"Нью-Йорк Таймс" гезити Кахов ГЭСиндеги жардыруу боюнча өз иликтөөсүн жүргүздү.
ГЭСтеги дамбанын бузулушна техникалык туннелдеги жарылуу себеп болгон жана аны Орусия жасаган деген тыянак чыгарды.
Украина тарап 18-июнда ГЭСтеги жарылуудан кийинки суу ташкынынан 16 адам каза болгонун билдирди.
Орус тарап болжол менен 29 киши каза тапканын билдирди.
Орус аскерлеринин Украинанын Харьков облусун аткылоосунан эки жай тургун каза болду.
Бул тууралуу облустук аскердик администрациясынын башчысы Олег Синегубов Телеграм аркылуу билдирди.
Синегубовдун айтымында, Гурьев Казачок айылында автоунаага ракета тийип, 52 жаштагы эркек жана 53 жаштагы аял курман болгон.
Адегенде төрт адам киши мерт кеткени кабарланып, кийинчерээк аймактын бийлиги эки киши өлдү деген тактоо киргизди.
Орусия комментарий бере элек.
Согуш шартында тараптар тараткан маалыматтардын чын-төгүнүн тактоо мүмкүн болбой турат.
Украинанын президенти Владимир Зеленский Африка өлкөлөрүнүн лидерлери менен жолугушууда Орусия менен тынч сүйлөшүүлөр алардын аскерлери украин аймагынан толук чыгып кеткенден кийин гана болушу ыктымалдыгын айтты. Ал бул тууралуу жолугушуудан кийин Киевде өткөн маалымат жыйынында билдирди.
"Бүгүнкү жолугушууда мен бир нече жолу так айттым. Орусия баскынчы болуп биздин жерде турган кезде аны менен жүргүзүлгөн кандай гана сүйлөшүү болбосун согушту тоңдурууга, кайгы-муңду тоңдурууга барабар. Бизге азыр чыныгы тынчтык керек, демек, орус аскерлери биздин бардык эгемен аймагыбыздан чыгарылып кетүүгө тийиш", - деди ал.
Зеленскийдин маалымдашынча, Африка биримдигинин лидерлери менен сүйлөшүүдө Украинадан дан экспорттоо маселеси да көтөрүлгөн.
"Биз дүйнө элине чындап көмөктөшүп келе жатабыз, өзгөчө Африка, Азия жана Европанын эли социалдык туруктуулукту, азык-түлүк бааларын биздин экспорттун аркасы менен кармап келе жатышат. Өнөктөштөрүбүз менен бирге биз Африкадагы дан хабдары боюнча иштеп жатабыз. Азык-түлүк коопсуздугу бекем кепилдикке алынууга тийиш".
Украин президенти Орусия азык-түлүк базарында монополист болуу үчүн украин портторунун жолун тосуп жатканын кошумчалады.
16-июнда Африка өлкөлөрүнүн лидерлери Киевге тынчтык орнотуу миссиясынын алкагында барышты. Алардын ичинде Түштүк Африка Республикасынын лидери Сирил Рамафоса, Комор аралдары биримдигинин президенти Азалия Ассомани, Сенегалдын мамлекет башчысы Маки Салл, Замбиянын лидери Хакаинде Хичилема, Египеттин премьер-министри Мустафа Мадбули, Конго президентинин атайын өкүлү Флоран Нциба, Уганда президентинин ыйгарым укуктуу өкүлү Рухакана Ругунда бар. Алар украин президенти Владимир Зеленский менен жолугушкан соң ишембиде Санкт-Петербург шаарына, орус президенти Владимир Путин менен жолугуу үчүн жөнөп кетишет.
Украинадагы согуштан улам буудайдын кескин кымбаттап кетиши Африка мамлекеттерине өзгөчө оорчулук жаратты.
Орусия Украинага 2022-жылы, 24-февралда "аскердик операция" деген жүйө менен бастырып кирген.