Орусия Украинага согуш ачып, 2023-жылдын май айына чейин "Вагнер" менчик аскер уюмунун 22 миң жалданма жоочусу каза болду. 40 миңдейи жараат алды. Мындай маалыматты "Разгрузка Вагнера" Телеграм каналы 19-июлда жарыялады. "Свобода" радиосу бул каналдын аталган уюмга байланышы бар экенин жазды.
Аталган канал жалданма жоочулардын штабын башкарган кишиге таянып кабарлагандай, "Вагнер" согушка жалпысынан 78 миң адамды жалдаган, алардын 49 миңи абакта отургандар болгон.
Жакында "Медуза" жана "Медиазона" басылмалары иликтөө жарыялап, Украинадагы согушта 47 миңдей орус жоокери каза тапканын жазышкан.
"Медиазона" басылмасы, Би-Би-Си радиосунун орус кызматы жана ыктыярчылар өлгөн орус аскерлеринин 26 801инин тек-жайын аныкташкан.
Орусиянын Коргоо министрлиги Украинадагы согуштагы жоготуулары тууралуу ачык жазбайт жана журналисттер жарыялаган маалыматтарды да комментарийлебейт. АКШ быйыл январда Украинадагы согушта орус армиясынан набыт болгон жана жаракат алгандардын саны болжол менен 270-300 миң адам экенин билдирген.
Орусиянын армиясы Одессаны үчүнчү түнү катары менен, 20-июлга караган түнү дагы дрондон аткылады. Украинанын мониторинг каналдары катуу жарылуулар болгонун жазышты.
Өлкөнүн аба күчтөрү Орусия жогорку тактыктагы "Оникс" ракеталарын колдонгонун билдирди. Айрым бир маалыматтарга караганда, чабуулда эки адам жараат алды.
Бул түнү дагы Украинанын башка аймактарына чабуул болду. Чернигов, Сумы жана Харьков облустарында, Херсондун түштүгүндө жана Николаевде абадан эскертүү берилди.
Николаев облусунун башчысы Виталий Ким орус армиясынын соңку соккусунан үч кабатуу үй жана гараж күйүп жатканын билдирди. Чабуулда 18 адам жараат алганын, бешөө ооруканага жаткырылганын, алардын арасында балдар бар экенин билдирди.
Согуш маалында бул маалыматтарды бейтарап булактардан тактоо мүмкүн эмес.
Кремль АКШнын Кыргызстанга карата ыктымал санкциялары тууралуу маалыматка комментарий берди.
Бул тууралуу Орусиянын президенти Владимир Путиндин басма сөз катчысы Дмитрий Песков билдиргенин "РИА Новости" агенттиги жазып чыкты.
"Кыргызстан биздин жакын өнөктөшүбүз жана союздашыбыз, андан тышкары албетте, бизди абдан өнүккөн интеграциялык процесстерге катышканыбыз да бириктирип турат", - деди. Анын айтымында, Москва бул кызматташууну өнүктүрүүнүн аракетинде.
АКШ президентинин администрациясы Кыргызстанга жаңы экономикалык чара көрүүгө камынып жатканын The Washington Post басылмасы жагдайдан кабардар аткаминерлерге шилтеме жасап 18-июлда жазган. Мындай кадам санкцияга туш болгон товарлардын Кыргызстан аркылуу Орусияга ташылуусуна бөгөт коюу үчүн жасалып жатканы белгиленген.
Макалада Кыргызстандын Орусияга экспортунун жалпы көлөмү Москва Украинага кол салгандан кийин 250% өскөнү көрсөтүлөт.
Кыргызстандын Вашингтондогу элчилиги буга комментарий берип, өлкөнүн бийлиги эл аралык эрежелерди сактай турганын, аткезчиликти жана мыйзамсыз сооданы токтотууга дилгир экенин билдирген.
Ошондой эле кыргыз элчилиги айрым сын көз караштагылар "реалдуу экономикалык жагдайды" көз жаздымда калтырып жатканын белгилеп, Орусия менен Кыргызстан Евразиялык экономикалык биримдиктин мүчөлөрү экенин, миллиондон ашык кыргыз жараны Орусияда иштеп жүргөнүн кошумчалаган.
19-июлга караган түнү Орусия Украинага "Шахед" жанкечти дрондору жана ракеталар менен чабуул жасады. Негизги сокку Одесса облусуна болду.
Москва Кара деңиз дан келишиминен чыкканын жарыялагандан кийин бул шаарга экинчи түн катары менен чабуул жасап жатат.
Кемеге каршы колдонулчу "Оникс" жана X-22 ракеталары Одесса жана Черноморск портуна жана маанилүү инфраструктурасын бутага алганын Украинанын армиясы билдирди.
Одесса портунун эгин жана мунай терминалдарында цистерналар жана жүктөөчү жабдуулар бузулган.
Маалымат каражаттары бир нече турак жай зыян тартып, алты киши ооруканага түшкөнүн, арасында тогуз жаштагы бала бар экенин кабарлашты.
Шаарда жардыргыч заттар сакталган кампа өрттөнгөнүн Телеграм каналдар жазды. Жергиликтүү бийлик фейерверк сакталган жерге ракета тийип, өрт чыкканын билдирди.
Орус армиясы Киев, Житомир, Днепропетровск жана Херсон облустарына да чабуул койгонун жергиликтүү бийликтер жарыялашты. Москва соңку чабуулдарга комментарий берген жок.
Киевдин эсебинде, шаршембиге караган түнү орус күчтөрү 60тан ашуун ракета, дрон менен чабуул коюп, алардын кыркка жакынынын мизи кайтарылды.