Украина Орусияга каттамдарды учура баштаган "Грузин аба жолдору" компаниясына каршы санкция киргизди
Украин президенти Владимир Зеленский санкциялар Орусияга түз аба каттамдарын калыбына келтирген грузин авиакомпаниясына жана анын негиздөөчүсү Тамаз Гаиашвилиге багытталганын кабарлады.
Зеленскийдин жарлыгы бул жолу орусиялык 192 адамга, 291 юридикалык тараптарга багытталган. Анын ичинде Беларусиянын өкүлдөрү да бар. Чектөөлөр 10 жыл бою күчүндө болот.
Быйыл майда орус президенти Владимир Путин орусиялык авиакомпаниялардын Грузияга түз учуусуна уруксат берип, грузин жарандары үчүн виза режимин жокко чыгарган. Бир нече күндөн кийин "Грузин аба жолдору" да Москвага күнүмдүк каттамдарын баштаган.
Грузияда нааразылык акциялары өтүп, президент Саломе Зурабишвили Путиндин жарлыктарын “чагым” деп атаган.
Евробиримдик менен АКШ да Грузия менен Орусиянын ортосундагы түз аба каттамдарын калыбына келтирүүгө каршы чыгышты. Аталган компаниянын ээси Тамаз Гаиашвили орусиялык ТАСС агенттигине "Зеленскийдин санкцияларынын кызыгы жок" деп билдирген.
Испаниянын премьер-министри Педро Санчес 1-июлда Киевге барды.
Орусия Украинага басып киргенден бери чет элдик лидерлердин Киевге сапарлары алдын ала кабарланчу эмес. Испан өкмөтү Санчестин сапарын бир нече күн мурун жарыялап, бул өлкөнүн Евробиримдикке төрагалык кылуудагы биринчи кадамы болорун билдирген.
Киевде Санчес президент Зеленский менен жолугуп, Жогорку Радада сөз сүйлөйт.
Орусияда ишке ашпай калган козголоңдун уюштуруучусу, "Вагнер" менчик аскердик компаниясынын башчысы Евгений Пригожин Беларуска барган соң украин президенти Владимир Зеленский түндүк чек араларын бекемдөөнү буюрганын билдирди.
15 айдан бери уланып жаткан кармашта украин аскерлери алдыга жыла баштаганын айтты.
АКШнын Биргелешкен штабдар командачылыгынын башчысы, генерал Марк Милли украинанын контрчабуулу Батыш күткөндөй тез болбосо дагы ишенимдүү илгерилеп жатканын белгиледи.
30-июнда Украинанын башкы штабы Орусия негизги күчтөрүн мурдагыдай эле Лиман, Бахмут, Марьинкага багыттап жатканын, украин аскерлери аларды мурда ээлеп алган позициялардын сүрүп чыгарып жатканын билдирген.
Согуш маалында бул маалыматтарды башка булактардан тактоо мүмкүн эмес.
Брюсселде 29-30-июнда өткөн саммиттин жыйынтыгында Евробиримдиктин лидерлери Украинага зарыл аскердик колдоо туруктуу уланарын билдиришти. Алар 11-12-июлда Литвада боло турган саммитте Украинага кошумча коопсуздук кепилдиктерди берүү жолдорун карай турганы айтылууда.
Саммитте НАТОнун баш катчысы Йенс Столтенберг Орусиядагы "вагнерчилердин" козголоңу өлкөнүн ички системасындагы карама-каршылыкты көрсөткөнүн, бирок бул окуя Орусиянын ички иши экенин белгиледи.
Саммитте видеобайланыш аркылуу сүйлөгөн Украинанын президенти Владимир Зеленский "вагнерчилердин" козголоңу Орусиянын алсыздыгын далилдегенин, бул Москванын мыкаачылык аракеттерине каршы күрөштө Киевге жардам берерин айтты.
Зеленский Евробиримдикти Украинага кошумча аскердик жардам берүүгө жана НАТОго мүчөлүккө кабыл алууга чакырды.
Мындан тышкары жолугушуунун катышуучулары Орусия Украинанын аймагынан аскерлерин толугу менен тез арада кандайдыр бир шарт койбостон алып чыгып кетиши үчүн Кытайды Орусияга басым жасоого чакырышты.
Билдирүүдө Евробиримдиктин мамлекеттери Кытай менен эл аралык жана экономикалык кызматташтыкты уланта берери белгиленген. Ошондой эле документте Тайвань маселеси жана Кытайдагы адам укуктарын сактоо көйгөйү боюнча европалык лидерлердин тынчсыздануусу камтылган.