Орусиялык авиакомпаниялар санкцияларды буйтап өтүү менен былтыр майдан бери Батыштан 1,2 миллиард долларга учак тетиктерин сатып алган.
Бул схеманы ишке ашырууга жардам берген ондогон компаниялардын арасында Тажикстандагы курулуш фирмалары дагы бар. Бул тууралуу Рейтер агенттиги жазды.
Макалада белгиленгендей, соода чектөөлөрү киргизилгенче Орусиянын "Урал аба каттамдары", "Аэрофлот", S7 жана башка компанияларына Германиянын Lufthansa Technik сыяктуу фирмалары техникалык колдоо көрсөтүп турчу.
Рейтер агенттиги жазгандай, Тажикстанда жайгашкан "Истиклолият 20" жана "Кафолати Комил" ишканалары "Урал аба каттамдары" компаниясына 2022-жылы америкалык Northrop Grumman фирмасынын тетиктерин Бириккен Араб Эмираттарынын аймагы аркылуу жеткирген.
Андан тышкары, Рейтер макаласында авиациялык тетиктер Түркия, Кытай жана Кыргызстандын аймагы аркылуу Орусияга жеткирилип жатканы белгиленген.
Маселен, молдовалык Air Rock жана Aero stage компаниялары Кыргызстан аркылуу Орусияга батыштан сатып алган тетиктерди жөнөткөнү жазылган.
"Азаттык" буга чейин Орусиянын согушка жардамдашып жаткан компаниялары менен кызматташуусу ыктымал делген кыргызстандык ишканалар боюнча атайын иликтөө жасаган.
АКШнын Каржы министрлиги Орусиядагы 120дан ашуун компания менен катар Кыргызстанда катталган төрт ишканага да санкция салган.
Орус армиясы 24-августка караган түнү Украинанын түштүгүндөгү Днепр шаарына жасаган ракеталык соккусунан жети карапайым тургун жаракат алды. Бул тууралуу Днепропетров облусунун губернатору Сергей Лысак Телеграмга жазды.
Ал чабуулдан транспорттук обьект жабыркаганын, үч эркек жана төрт аял ооруканага жеткирилгенин кошумчалады.
Андан тышкары, ондогон имараттарга, анын ичинде банк, мейманкана, эмерек фабрикасы, административдик имарат жана эки турак-жайга зыян келтирилген.
Украинанын Аскер-аба күчтөрүнүн өкүлү Юрий Игнат билдиргендей, Орусия түнү С-300 баллистикалык ракеталары, "Искандер К" жана "Искандер М" ракеталары менен сокку урду. Ал ракеталардын бири абадан атып түшүрүлгөнүн кошумчалады.
Согуш талаасында украин Куралдуу күчтөрүнүн башкы штабы билдиргендей, түштүктөгү Мелитополь багытында контрчабуул уланууда. "Крымдын дарбазасы" деп саналган стратегиялык Мелитополь шаарын орус күчтөрү былтыр мартта басып алышкан.
Украина 24-августта эгемендиктин 32 жылдыгын белгилеп жатат.
Президент Владимир Зеленский калкка жасаган кайрылуусунда бул күн "эркин жана күчтүү адамдардын майрамына" айланганын белгиледи.
Ал украиндердин эрктүүлүгүнө баа берип, орус агрессиясына каршы турууда украин коомунун биримдигинин баса белгиледи.
"Баары керек, баары маанилүү - адамдар, аракеттер, сөздөр. Биз баарын туура кылгандыктан, кимдир бирөө "Украинага даңк" дегенде бүтүндөй дүйнө "Баатырларга даңк" деп жооп берет", - деди Зеленский.
АКШнын мамлекеттик катчысы Энтони Блинкен украиндери Эгемендик күнү менен куттуктап, "24-август Украинанын көз карандысыз, суверендүү, демократиялык мамлекет экенин күбөлөндүргөн, Украинанын эрктүүлүгү жана күчтүүлүгү менен сыймыктанган күн", - деп билдирди.
Блинкен Америка Украина менен экенин дагы бир жолу кайталады.
Украинанын атайын кызматтары бул күнү орус армиясы соккуларын күчөтүшү мүмкүн экенин эскертти.
Лукашенко Украинаны Эгемендик күнү менен куттуктады, бирок Пригожиндин өлүмүнө комментарий берген жок
Беларустун авторитардык лидери Украинаны экинчи жыл катары менен куттуктап атат. Ошол эле маалда ал Орусияны колдоп келет. Расмий сайтында жарыяланган куттуктоодо ал "каршылашууну токтотууга" чакырып, Украинага тынчтык каалаган. Лукашенко "Вагнердин" жетекчиси каза тапкан авиакырсык тууралуу эч нерсе айта элек. Учурда Пригожиндин жалданма жоочуларынын көбү Беларустун Могилев облусунун аймагындагы лагерде калууда.