Украин жазуучусу Виктория Амелина 27-июнда орус армиясынын Краматорск шаарына жасаган ракеталык чабуулунда алган жараатынан улам ооруканада каза болду. Бул тууралуу жекшембиде Украинанын ПЕН-клубу кабарлады.
Муну менен Краматорск калаасындагы аткылоодон курман болгондордун саны 13кө жетти.
Ракеталык сокку урулган маалда Амелина Колумбиядан келген делегация - саясатчы Серхио Жарамило, жазуучу Гектор Абад жана журналист Каталина Гомес менен Ria Lounge пицца-барында болгон. Баары жараат алышкан.
Виктория Амелина 37 жашта болчу, эки романдын жана балдар китебинин автору, украиналык жаш жазуучуларга ыйгарылуучу Йозеф Конрад-Коженевский атындагы сыйлыктын ээси.
Орусия Украинага басып киргенден кийин, ал укук коргоочу Truth Hounds уюмуна кошулуп, орус армиясы басып алган, кийин бошотулган аймактардагы кылмыштарын иликтеген. Ал Украинанын чыгышында, түштүгүндө жана түндүгүндө иштеди.
Амелина акыркы кездери украиналык аялдар жана алардын согуштагы жашоосун баяндаган англис тилиндеги китебин жазып жаткан.
Орусияда "Вагнер" жеке аскер компаниясынын негиздөөчүсү Евгений Пригожинди даңазалаган сайттар бөгөттөлүүдө. Бул тууралуу Орусиядагы интернетти тосмолоого байкоо жүргүзгөн "Роскомсвобода" билдирди.
Уюмдун маалыматына караганда, жети сайтка бөгөт коюу 28-июнда башталган. Бул аракет кайсы мамлекеттик органдын чечими экени азырынча белгисиз.
Бөгөттөлгөн сайттардын домендик аталыштарында p2024 же pp2024 айкалышы камтылган жана аларда Евгений Пригожиндин сүрөтү бар.
Сайттардагы тексттерде Орусия "улуу" жана "уникалдуу" өлкө экени айтылып, Пригожин "Орусияны европалык сепилдер жана америкалык банк эсептери үчүн сатпай турган" адам катары сыпатталган. Ошондой эле "жаңы Орусиянын жаңы лидери" Пригожинди колдоого, өлкөнү "сактап калууга" чакырык жасалат.
"Вагнердин" негиздөөчүсүнүн шайлоо өнөктүгүнө окшош сайттарды ким түзгөнү белгисиз. Бөгөттөлгөн сайттардын чындап эле Пригожин менен байланышы бар экенине эч кандай далил жок.
Былтыртан бери Украинада согушуп жаткан "Вагнердин" жетекчиси Евгений Пригожин соңку кездери орус армиясынын жетекчилигин көп сындап жүргөн. 24-июнга караган түнү "вагнерчилер" Украинадагы базаларынан чыгып, Ростов-на-Дону шаарын эч кандай каршылыксыз басып алган. Москвага 200 чакырым калганда Пригожин "кан төгүүнүн алдын алуу үчүн" артка кайтышарын күтүүсүз жарыялаган.
Беларустун авторитардык лидери Александр Лукашенко менен сүйлөшкөндөн кийин "куралдуу көтөрүлүштү" токтотуп, артка кайткан Пригожин өзү дагы Беларуска кеткени маалымдалган.
Украинанын чыгыш жана түштүк бөлүгүндө катуу салгылашуулар уланууда. Киев анын контрчабуулуна орус күчтөрү катуу туруштук берип жатканын, бирок аймакта ийгиликке жеткенин билдирди.
Украин коргоо министринин орун басары Анна Маляр 2-июлда Телеграм аркылуу Донецк облусунда акыркы бир жумада тогуз чарчы километр орусиялык баскынчылардан бошотулганын айтты. Муну "тактикалык позициянын жакшырганы" деп баалады.
Малярдын айтымында, түштүк тарапта ушул эле мезгил аралыгында 28 чарчы километрден ашык аянт кайтарылды.
Украинанын Сумы шаарында учкучсуз учак беш кабаттуу турак жайга чабуул коюп, бир адам каза болгонун президенттик аппараттын жетекчиси Андрей Ермак билдирди.
3-июлда калаада бир катар жардыруулардын үнү угулуп, абадан коргонуу системасы иштеди.
Калаа бийлиги элден дүрбөлөңгө түшпөй, баш калкалоочу жайларда болууну суранды.
Орусия Украинага бастырып киргенден бери Сумы облусу такай орус аскерлеринин аткылоосуна кабылууда. Акыркы чабуулдардын биринде беш жашар бала жараат алган.