Орусиянын армиясы Киевди үчүнчү түнү дагы дрондор менен аткылады. Шаар мэри Виталий Кличко анда бир адам набыт болгонун кабарлады.
Ал Телеграм-каналына "Подольск районундагы көп кабаттуу үйлөрдүн биринде тутанган отту өчүрүү маалында бир адамдын сөөгү табылды", - деп жазды.
Киев шардык аскердик администрациясынын башчысы Сергей Попко дрондун сыныктары жалпысынан төрт районго кулаганын, айрым жерлерде өрт тутанып, дагы эки адам жараат алганын билдирди.
Киев баштаган Украинанын бир катар аймактарында 12-июлдан 13үнө караган түнү дагы абадан эскертүү берилди.
Орусиянын армиясы Киевге 11-12-июль күндөрү дагы түнкүсүн дрон менен чабуул жасаган. Анда Украина абадан коргонуу системасы аркылуу ондогон дрондор атып түшүрүлгөнүн билдирген.
Согуш маалында бул маалыматтарды бейтарап булактардан ырастоо мүмкүн эмес. Москва чабуулдар тууралуу комментарий бербей келет.
АКШнын президенти Жо Байден менен Украинанын лидери Владимир Зеленский Вильнюстагы саммиттин алкагында жолугушту.
Сүйлөшүүнүн алдында Байден Орусиянын агрессиясына каршы туруу менен Украина бүткүл дүйнөгө эрдиктин үлгүсүн көрсөткөнүн айтты.
Зеленский Украинага дүйнөнүн бардык өлкөлөрүнүн ичинен эң чоң жардам көрсөткөнү үчүн АКШга ыраазылык билдирди.
Буга чейин маалымат каражаттары АКШ президентинин администрациясы HIMARS системасын колдонуу менен алыскы аралыкка жете турган ATACMS ракеталарын Украинага берүү маселесин карап жатканын жазып чыгышкан.
Украинанын президенти Владимир Зеленский Украинага узак мөөнөттүк коопсуздук кепилдиктерин бере турган "Чоң жетиге" мүчө кубаттуу мамлекеттердин макулдашуусун кубаттады, бирок ал НАТОго мүчөлүктүн ордун толтура албастыгын билдирди.
"Чоң жетиге" кирген мамлекеттер мындай макулдашуу тууралуу НАТОнун Украина боюнча билдирүүсүнөн кийин жарыялашты. 11-июлда Түндүк Атлантика аскердик альянсы "бардык мүчө мамлекеттер макул болгондо жана баардык шарттар аткарылганда гана Украинага чакыруу жиберерин" билдирип, кандай шарттар экенин чечмелеген эмес.
12-июлда Зеленский менен жолугушуудан кийинки маалымат жыйында НАТОнун баш катчысы Йенс Столтенбергге чакыруу боло электигине карабастан, Украина НАТОго аябай эле жакындаганын билдирди.
"Биз өнөктөш катары жолугаар күндү чыдамсыздык менен күтүп жатам", - деп кошумчалады.
Британиянын өкмөт башчысы Риши Сунак жарыялаган "Чоң жетинин" Украина боюнча макулдашуусуна ылайык, Киевге көбүрөөк коргонуу техникасы берилет, чалгын маалыматтарын алмашуу тездетилет жана кеңейтилет, кибер жана гибрид коркунучтарынан коргоо жаатындагы колдоо күчөтүлөт, Украинанын өндүрүштүк базалары өнүктүрүлөт.
Андан тышкары Киев менен "Чоң жетиге" кирген мамлекеттердин ортосунда эки тараптуу узак мөөнөттүү келишимдерди түзүүгө жол ачат.
Макулдашуу тууралуу расмий билдирүү Зеленский АКШ президенти Жо Байден менен жолуккандан кийин расмий жарыяланары күтүлүүдө.
Кремль дароо бул макулдашууну "мүчүлүштүк" деп сынга алды.
"Биз муну ойлонулбаган жана келечекте коркунуч туудуруучу кадам деп эсептейбиз",- деди маалымат катчы Дмитрий Песков.
Ал ошондой эле журналисттердин суроолоруна жооп берип жатып, батыш мамлекеттери Украинага коопсуздук кепилдиктерин сунуштоо менен Орусиянын коопсуздугуна коркунуч туудуруп жатканын билдирди.
Орусиянын армиясы Киев шаарына 11-июлдан 12ине караган түнү дагы дрондор менен чабуул жасады. Украинанын куралдуу күчтөрүнүн билдиришинче, анда "Шахед" үлгүсүндөгү 15 учкучсуз аппаратын баары атып түшүрүлдү.
Маалыматта, дрондор бул ирет түндүк-чыгыш багытынан (Курск) учурулганы айтылат. Баштапкы маалыматтарга караганда жабыркагандар, жараат алгандар болгон жок.
Бул түнү Украинанын бардык аймагында абадан эскертүү берилип, ал беш саатка чейин созулду. Киев облустук аскердик администрациясы Телеграм-каналы аркылуу жарандарга кайрылып, украин жоокерлерин сүрөткө, видеого тартпоого, маалымат таратууда сак болууга чакырды.
Шаардык администрациянын башчысы Сергей Попко абадан эскертүү берилген маалда тургундар коопсуз жайда болушу керектигин эскертти.
Мындан бир түн мурда дагы Орусия Киевге дрондон чабуул жасаган. Анда 28 учкучсуз аппаратын 26сы жок кылынганы кабарланган.
Согуш маалында бул маалыматтарды бейтарап булактардан ырастоо мүмкүн эмес. Москва чабуулдар тууралуу комментарий берген жок.