Соңку бир суткада Украинанын аймагына урулган орус күчтөрүнүн аба соккусунан 13 жайкын тургун, анын ичинде 14 жаштагы эгиз кыз мерт болду.
28-июнда Харьков облусуна жасалган орус армиясынын чабуулу үч карапайым тургундун өмүрүн алды. Ал эми 27-июндун кечинде Донецк облусунун Краматорск шаарына жасалган орус армиясынын ракеталык соккусунан курман болгондордун саны 11ге жетти, жарадарлардын саны 60тан ашты.
Украинанын Өзгөчө кырдаалдар министрлиги тараткан маалыматка караганда, ракеталардын бири Краматорскинин борборундагы пицца ресторанына, экинчиси шаар четиндеги конушка тийген.
Донецк аскердик администрациянын башчысы Павел Кириленко билдиргендей, шаарда 18 көп кабаттуу үй, беш мектеп, эки бала бакча, соода борбор жана пицца рестораны жабыркаган.
Кремлдин расмий өкүлү Дмитрий Песков бул жолку кол салууга Орусия бир гана "аскердик түзүмдөргө тиешеси бар объектилерге" сокку урат деп комментарий берди.
Ынанымдуу далилдерге карабай, Москва Украинадагы карапайым калкты атканын моюнуна албай келет.
Вашингтон Краматорскиге урулган сокку үчүн Орусияны кескин айыптап, Украинага колдоо көрсөтүүнү улантарын кошумчалады.
Кечки кайрылуусунда украин президенти Владимир Зеленский туура бир жыл мурда Кременчуктагы соода борборунда орус аскерлеринин соккусунан 22 жай тургун мерт болгонун эске салып, Орусия жоопко тартылууга тийиш деп кайталады.
Польшанын жана Литванын президенттери Украинага барды
Польшанын президенти Анжей Дуданын сапары Киевге бүгүн келген Литванын президенти Гитанас Науседанын сапарындай эле алдын ала айтылган эмес.
"Украинанын президенти менен сүйлөшүүлөр өлкөдөгү Конституция күнүн майрамдоого байланыштуу, андан тышкары согуш сызыгындагы консультациялар, Орусиянын Запорожье АЭСине кол салуусунан кийинки коркунучка байланыштуу. Мындан тышкары НАТОнун июлдагы саммитине даярдык жүрүп жатат", - деп айтылат Польшанын президентинин иш кагаздар менен иштөө бөлүмүнүн Твиттерге жарыялаган билдирүүсүндө.
Мурдараак Конституциянын кабыл алынганынын 27 жылдыгын белгилөө аземине чакырылып, Киевге келген Гитанас Науседа Твиттер баракчасына Литва Украинага NASAMS зениттик-ракеталык жабдуусунан экини, 10 даана M113 бронетранспортёрун жана курал-жарак бере турганын айткан.
Литванын президенти Украинага 2023-жылы январь айында да барган болчу.
Краматорскиге урулган соккудан сегиз адам набыт болду, анын үчөө бала. 60 адам жараат алды
Ички иштер министрлигинин акыркы маалыматтарында 27-июнда саат 19:30да Краматорскинин борборуна урулган эки ракеталык соккудан кийин сегиз адам каза болду. Алардын үчөө бала. 60 жай тургун жараат алды.
Орусиялык күчтөр Краматорскини аткылаган учурда Колумбиянын үч жараны жараат алган. Алар: Латын Америкасында Украинаны колдоо үчүн түзүлгөн уюмдун негиздөөчүсү, колумбиялык депутат Серхио Харамильо, жазуучу Эктор Абад жана журналист Каталина Гомес экенин Би-Би-Синин орус кызматы кабарлады. Аларды коштоп жүргөн украиналык жазуучу Виктория Амелинанын абалы оор.
Маалыматтарда ракета "Краматорск" мейманканасына жакын соода үйүнө түшкөн. Мейманканада ресторан жайгашкан. Жарылуудан жакын арадагы үйлөр, соода жайлары, почта бөлүмү жана автоунаа жабыркаган.
АКШнын Каржы министрлигинин чет элдик активдерди көзөмөлдөө башкармалыгы (OFAC) "Вагнер" аскердик жеке компаниясына жана анын ээси Евгений Пригожинге байланышы бар төрт коммерциялык компанияга, бир адамга каршы санкция киргизди.
Буга чейин АКШ, Европа Биримдиги, Канада жана Британия Пригожиндин өзүнө каршы санкция колдонгон.
"Санкциялар "Вагнердин" каржылоо системасындагы негизги адамдардын ишин кыйындатат", – деди каржы министринин терроризм жана финансылык чалгындоо боюнча орун басары Брайан Э.Нельсон.