Белгород бийлиги атышуулар уланып жатканын билдирди
Белгород облусундагы Соболевка айылындагы атышууда эки адам каза таап, алты адам жабыркады. Андан тышкары Шебекино айылында эки эркек жарадар болду, алар түшкөн автомобилдин алдында снаряд жарылып кеткен. Бул тууралуу облустун башчысы Вячеслав Гладков билдирди.
Анын айтымында атышуу учурунда эки жашоочу өз үйүнүн короосунда болгон, алган жарааттардан улам алар каза тапкан. Жарадар болгондор арасында эки бала бар, алар ооруканага жеткирилген.
Кечээ Гладков Маслова Пристань кыштагында эки аял ок жеп, каза болгонун билдирген. Губернатор бардык чабуул үчүн Украинаны күнөөлөдү. Киев Орусиянын аймагынын аткыланышы боюнча комментарий берген жок.
Гладков андан тышкары чек арадагы балдарды башка аймактарга жиберип жатканын билдирди, анын айтымында, 600 бала Калуга жана Ярославлга "жайкы эс алууга барат". Белгороддо 2,5 миңдей жашоочу учурда өз үйлөрүн таштап, убактылуу баш калкалоочу жайга жайгашканы маалым болду.
Украинанын тышкы иштер министри Дмитрий Кулеба Батышты Украинага каршы согушта колдонулган дрон, ракеталарды чыгарган орусиялык компанияларга каршы санкцияларды тез арада киргизүүгө чакырды.
Бул тууралуу "Украинская правда" кабарлады.
Кулебанын айтымында, украин бийлиги Киев Батыштагы өнөктөштөрүнө аскердик-өнөр жай тармагындагы 36 орусиялык компаниянын тизмесин берген. Министр санкциялар кечигип жатканын айтты.
Орусиянын Белгород облусунун губернатору Вячеслав Гладков Шебекино шаарын аткылоодо дагы эки киши жараат алганын билдирди.
Согуш маалында тараптардын маалыматтарынын чын-төгүнүн тактоо мүмкүн эмес.
Украиналык учкучтарды даярдай турган "истребителдер коалициясы" тобуна Европанын сегиз мамлекети кирди. Бул тууралуу Украина президентинин аппаратынын жетекчисинин орун басары Игорь Жовква билдирди.
Анын айтымында, Улуу Британия, Нидерланд, Польша, Дания, Швеция, Бельгия, Португалия жана Франция коалицияга кошуларын ырасташты.