Орусиянын Мамлекеттик Думасы армияда милдеттүү кызмат өтөгөндөргө бир айдан кийин Коргоо министрлиги менен келишим түзүүгө уруксат берүүнү караштырууда.
Келишимден кийин мекеме аларды Украинадагы согушка жөнөтө алат. Мыйзамга тиешелүү түзөтүүлөрдү парламенттин Коргоо комитети жактырды.
Документке ылайык, андай келишимдерди министрлик мобилизация, аскердик абал, куралдуу жаңжалдар учурунда, контртеррордук операциялар жүргүзүлгөн маалда же армияны чет өлкөлөргө жөнөткөндө түзө алат.
Азыркы учурда андай келишимге аскерлер армияга чакырылгандан үч айдан кийин кол коё алат.
25-июлда Мамдума армияда кызмат өтөөнүн шарттарын катаалдаштырган бир нече алымча-кошумчаны жактырган. Алсак, чакыруу кагазын алгандан кийин аскердик комиссариатка барбай койгондорго айып пулду көбөйтүү, аскерге чакыруу жашын 27ден 30 жашка чейин көтөрүү сунуштары колдоо тапты. 18 жаштан эмес 21 жаштан чакыруу сунушу колдоо тапкан жок.
"Свобода" радиосунун жазганына караганда, Думанын Коргоо комитетинин төргасы Андрей Картаполов түзөтүүлөр "чоң урушка" жана "жалпы мобилизацияга" ылайыкташтырлып жазылган деп комментарийледи.
Расмий маалыматтарга ылайык, учурда Орусияда 1 миллиондон ашуун кыргызстандык жүрөт. Алардын 500 миңдейи орус жарандыгын алган.
Украинанын Константиновка калаасында орус күчтөрү аткылаган учурда жараат алган 12 жаштагы кыз каза болду. Бул тууралуу 26-июлда Донецк облустук администрациясынын башчысы Павел Кириленко билдирди.
Кыз 25-июлга караган түндө болгон чабуулда жараат алып, ооруканага жаткырылган. Ушул эле чабуулда 10 жаштагы бала да жашоо менен кош айтышкан. Андан тышкары, дагы бир жайкын тургун набыт кеткен. Украин бийлиги аткылоодо кассеталык ок-дарылар колдонулганын билдирген. Маалыматты көз карандысыз булактардан ырастоо мүмкүн эмес.
Шаршембиде эртең менен таратылган расмий кабарга ылайык, бир суткада 26 жерде кагылышуу болду, анын көбү Запорожье жана Херсон облустарында. Украинанын армиясы Мелитополь жана Бердянск багытында контрчабуулун улантууда.
Украинанын авиациясы Орусиянын турумдарына тогуз жолу сокку урду. Башкы штаб Москванын бир тик учагы, беш "Шахед" жанкечти дрону жана чалгындоочу учкучсуз учагы атып түшүрүлгөнүн билдирди.
Украин куралдуу күчтөрү Бахмут багытында жана түштүк фронтуна ийгиликке жетүүдө
Украинанын расмий маалыматында украин аскерлери түштүк фронттогу Старомайорск багытында ийгиликке жетишти, буга байланыштуу орусиялык күчтөр катуу каршылык көрсөтүүдө, өз бөлүктөрүн жылдырып, резервдерди колдонууда.
Украин күчтөрү Бахмут шаарынын түндүк жана түштүк тарабында чабуулга өтүүдө. "Күч органдарынын чабуул жана курчоо аракетинен кийин каршылаш Авдеевкага позициясынан чегинди", - деп билдирди Украинанын куралдуу күчтөрүнүн расмий өкүлү Андрей Ковалев. Бул тууралуу ал өлкөнүн Коргоо министрлигинин көзөмөлүндөгү Military Media Center Телеграм-каналына билдирди.
Кошмо Штаттар Украинага 400 миллион долларга кошумча аскердик жардам жөнөтөт. Бул тууралуу Associated Press Ак үйдөгү булактарына таянып жазды.
Маалыматка караганда, анын алкагында Киевге чалгын чогултуу үчүн колдонулган Hornets нано-дрондору, HIMARS реактивдүү системалары, танктарга каршы колдонулчу "Стингер" жана "Жавелин" зениттик ракеталары, Hydra-70 жер-аба ракеталары, "Страйкер" оор аскердик техникасы берилет.
Бул курал-жабдык атайын президенттик программанын алкагында бир нече күндүн ичинде жөнөтүлөт. Бул схема Байденге Конгресстин макулдугу жок эле каражат бөлүүгө шарт түзөт. Орусия Украинага толук кандуу согуш ачкандан бери Вашингтон Киевге 41 миллиард доллардан ашуун каражатка жардам көрсөттү.