Беларустун авторитардык лидери Александр Лукашенко Орусиянын президенти Владимир Путин 2022-жылдын март айында Крым жарым аралынын (Москва аннексиялап алган) макамы боюнча сүйлөшүүгө даяр болгонун билдирди. Бул тууралуу ал “Россия 1” телеканалынын алып баруучусу Ольга Скабеевага берген интервьюсунда айтты.
Анын сөзү боюнча, Владимир Путин ага эки өлкөнүн делегациялары макулдашкан тынчтык келишиминин долбоорун жеке өзү тапшырган. Документте аннексияланган Крымды “узак мөөнөткө ижарага алуу” жазылган. Ал эми Донбасс маселесин Орусия менен Украинанын президенттеринин Түркиядагы жолугушуусунда талкуулоо сунушу берилген.
Буга чейин Украинанын президентинин мурдагы кеңешчиси Алексей Арестович тынчтык келишиминин долбоору бар экенин айткан. Ал 2022-жылдын жазында орус армиясынын биринчи оор жоготууларынан кийин Орусия согуш башталаар алдында койгон талаптарынын дээрлик бардыгынан, анын ичинде Крым менен Донбассты көзөмөлдөөдөн баш тарткан.
Бирок Орусия Украинанын куралдуу күчтөрүнүн санын 50 миңге чейин азайтуу, Украинада орус тилине экинчи мамлекеттик тил статусун берүү талаптарын калтырганын билдирген.
Орусия февраль айында Украинага басып киргенден кийинки алгачкы жумаларда орус-украин делегациялары Беларуста жана Түркияда сүйлөшүүлөрдү жүргүзгөн. Эки жолугушууда бир да документке кол коюлган эмес.
Орусия Украинанын Крым жарым аралын 2014-жылы жазында күч менен өзүнө каратып алган. Эл аралык коомчулук Крымды Украинанын аймагы деп эсептейт.
Украинадагы чечен кошуундарынын командири Адам Делимхановдун Телеграм каналында текст түрүндөгү маалымат жарыяланды.
"Жараткандын ырайымы менен менде баары жакшы!", - деп жазылган анда. Ошондой эле украин басылмаларын фейк таратып жатат деп айыптаган.
Сүрөттөр же видеолор тиркелген эмес.
Буга чейин бир нече украиналык жана орусиялык маалымат булактары Адам Делимханов Украинада жараат алганын кабарлашкан.
Орусиянын Коргоо министрлигинин каналы бул тууралуу маалымат таратып, кайра төгүндөгөн. Чеченстандын башчысы Рамзан Кадыров Делимханов тирүү экенин Телеграмга жазган. Бирок өз сөзүнө эч кандай сүрөт же видео далил келтирген эмес.
Орусиянын Мамлекеттик Думасынын депутаты, Чеченстан жумуриятынын башчысы Рамзан Кадыровдун тууганы жана анын оң колу саналган Адам Делимханов Украинада жарадар болгону кабарланып, кийин кайра төгүндөлдү.
Орусиянын Коргоо министрлигине караштуу "Звезда" каналы алгач ЛДПР партиясынын басма сөз кызматына таянып, Делимханов жараат алганын жазган. Кийин кайра эле ошол телеканал депутаттын жарадар болгону тууралуу маалымат чындыкка коошпой турганын билдирди.
Буга чейин Украинанын куралдуу күчтөрүнүн курамында согушуп жүргөн саясат таануучу Кирил Сазонов орус депутаты Запорожье облусундагы атайын операциянын алкагында өлтүрүлгөнүн кабарлаган.
Ал эми Рамзан Кадыровдун Телеграмдагы каналында Делимханов менен байланыш болбой жатканы тууралуу маалымат чыккан.
53 жаштагы Делимханов ар кандай маалыматтарга ылайык Кадыровдун үч же төрт ата өткөн тууганы. Ал Рамзандын атасы, маркум Ахмат Кадыровдун коопсуздук кызматында иштечү.
Делимханов 2014-жылдан бери уюшкан кылмыштуу топтор менен байланышы үчүн АКШнын санкциялар тизмесинде турат. 2022-жылдын апрелинде орус күчтөрү Украинаны Мариуполь шаарын басып алганда депутат Орусиянын Баатыры наамын алган.
Кыргызстанда Делимхановдун аты Батукаевдин ишине байланыштуу аталган.
Украинада 14-июнга караган түнү орус армиясынын соккусунан кеминде алты киши мерт кетти. Бул тууралуу украин бийлигинин өкүлдөрү жана аскерлер шаршембиде билдиришти.
Өлкө түштүгүндөгү Одесса шаарына жасалган орус күчтөрүнүн соккусу бери дегенде үч кишинин өмүрүн алды. Ондон ашууну жабыркады. Маалыматка караганда орус армиясы Кара деңиздин жээгинде жайгашкан шаарга төрт «Калибр» ракетасы менен сокку уруп, алардын экөө асмандан атып түшүрүлгөн. Эки ракета дүкөндүн кампасына тийип, жанындагы соода борбор, мектеп, карапайым тургундар жашаган комплекс жабыркаган. Аскерлер урандылардын алдында да адамдар калышы мүмкүн экенин айтышууда.
Андан тышкары Донецк облусундагы Краматорск жана Константиновка шаарларында орус армиясынын ракетасынан үч киши мерт кеткенин облус губернатору Павел Кириленко Фейсбукка жазды.
Ал ошондой эле ондогон турак жайлар талкаланганын кошумчалады. Украин армиясы 14-июнда маалымдагандай, орус күчтөрү канаттуу ракеталар жана Иранда чыгарылган учкучсуз аппараттар менен чабуул койгон.
Днепропетровск облусу экинчи күн катары менен аткылоого туш болуп жатканын 14-июнда аймактын губернатору Сергей Лысак билдирди.
Украин аскерлери өлкөнүн түштүгүндө жана чыгышында жети калктуу конуш орус армиясынын бошотулганын, ал эми Бахмуттагы айыгышкан салгылашта ийгилик болгонун кабарлашты.
Москва бул маалыматты төгүндөп жатат. Орусиянын президенти Владимир Путин Украинанын контрчабуулу өз максатына жетпей калганын, Киевдин жоготуулары Москваныкынан 10 эсе көп экенин 13-июнда билдирди.
Украина Куралдуу күчтөрүнүн башкы штабы Путиндин комментарийин «өзүн-өзү алдоо» деп сыпаттады.
Согуш маалында эки тараптын тең билдирүүлөрүн көз карандысыз булактардан тактоо мүмкүн эмес.