Украинанын соту Казакстандын 23 жаштагы жараны Шынгыс Сейпиевди Орусиянын "Вагнер" менчик аскер компаниясынын катарында согушканы үчүн тогуз жылга эркинен ажыратты.
Украинанын коопсуздук кызматы билдиргендей, Сейпиев Тюменде абакта жаткан жеринен согушка азгырылган. Ал "зордуктоо" беренеси менен он жылга кесилип, эки жыл жазасын өтөгөндөн кийин былтыр октябрда "Вагнерге" жалданган. Ага айына 200 миң рубль, Орусиянын жарандыгын жана соттуулугун жоюуну убада кылышкан. Сейпиев акчаны келишим аяктагандан кийин алмак болгон. Бир аз даярдыктан өткөн соң Сейпиев кошулган жоочулар бөлүгүн Бахмутка жөнөтүшкөн. Бир жума өтпөй аны украин аскерлери туткунга алышкан.
Украинада орус тарапта канча казакстандык согушуп жүргөнү беймаалым. "Азаттыктын" казак кызматы согуш башталганы Казакстандын эки жараны мерт кеткенин жазган.
Орус түрмөлөрүндө жазасын өтөп жаткандарды согушка азгыруу былтыр жайында башталган. "Вагнердин" башчысы Евгений Пригожин жабык жайларды өзү кыдырып, үгүт жүргүзгөн. Согушка тартылгандардын арасында оор кылмыштар үчүн кесилгендер да бар.
2023-жылдын май айында Пригожин 20 миңдей жалданма аскери согуш талаасында мерт кеткенин, алардын жарымы абактан чыккандар экенин ырастаган.
Москвага дрон чабуулу: Путиндин билдирүүсү
Орусиянын президенти Владимир Путин Москвага учкучсуз учактардын чабуулу тууралуу маалымат берди. Ал Украинанын аскердик-чалгын кызматына сокку урулгандан кийин Киевден ушундай жооп болгонун айтты. Киев Москвага сокку урду деген дооматты моюнга алган жок.
Президенттин сөзүн мамлекеттик телеканалдар көрсөттү. Москва биринчи жолу Украинанын Коргоо министрлигинин Башкы чалгын кызматына чабуул койгонун жарыялап жатат. Киев бул чабуул тууралуу айткан эмес.
Путин дрон чабуулу тууралуу биринчи жолу комментарий берди. Ал Киев жарандык объектилерге атайын сокку урганын билдирип, муну терроризм деп атады. Буга чейин Орусиянын Коргоо министрлиги жарандык турак жайга түшкөн үч учкучсуз учактын иши радиоэлектрондук жол менен үзгүлтүккө учураганын жазган. Мындан улам алардын үйгө түшкөнүн кокустук катары сыпаттоого болот.
Путин Москвага сокку уруу "жооп чараларга түртө" турганын айтты, бирок кандай жооп болорун тактаган жок. Орусиялык армия Киевге өткөн жылдан бери чабуул жасап келет. 2023-жылдын май айында эле 17 жолу ушундай сокку урулган.
Путиндин айтымында, Москва Украинадан айырмаланып "таамай тийүүчү куралдар" менен сокку урат. 2022-жылы 24-февралда согуш башталагандан бери Украина бомба, ракета чабуулуна кабылып келет. Бул куралдардын сыныктары жарандык объекттерге да тийген. Москва кээде гана жарандык объекттерди бутага албаганын билдиргени болбосо, мындай чабуулдар тууралуу комментарий бербейт.
Орусиялык бийликтер 24 дрондон чабуул жасалганын билдирүүдө. Свобода радиосу интернетке жарыяланган фото жана видеолорго таянып, төрт дрон атып түшүрүлгөнүн билдирди.
Орусия украиналык "Пэтриотту" "дагы талкалаганын" билдирди, Украина четке какты
Орусиянын коргоо министри Сергей Шойгу 30-майдагы жыйында Киевде украин армиясына таандык "Пэтриот" зениттик-ракеталык комплекси талкаланганын билдирди. Бул тууралуу ТАСС маалымат агенттиги билдирди.
Шойгу зениттик-ракеталык комплекс качан жана кантип талкаланганын айткан жок. Анын айтканын негиздей турган далил да жок. 29-майда Киевге болгон соккудан орусиялык аскердик блогерлер зениттик-ракеталык комплекстин асмандагы изин көргөзүп, "Пэтриотко" таандык экенин билдирген.
Украинанын аскер-аба күчтөрүнүн өкүлү Юрий Игнат "Пэтриот" бүтүн экенин, орусиялык бардык ракеталар атып түшүрүлгөнүн билдирди.
Орусия Украинага чабуул койгондон бери 483 бала каза болуп, 989 бала ар кандай деңгээлде жараат алган. Бул тууралуу Украинанын Башкы прокуратурасы билдирди.
Эң көп бала Донецк, Харьков жана Херсон облустарында жапа чеккен.
“Жабыр тарткандар мындан да көп болушу мүмкүн. Уруш жүрүп жаткан, убактылуу басып алынган жана баскынчылардан бошотулган аймактарда жабыркагандарды аныктоо иштери жүрүүдө”, - деп кабарлады прокуратура.
БУУнун маалыматы боюнча 2022-жылдын 24-февралынан 2023-жылдын 8-майына чейин Украинада 8 791 жай тургун набыт болуп, 14 815и жарадар болгон. БУУ курмандыктардын чыныгы саны алда канча көп болушу мүмкүн деп эсептейт.