрлигинин оозу менен айттырган талабы орусиялык жетекчилердин юридикалык жана факты жактан жөндөмсүз экенин тастыктап турат. Мындан улам "Украина жооп иретинде талап коет" - Орусия өлкө аймагынан аскерлерин чыгарып кетиши керек. СССР кулаганын, постсоветтик өлкөлөрдүн суверендүүлүгүн моюнга алышы шарт. Аскердик кылмышкерлерди жана согуштун авторлорун өткөрүп берүүгө тийиш", - деп жазды украин президентинин кеңсесинин кеңешчиси Михаил Подоляк Твиттер баракчасына.
Подоляктын айтымында, Киев Орусиядан демилитаризация аймагын бекемдөөнү, сокку урган куралды колдонбоону жана юридикалык жактан бекитилген программанын негизинде репарация төлөөнү талап кылат.
Мурдараак Орусиянын тышкы иштер министринин орун басары Михаил Галузин ТАСС маалымат агенттигине курган маегинде Украина менен согушту токтотуунун кеминде алты шартын атаган. Ал Украина каршылык көрсөтүүдөн баш тарткандан сырткары Батыштан курал-жарак албашы керек. НАТОго, Европа Биримдигине мүчө болуу оюнунан кайтышы зарыл. Киев “жаңы аймактык өзгөрүүлөрдү” таанып, “орус тилин мамлекеттик тилге айлантып”, адам укугун, анын ичинде дин тутуу укугун сакташы шарт деген талаптарды койгон.
Украина Германияга кайрылып, 500 чакырымга чейинки алыстыкка уча алган Taurus канаттуу ракеталарын берүүнү сурады. Мындай өтүнүч болгонун Германиянын Коргоо министрлигине шилтеме кылып Spiegel басылмасы жазды. Азырынча Киев канча ракета сураганы белгисиз.
Frankfurter Allgemeine Sonntagszeitung басылмасынын булактары украин президенти Владимир Зеленский бул ракеталар тууралуу ушул айдын башында Берлинде немис канцлери Олаф Щольц менен жолукканда талкуулаганын билдирген.
Taurus канаттуу ракетасы кыргын салуучу учактан 500 чакырымга чейинки аралыкка учурулат. Spiegel басылмасынын маалыматына караганда, немис коргоо күчтөрү үчүн мындан он жыл мурда 600 ракета алынган жана учурда 150сү экспортко даяр.
Укрианага биринчилерден болуп канаттуу ракеталарды Британия жөнөткөн. Ушул айдын ортосунда Киев Лондондон 250 чакырымга чейин учурулган Storm Shadow ракеталарын алган. Ага чейин Батыш өлкөлөрү учуу мүмкүнчүлүгү 80 чакырымды гана түзгөн ракеталарды берип келген.
BBC жана "Медиазона" басылмалары Украинадагы согушта өлгөн орусиялык 24005 жоокердин тек-жайын тактады. Акыркы эки жумада журналисттер 1361 кишинин аты-жөнүн аныкташты.
Иликтөөчүлөр өлгөндөрдүн 3 миңден көбү элиталык бөлүктөрдүн аскерлери экенин белгилешүүдө. Тек-жайы аныкталгандардын 4300дөн ашууну түрмөдөн согушка жөнөтүлгөн, 2300гө жакыны мобилизацияга тартылган.
Бирок бул эсеп орус армиясынын Украинадагы жоготуусунун реалдуу санын билдирбей турганын, иш жүзүндө адам өлүмү мындан да көп адам болушу мүмкүн экенин эскертет.
Иликтөөчү кабарчылар медиа каражаттарына чыккан жана жергиликтүү бийлик берген жаңылыктардын, каза тапкандардын туугандарынын социалдык баракчаларга жазган билдирүүлөрүнүн негизинде маалымат топтойт.
Ушул жумада "Вагнер" жалданма аскерлер уюмунун башчысы Евгений Пригожин анын жоочуларынын 20 миңдейи өлгөнүн бышыктаган.
Пентагон орус армиясынын жоготуулары өлгөндөрдү жана жараат алгандарды кошкондо 100 миңден көп деп эсептеген.
Киев майданда 13 миңдей жоокери курман болгонун былтыр жыл соңунда маалымдаган. Орусиянын Коргоо министрлиги акыркы жолу былтыр 21-сентябрда согушта 6 миңдей жоокерин жоготконун билдирген. Адатта согушуп жаткан тараптар курмандыктарынын санын так айтпайт. "Азаттык" радиосу согуш шартында маалыматты өз алдынча текшере албайт.
Чехиянын тышкы иштер министри Ян Липавский Днепрге урулган соккуну Орусиянын "жапайычылыгынын далили" деп айтты
"Днепрдеги бейтапкананын өрткө чулганышы Орусия адамгерчиликтин эң жөнөкөй принциптерин урматтабай турганын көрсөттү. Бул жапайычылык Украинаны сактап жана ага колдоону күчөтүү керектигине далил", - деп жазды Липавский Твиттерге.
26-майда Орусия учурган ракета психикалык ооруларга чалдыккан адамдар үчүн ачылган үч кабат клиникага түшкөн. Соккудан эки адам каза таап, 31 адам жараат алган. Ракета тийген имараттын жанындагы ветеринардык клиника да күйүп кеткен.
27-майда шаарда аза күтүү күнү жарыяланды.