Атомдук энергия боюнча эл аралык агенттиктин (МАГАТЭ) башкы директору Рафаэль Гросси Украинадагы Запорожье атомдук станциясына (АЭС) барды. Бул тууралуу украиналык "Энергоатом" компаниясы 15-июнда билдирди.
Орусия көзөмолдөп турган аталган АЭС жакында жарылуу болгон Кахов суу сактагычынын жээгинде жайгашкан.
Мурдараак Гросси станцияга Кахов ГЭСинин жарылуусу өзөктүк коопсуздуктун абалына кандай таасир эткенин баалоо үчүн бара жатканын билдирген.
Жарылуудан кийинки жагдай станция үчүн коркунучтуу экени айтылган. Бирок МАГАТЭ азырынча станцияга кооптуу кырдаал жарала электигин маалымдаган.
Гросси шаршембиде Украинанын президенти Владимир Зеленский менен жолугушкан. МАГАТЭнин башчысынын айтымында, ал украин лидерине саламаттык сактоо тармагында колдонулган өзөктүк технологиялардын негизинде жардам көрсөтүү программасын, ошондой эле суу ташкынынан кийин азык-түлүк коопсуздугуна байланыштуу сунуштарды берди.
Украинанын аймагында Орусиянын согушу уланып жаткан кезде, 6-июнга караган түнү Кахов ГЭСинин дамбасы жардырылып, Херсон облусунун бир катар конуштарын суу каптаган. Отузга жакын адам өлүп, миңдеген тургун коопсуз жакка көчүрүлдү.
Украинадагы согушту айыптаган “Би-2” эстрада тобунун Бишкекте 18-июнга белгиленген концерти болбой калды. Бул тууралуу иш-чараны уюштуруу менен алектенген Vi project kg компаниясы Инстаграмдагы баракчасына жарыялады.
Компания концерт белгисиз себептерден улам болбой калганын жазып, сатылган билеттердин акчасы элге кайтарыларын билдирди. Ошондой эле мындан ары Vi project kz менен кызматташпай турганын кабарлады.
“Би-2” эстрада тобунун концерти 18-июнда Каба уулу Кожомкул атындагы Спорт ордосунда өтмөк. Билеттер 5500 сомдон 12 000 сомго чейин сатылып жаткан.
Беларус жана орусиялык артисттерден куралган “Би-2” рок-эстрада тобу 2022-жылы августта Орусияда “тыңчы” тобуна киргизилген. Топтун мүчөлөрү Орусиянын Украинага каршы согушун ачык сындап чыккан.
Өткөн аптада орусиялык “Порнофильмдер” тобунун Бишкектеги концерти үзгүлтүккө учураган. Владимир Путинге жана Украинадагы согушка каршы экенин билдирип келген музыканттардан турган топтун концерти 10-июнда Бишкектеги клубдардын биринде өтүшү керек болчу.
“Порнофильмдер” концерт өтө турган жерге укук коргоо органдарынын кызматкерлери барып, “музыканттарды коркутушканы” кабарлаган.
Орусиянын аскердик блогерлери орус күчтөрү Украинанын Луганск облусундагы Кременная шаарынын айланасында чоң жоготууга учураганын кабарлашты.
Бир нече Телеграм-канал жарыялаган маалыматка ылайык, генералдын келишин күтүп турган орус аскерлерине украин күчтөрү сокку урганда ондогон жоокер каза болгон. Бул маалыматты бөлүшкөн "Рыбарь", "Старше Эдды", "Повёрнутые на Z войне", "Два майора" жана "Zаписки мичмана Птичкина" Телеграм-каналдарынын жалпы катталуучуларынын саны 3 миллиондон ашат.
Каза болгондор жана жаракат алгандар тууралуу так маалымат айтылбайт, түрдүү булактарда алардын саны 50дөн 100гө чейин деп көрсөтүлүүдө. Ошондой эле Телеграм-каналдар жоокерлер күткөн генералдын аты-жөнүн да жазышкан эмес.
Айрым такталбаган маалыматтарга караганда, сөз буга чейин "Чыгыш" аскер бөлүгүн жана Тынч океан деңиз аскерлеринин 155-бригадасын жетектеген генерал-майор Сухраб Ахмедов жөнүндө болуп жатышы мүмкүн. Буга чейин аталган бригада Приморье крайынын губернаторуна ачык кат жазып, Донецк облусунун Павловка айылындагы чоң жоготуулар үчүн Ахмедовду айыптаган.
Орусиянын Коргоо министрлиги блогерлер жарыялаган маалыматка комментарий берген жок. Украинанын куралдуу күчтөрү да Кременнаяны көздөй сокку урулганын маалымдаган эмес.