1-августка караган түнү “Москва-сити” бизнес кварталындагы "IQ-Квартал" деп аталган көп кабаттуу имаратка учкучсуз учак сокку урду. Бул тууралуу Орусиянын расмий маалымат каражаттары жана Телеграм-каналдар жазды.
Москва шаарынын мэри Сергей Собянин Телеграм-каналында билдиргендей, имараттын 21-кабатындагы терезелер талкаланган. Жабыркагандар тууралуу маалымат жок.
Орусиянын Коргоо министрлиги Москванын чет жакасында эки украин учкучсуз учагы атып түшүрүлгөнүн маалымдаган.
Алардын бири башкаруусун жоготуп, “Москва-ситидеги” Орусиянын Экономикалык өнүктүрүү министрлиги жайгашкан имаратка тийген.
30-июлга караган түнү Москва шаарына учкучсуз учактардан чабуул жасалып, "Москва-сити" бизнес борборунун эки мунарасы жабыр тарткан. Имараттын бир нече кабатынан терезелер күбүлүп түшүп, бир киши жараат алганы кабарланган. Маалыматтарда чабуул эки дрондон болгону айтылат.
Бул окуялардын фонунда Москвада учуп-конууга тыюу салынып, "Внуково" аэропортунун иши үзгүлтүккө учурады.
Украинанын жетекчилиги бул чабуулдарды комментарийлеген жок. Орусиянын ичиндеги чабуулдарга украин бийлиги расмий түрдө жоопкерчиликти өзүнө албайт.
Орусиянын бийлиги буга чейин дагы башкалаа дрон чабуулуна кабылганын маалымдаган. Анын ичинде май, июнь айларында жана июль айларынын башында да ушундай окуялар катталган.
Орусиянын армиясы 31-июлда украин президенти Владимир Зеленскийдин кичи мекени саналган Кривой Рог шаарындагы көп кабаттуу үйгө ракетадан сокку урду. Бул тууралуу Украинанын Ички иштер министрлиги билдирди.
Маалыматка караганда, ракеталардын бири университеттин төрт кабатуу имаратына тийген. Урандылардын алдына адамдар калышы мүмкүн экени кабарланды. Ал эми экинчи ракета тургундар жашаган тогуз кабатуу үйгө тийген. Соккунун натыйжасында өрт тутанды. Алдын ала-маалыматка караганда эки киши мерт кетип, 20 чакты адам ооруканага кайрылды. Зеленский жабыркагандардын жакындарына социалдык баракчалары аркылуу көңүл айтты.
Учурда өрт өчүрүү жана урандылардан кишилерди куткаруу иштери жүрүүдө.
30-июлда Украинанын Донецк аймагында орус армиясынын аткылоосунан эки жайкын тургун мерт кеткенин облус губернатору Павел Кириленко 31-июлда билдирди.
Ал арада Украинанын коргоо министринин орун басары Анна Маляр түштүктөгү Запорожье аймагында украин армиясынын контрчабуулу ийгиликтүү жүрүп жактанын кабарлады.
"Мелитополь жана Бердянск багыттарында акырындап, бирок ишенимдүү баратабыз", - деп жазды Маляр Телеграмга. Ал аскердик аракеттер контрчабуулдун баардык багыттарында уланып жатканын кошумчалады.
Daily Express басылмасы өз булактарына таянып Британияда эки миңден ашык украиналык жоокер контрчабуулга даярданып жатканын жазды. Алардын башкы максаты Орусия аннексиялап алган Крымды кайра кайтаруу операциясына катышуу экенин билдирди.
Британиядагы украин жоокерлеринин машыгуусу тууралуу расмий маалымат бериле элек.
Басылманын ырасташынча, машыгуу полигону Британиянын түштүк-батышындагы Дартмурда жайгашкан жана пресса үчүн жабык.
Британ адистери Украинанын Коргоо күчтөрүнүн "элиталык бөлүгүн" машыктырып жатат. Алар абадан жана жерден чабуул жасоо операцияларына катышат. Daily Express бул операция ушул жылдын аягына чейин ишке ашат деп билдирген.
Киев менен Лондон буга байланыштуу комментарий бере элек.
Ушул айдын башында Украинанын президенти Владимир Зеленский Киев контрчабуулга даяр экенин жарыялаган.
Жекшембиде, 30-июлда өлкөнүн коргоо министринин орун басары Анна Маляр “Телеграм” каналына украин күчтөрү Бердянск жана Мелитополь багытында “акырындап болсо да илгерилегенин” жазган. Ал "контрчабуулдун бардык багыттары боюнча кармаш уланып жатканын” айткан.
Ага чейин The New York Times басылмасы Пентагондогу булактарына шилтеме кылып, Украинанын армиясы күчүн Запорожье облусуна топтоп, контрчабуулдун негизги баскычын баштаганын маалымдаган. Анда башкы максаты - Орусия басып алган Украинанын түштүктөгү аймактарын аннексияланган Крым менен байланыштырган жолду алуу экенин белгилеген.