24-июнга караган түнү орус күчтөрү Украинанын бир нече шаарына чабуул жасады. Киевдеги көп кабаттуу үйлөрдүн бирине тийген ракета үч кишинин өмүрүн алып, 11 киши жарадар болгонун жергиликтүү бийлик кабарлады.
Мындан тышкары ракета соккусунан Днепрде 11 киши, арасында үч бала жабыркады. Алардын жетөө ооруканага жеткирилди.
Миллиондон ашык калкы бар Харьков шаарында газ түтүктөрү жабыркап, өрт чыкканын шаар башчысы Игорь Терехов Телеграмга жазды. Анын айтымында, шаарга үч ракета атылган.
Кременчугда да жарылуулар тууралуу кабарланууда.
Орус бийлиги Евгений Пригожинге таандык делген басылмалардын интернет сайттарын бөгөттөп жатат. Бул тууралуу Орусиядагы жергиликтүү маалымат каражаттары жазууда.
Маалыматка ылайык, Орусиянын Башкы прокуратурасынын чечими менен Евгений Пригожиндин “Патриот” медиатобуна таандык делген РИА ФАН, “Народные новости”, “Невские новости”, “Экономика сегодня”, “Политика сегодня”, “ПолитЭксперт” ж.б. ресурстары бөгөттөлдү. Алардын социалдык тармактагы баракчалары да ачылбай жатат.
Аталган сайттар жана социалдык тармактардагы баракчалар Орусиянын чегинен тышкаркы аймактарда гана ачылууда.
Муну менен катар “Роскомнадзор” мекемесинин талабы менен “Вагнер” аскердик компаниясынын “ВКонтакте” социалдык тармагындагы баракчасы да бөгөттөлдү.
Орусияда жашагандар 24-июнь күнү кечке маал Москва, Тверь ж.б. аймактарда интернет начар иштеп, байланыш үзгүлтүккө учурап жатканын билдиришүүдө. Маалыматтар көбүнчө Телеграм-каналдар аркылуу таркап жатат.
Орусиянын Воронеж облусунун губернатору Александр Гусевдин айтымында, мунай базасында май куюлган цистерна өрттөнүп, жүздөн ашуун өрт өчүрүүчү иштеп жатат. Ал жабыркагандар жок экенин өзүнүн Telegram-каналында билдирип, өрттүн себебин айткан жок.
Гусев аймакта күйүүчү май тартыштыгы жаралды деген кептер жалган экенин, жергиликтүү тургундар тынчсызданып, май куюучу жайларда көйгөй жаратпашы керектигин белгиледи.
Буга чейин Орусиянын Ростов-на-Дону шаарында май куюучу бекеттерде, азык-түлүк саткан дүкөндөрдө узун кезектер пайда болгону кабарланган.
Соңку маалыматтарга караганда жалданма жоочулар Ростов-на-Дону жана Воронеждеги аскердик объекттерди көзөмөлгө алган.
"Вагнерчилердин" колоннасы Липецк облусундагы Елец шаарына жетти. Шаардын өзүндө полиция кирген-чыккан чоң жолду бөгөттөдү.
Бул тууралуу “Свобода” радиосу "Вёрстка" басылмасына таянып жазды. Колонналар Елецти жергиликтүү жана аймактык жолдор аркылуу кыйгап өтүп, "Дон" трассасынан оолак болууга аракет кылууда.