Башкы "вагнерчи" Евгений Пригожин президент Путиндин кайрылуусуна комментарий берип, Путиндин "Мекенге чыккынчылык кылды" деген сөзүн "терең жаңылыштык" деп айыптады.
"Биз мекенибиздин атуулубуз, согушуп келгенбиз, дагы согушабыз. Президент же Федералдык коопсуздук комитети (ФСБ) талап кылгандай, эч ким багынып бербейт. Анткени биз өлкөнүн мындан ары коррупция, бюрократия жана калпка чулганып жашаганын каалабайбыз", - деп айтылат Пригожиндин Телеграм-каналына жарыяланган аудио билдирүүдө.
Бул аралыкта Би-Би-Си жана Reuters өзүнүн булактарына таянып тараткан маалыматтарында "Вагнер" жеке аскердик компаниясы Воронеж облусундагы бардык аскердик объекттерди өз көзөмөлүнө алганын билдирүүдө.
Облустун губернатору Александр Гусев аймакта контртеррордук операция режиминин алкагында оперативдүү аскердик иш-чаралар жүрүп жатканын маалымдады.
"Вёрстка" басылмасы өз булактарына таянып, Воронеждин түштүгүндө тик учактан чабуул болгонун жазды. Аймакта ири мунай базасы жайгашкан. Жергиликтүү эл ишемби күнү эртең менен "Вагнердин" жалданмачыларын көрүшкөнүн, алар "Дон" трассасы менен шаарга кетүүчү жолдун кесилишине жайгашканын билдиришкен.
Жергиликтүү маалымат каражаттары "Дон" трассасынын Ростов-на-Дону менен Воронеж облусунун ортосундагы аймагынан жардыруулардын, атышуулардын үнү угулуп, асманда учактар учуп жатканын жазышты. Трассанын Воронеж облусундагы 300 чакырымында кыймыл токтотулган.
Мындай шартта маалыматтарды жеринен тактоого мүмкүн эмес.
Воронеждин үстүнөн Орусияга таандык тик учак атылды, "Миллерово" авиабазасы басып алынды
Fighterbomber Телеграм-каналы "Вагнер" Ростов-на-Дону шаарынын үстү жагындагы "Миллерово" авиабазасын басып алганын жазды.
Андан тышкары Воронеж облусундагы аэродромго жакын Бутурлиновка аймагындагы "вагнерчилердин" колоннасынын сүрөтүн жарыялады.
Аны менен катар Воронеждин үстү жагында Орусиянын армиясына караштуу тик учакты "Вагнер" жеке аскердик тобу атып түшүргөн сүрөттөр чыкты. Аны ырастоо же геолокация кылуу азырынча мүмкүн эмес.
Евробиримдикке мүчө өлкөлөрдүн лидерлери кырдаалга байкоо салып турат жана болуп жаткан окуяны Орусиянын ички иши деп эсептейт. Бул тууралуу Еврокомиссиянын өкүлү Евгений Пригожиндин козголоңуна комментарий берип жатып билдирди.
АКШ президентинин Улуттук коопсуздук боюнча өкүлү Адам Ходж Вашингтон да кырдаалга көз салып турганын "Америка авазы" радиосуна билдирген. "Биз өнөктөштөрүбүз жана союздаштарыбызщ менен кеңешебиз", - деди ал.
Польшанын президенти Анджей Дуда Орусиядагы кырдаалды улам өз өлкөсүнүн өкмөт башчысы, коргоо министри жана башка өнөктөштөрү менен талкуулаганы маалым болду. "Биз чыгыш чек арабыздагы кырдаалга кылдаттык менен көз салуудабыз" деп жазды ал Твиттердеги баракчасына .
Германиянын канцлери Олаф Шольцтун өкүлү "Берлин Орусиядагы кырдаалга кылдат көз салып турганын" билдирди. Франциянын президенти Эммануэл Макрон кырдаалга байкоо салып турганын жана "мурдагыдай эле Украинаны колдорун" анын өкүлдөрү билдиришти.
Орусиядагы окуяларды НАТО да байкап турганын аскердик альянстын өкүлү Financial Times агенттигине билдирген.
Москва шаарына, Москва облусуна жана Воронеж облусуна контртеррордук операция режими киргизилди.
"Свобода" радиосу маалымдагандай, Москвада, Ростов, Воронеж, Тула, Тверь, Калининград жана Липецк облустарында массалык иш-чаралардын баары токтотулду.
24-июнда Москвада жыл сайын өтүүчү "бүтүрүүчүлөр кечеси" бир аптага жылдырылды.